Chhut Âi-khi̍p Ki 40

Tap Sṳn-chong-phùng

1Song-chú fûn-fu Mô-sî kóng: 2“Châng-ngie̍t chhû-yit, ngì oi chiông sṳn-chong-phùng tap hí-lòi, 3chiông ke piong sṳ̍p-kie ke yok-khui piong chhai tî-poi, pin yung chong-man châ-tén. 4Ngì oi chiông kiûng-chok pân ngi̍p-hi, chhai chok-táng pài-hó yung-phín; ya chiông tên-thòi pân ngi̍p-hi, yu-oi tiám tên-fó. 5Ngì oi chiông sêu-hiông ke kîm-thàn mien-tui yok-khui piong-hó, pin chhai sṳn-chong-phùng mùn-héu koa-song mùn-liàm. 6Oi chiông sêu-fa-chi ke chi-thàn pài chhai sṳn-chong-phùng mùn-héu chhièn, 7sé-thông-phùn piong chhai sṳn-chong-phùng lâu chi-thàn chûng-kiên, tî-poi chông-tén súi. 8Oi chiông thìn-yen chû-vì ke chong-man koa hí-lòi, pin chhai mùn-héu koa-song mùn-liàm.

9“Ngì oi nâ sṳn-yù kò sṳn-chong-phùng lâu só-yû yung-phín, fûn-phe̍t kì-têu vì-sṳn, 10yèn-heu yung sṳn-yù kò sêu-fa-chi ke chi-thàn lâu só-yû yung-phín, sṳ́ kì-têu chhiòn-phu fûn-phe̍t vì-sṳn. 11Ngì ya oi yung sṳn-yù kò sé-thông-phùn lâu phùn-chho, sṳ́ kì-têu fûn-phe̍t vì-sṳn.

12“Ngì oi tai Â-lùn lâu kì ke-têu lai-é to sṳn-chong-phùng mùn-héu, pûn kì-têu chhai ke-vi sé-sṳ̂n. 13Oi lâu Â-lùn chok-hó sṳn-fu̍k, yung sṳn-yù kò kì, sṳ́ kì fûn-phe̍t vì-sṳn, cho chi-sṳ̂ sṳ-fung Ngài. 14Oi tai Â-lùn ke-têu lai-é lòi, lâu kì-têu chok-hó nui-sâm, 15yung sṳn-yù kò kì-têu, chhiong kò kì-têu ke â-pâ khiung-yong, sṳ́ kì-têu cho chi-sṳ̂ sṳ-fung Ngài. Thûng-ko liá sṳn-lî kì-têu oi yún-yén cho chi-sṳ̂, sṳ-sṳ thoi-thoi sṳ-fung Ngài.”

16Liá yit-chhiet ke sṳ Mô-sî chhiòn-phu cheu Song-chú só fûn-fu ke fa hi-cho. 17Só-yî kì-têu chhai lì-khôi Âi-khi̍p heu ke thi-ngi ngièn châng-ngie̍t chhû-yit chiông sṳn-chong-phùng tap hí-lòi. 18Mô-sî piong-hó phùng-chho, ôn kut-ka, chhôn vàng-kong, fù-hí chhû-é. 19Kì chiông sṳn-chong-phùng ke phùng-táng khièm-hó, táng-kô hàn-yû táng-koi. Liá lûng-chúng he cheu Song-chú fûn-fu Mô-sî ke fa cho ke. 20Kì yu chiông lióng-te siá kie-min ke sa̍k-pán piong chhai yok-khui tî-poi, chiông kong-é chhôn-ko yok-khui ke khiên-é, táng-kô ôn su̍k-chhui ke koi-é, 21yèn-heu chiông yok-khui piong chhai sṳn-chong-phùng tî-poi, koa chong-man lòi châ-tén yok-khui. Liá lûng-chúng he cheu Song-chú fûn-fu Mô-sî ke fa cho ke.

22Mô-sî chiông kiûng-chok pân-ngi̍p sṳn-chong-phùng, piong chhai sṳn-chong-phùng ke pet-phién, chhai chong-man ngoi-mien, 23yu chhai chok-táng piong hien-pûn Song-chú ke kiûng-piáng. Liá lûng-chúng he cheu Song-chú fûn-fu Mô-sî ke fa cho ke. 24Kì chiông tên-thòi piong chhai sṳn-chong-phùng ke nàm-phién, lâu kiûng-chok siông-tui, 25yu chhai Song-chú mien-chhièn tiám tên-chán. Liá lûng-chúng he cheu Song-chú fûn-fu Mô-sî ke fa cho ke. 26Kì chiông kîm hiông-thàn piong chhai sṳn-chong-phùng tî-poi, mien tui-tén chong-man, 27chhai thàn-táng sêu chhin-hiông ke hiông. Liá lûng-chúng he cheu Song-chú fûn-fu Mô-sî ke fa cho ke. 28Kì chhai sṳn-chong-phùng ke mùn-héu koa mùn-liàm, 29chiông sêu-fa-chi ke chi-thàn piong sṳn-chong-phùng ngoi mùn-liàm ke chṳn tui-mien, yèn-heu chhai thàn-táng hien sêu-fa-chi lâu su-chi. Liá lûng-chúng he cheu Song-chú fûn-fu Mô-sî ke fa cho ke. 30Kì chiông sé-thông-phùn piong chhai sṳn-chong-phùng lâu chi-thàn chûng-kiên, phùn-tú chông-tén súi. 31Mô-sî, Â-lùn, lâu Â-lùn ke-têu lai-é chhai chin-ngi̍p sṳn-chong-phùng yî-chhièn ya-he chhiu-khiun chi-thàn ke sṳ̀, chhai phùn-tú sé-sú sé-kiok. 32Liá lûng-chúng he cheu Song-chú fûn-fu Mô-sî ke fa cho ke. 33Chui-heu Mô-sî chhai sṳn-chong-phùng lâu chi-thàn ke ngoi-vì hí vì-làn, lòi cho thìn-yen, yèn-heu chhai mùn-héu chiông thìn-yen ke mùn-liàm koa hí-lòi. Án-ngiòng, Mô-sî chhiu vàn-sṳ̀n só-yû ke kûng-chok.

Song-chú ke Yùng-kông

(Mìn-su Ki 9:15-23)

34Ke-sṳ̀, yùn châ-tén sṳn-chong-phùng, Song-chú ke yùng-kông chhiu chhûng-mân sṳn-chong-phùng. 35Mô-sî mò phan-fap chin-ngi̍p sṳn-chong-phùng; yîn-vi yùn thìn chhai sṳn-chong-phùng táng, Song-chú ke yùng-kông chhûng-mân sṳn-chong-phùng. 36Tak-pái yùn tui sṳn-chong-phùng sṳ̂n sông-hi, Yî-set-lie̍t-ngìn chhiu sái-yàng hiong chhièn-hàng. 37Yùn yit thìn hâ-lòi, kì-têu chhiu thìn hâ-lòi ôn-yàng. 38Chhai Yî-set-lie̍t-ngìn chhiòn-phu ke hàng-chhàng chûng, ngit-sṳ̀-thèu, kì-têu khon-tó Song-chú ke yùn chhai sṳn-chong-phùng táng, am-pû-sṳ̀, khon-tó yùn-chûng yû fó sêu-tén.

Actualmente seleccionado:

Chhut Âi-khi̍p Ki 40: THV12Rdb

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)