Chhut Âi-khi̍p Ki 23

Chṳn-ngi lâu Kûng-tong

1“Cho-m̀-tet chhòn yèu-ngièn; cho-m̀-tet lâu fái-ngìn lièn sú cho ká kien-chṳn. 2Cho-m̀-tet thèn chung-ngìn cho fái-sṳ; chhai tá kôn-sṳ̂ ke sṳ-song cho-m̀-tet thèn chung-ngìn yên-vóng chṳn-chhṳ̍t; 3khiùng-khú ngìn tá kôn-sṳ̂ ke sṳ̀ ya cho-m̀-tet phiên-sîm pó-fu kì.

4“Na-he ngì tù-tó sù-thi̍t ke ngiù ya-he lì mì-lu, oi khiên chón-hi kâu-vàn kì. 5Na-he sù-thi̍t ke lì pà thet-chhûng tiet-tó, oi pông-chhu kì chiông lì fù hí-lòi, cho-m̀-tet sám-khôi.

6“Khiùng-khú ngìn tá kôn-sṳ̂ ke sṳ̀, ngì cho-m̀-tet yên-vóng chṳn-chhṳ̍t. 7Cho-m̀-tet yung mò-yáng mò-chiak ke sṳ lòi ko-ngìn; cho-m̀-tet phan chṳn-chhṳ̍t mò-chhui ke ngìn sí-hìn; yîn-vi Ngài yit-thin oi chit-fa̍t cho liá-chúng fái-sṳ ke ngìn. 8Cho-m̀-tet pûn ngìn ke fùng-pâu sû-mâi; yîn-vi sû fùng-pâu voi sṳ́-ngìn chhiâng-miâng, yu-voi khiuk-kié ngi-ngìn ke fa.

9“Cho-m̀-tet khî-fu tui ngoi-thi lòi ke lî-hak; yîn-vi ngì-têu sṳt chhai Âi-khi̍p cho ko lî-hak, kîn-ngiam ko cho lî-hak ke chṳ̂-mi.”

Thi-chhit Ngièn lâu Thi-chhit Ngit

10“Liuk-ngièn chûng ngì oi kâng-chung thièn-thi, sû-sṳ̀n sán-vu̍t; 11chúng-he chhai thi-chhit ngièn, ngì oi pûn thú-thi hiet-khun, cho-m̀-tet kâng-chung. Oi pûn khiùng-khú ngìn sṳ̍t ke-têu sán-vu̍t, chhûn-hâ ke pûn yâ-chhu sṳ̍t. Ngì ke phù-thò-yèn lâu kám-lám-yèn ya oi cheu-yong phan-lî.

12“Yit lî-pai liuk-ngit cho-se, chúng-he thi-chhit ngit cho-m̀-tet cho-se, hó-pûn ngì ke ngiù, lì hiû-sit, pin sṳ́ ngì ke nù-chhòi lâu chhiam-he̍t ke lî-hak chhiòn-phu yû-hó lòi fì-fu̍k ngièn-hi.

13“Ngài — Song-chú tui ngì-têu kóng-ko ke fa, ngì-têu oi ngin-chṳ̂n chûn-sú. Cho-m̀-tet hiong khì-thâ ke sṳ̀n-mìn khì-tó, lièn kì-têu ke miàng ya cho-m̀-tet thì-tó.”

Sâm Thai Chiet-khì

(Chhut Âi-khi̍p Ki 34:18-26; Sṳ̂n-min Ki 16:1-17)

14“Tak-ngièn oi vi Ngài sú sâm thai chiet-khì. 15Oi chhai Â-pit-ngie̍t, chhiu-he ngì lì-khôi Âi-khi̍p ke-chak ngie̍t, cheu Ngài só fûn-fu ke sú Chhù-kau-chiet. Chhai chiet-khì ke chhit-ngit chûng, oi-sṳ̍t vù-kau-piáng.

“Cho-m̀-tet khûng-sú lòi kin-pai Ngài.

16“Ngì oi chhai khôi-sṳ́ sû-sṳ̀n nùng-sán-vu̍t ke sṳ̀ sú Sû-kot-chiet.

“Ngì oi chhai chhiû-kui chak kó-chṳ́ ke sṳ̀ sú Sû-chhòng-chiet.

17“Tak-ngièn tù-tó liá sâm thai chiet-khì, ngì vuk-hâ só-yû ke nàm-ngìn chhiòn-phu oi-lòi kin-pai Ngài — Chṳ-kô ke Song-chú.

18“Ngì hien sên-chi ke sṳ̀, cho-m̀-tet nâ sên-chi ke hiet lâu yû-kau ke piáng khiung-ha hien. Chiet-khì só-hien sên-chi ke yù, cho-m̀-tet liù-to thi-ngi chêu-sṳ̀n.

19“Tak-ngièn oi chiông ngì só sû-sṳ̀n chui-hó ke sîn-chhut nùng-sán-vu̍t tai-to Song-chú — ngì Song-ti ke sṳn-thien.

“Cho-m̀-tet yung yòng-mà ke nen lòi chú se yòng-è.”

Yin-hí lâu Chṳ́-sṳ

20“Ngài oi phai thiên-sṳ́ chhai ngì lu-thù chûng pó-fu ngì, thu ngì to Ngài vi ngì yi-phi ke thi-fông hi. 21Ngì oi kiún-sṳ́m thâng-chhiùng kì, cho-m̀-tet phoi-ngia̍k kì; na-mò, kì yit-thin m̀-voi sa-miên ngì-têu ke ko-fam, yîn-vi he Ngài chhâi-phai kì hi ke. 22Na-he ngì thâng-chhiùng kì, chûn-sú Ngài só-yû ke min-lin, Ngài chhiu cho ngì sù-thi̍t ke sù-thi̍t, cho pet-hoi ngì ke ngìn ke thi̍t-ngìn. 23Ngài ke thiên-sṳ́ voi hàng chhai ngì thèu-chhièn, thu ngì chin-ngi̍p Â-mô-li-ngìn, Het-ngìn, Pí-li-sé-ngìn, Kâ-nàm-ngìn, Hî-vi-ngìn, Yâ-pu-sṳ̂-ngìn ke-vi hi; Ngài oi sêu-me̍t kì-têu. 24Cho-m̀-tet khúi-pai kì-têu ke sṳ̀n-mìn, ya cho-m̀-tet fu̍k-sṳ kì-têu; cho-m̀-tet thèn kì-têu ke chûng-kau. Oi sêu-me̍t kì-têu ke sṳ̀n-siong, tá-sui kì-têu kin-pai ke chhû-siong. 25Ngì-têu oi kin-pai Ngài — Song-chú, ngì-têu ke Song-ti, Ngài chhiu su sṳ̍t-vu̍t lâu súi pûn ngì, yu-oi chhù-thet ngì só-yû ke phiang-thung. 26Chhai ngì koet-nui m̀-voi yû lau-thôi ya-he m̀-voi kiung ke se-moi-é. Ngài oi su-pûn ngì chhòng-su.

27“Ngài oi sṳ́ ke-têu tí-khong ngì ke ngìn kiâng Ngài, sṳ́ lâu ngì siông-chhṳ̀ ke ngìn chho̍k-kiâng; só-yû ke tui-thi̍t chhiòn-phu voi chhai ngì mien-chhièn chón-sṳ̂n thò-chéu. 28Ngài oi phai thai vòng-phûng#23:28 “thai vòng-phûng” ya-he “thai châi-nan”. chhai ngì thèu-chhièn kiuk-chéu Hî-vi-ngìn, Kâ-nàm-ngìn lâu Het-ngìn. 29Chúng-he Ngài mò-oi chhai yit-ngièn nui kiuk-chhut kì-têu, miên-tet thú-thi fông-fi, chen-kâ tô-tô ke yâ-chhu lòi hoi ngì-têu. 30Ngài voi chhiam-chhiam kiuk-chéu kì-têu, chhṳ̍t-to ngì-têu ngìn-su chen-kâ, cho-tet sṳ̀n-su ke thú-thi. 31Ngài oi vi ngì thin piên-kie, tui Fùng-hói to Yu-fat-lâ-tí-hò; tui Thi-chûng-hói to sâ-mo̍k thi tai. Ngài oi chiông ke thi-fông ke ngìn kâu chhai ngì ke sú-chûng; ngì chhièn-chin ke sṳ̀, oi kiuk-chéu kì-têu. 32Cho-m̀-tet lâu kì-têu ya-he kì-têu ke sṳ̀n-mìn li̍p-yok. 33Cho-m̀-tet pûn kì-têu he̍t chhai ngì ke koet-nui, kiâng-pha kì-têu voi hoi ngì tet-chhui Ngài. Na-he ngì khúi-pai kì-têu ke sṳ̀n-mìn, liá voi sàng-cho hoi-sí ngì ke ham-chiáng.”

Actualmente seleccionado:

Chhut Âi-khi̍p Ki 23: THV12Rdb

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Chhut Âi-khi̍p Ki 23

Versículos bíblicos populares de
Chhut Âi-khi̍p Ki 23

Biblia:

Hakkafa (Roman script)

Versión: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb