Mahendo 26
26
Pʼaulo unadzihehera mbere za Agiripa
1Ndo mufalume Agiripa achimwamba Pʼaulo vivi, “Unahenzezwa kudzihehera.” Na phapho Pʼaulo achanza kudzihehera vivi,
2“Mufalume Agiripa, ninadzona kukala, nina bahati mbidzo rero kudzihehera mberezo dzulu ya garatʼu malumbano gosi garigo Ayahudi ákala anagomba dzulu yangu. 3Ninaona vivyo kwakukala, uwe mwenye unamanya ada zehu, na maneno fulani garehago malumbano kati yehu. Ndo ninakuvoya wahi unisirikise na uvumiriri.
4“Mimi vyosagala kati ya atʼu angu na ko Jerusalemu kulaa hangu ni mwanache, vinamanywa chividzo ni vilongozi osi a Ayahudi. 5#Mahe 23:6; Afil 3:5Aa adzinimanya tsʼiku nyinji, na achihenza anaidima kushuhudiya dzulu yangu kukala, mimi hangu pho mwanzo, násagala dza mumwenga wa atʼu a chama cha dini yehu, yaani cha Afarisayo, chiricho ndicho chenye shariya kʼomu-kʼomu muno. 6Na vivi ni phapha nilamulwe, kwa ninakuluphira chiratʼu chilagane aricho Mulungu waalaga akare ehu. 7Chilagane chicho ni chiratʼu chikuluphirwacho ni ziratʼu mbari kumi na mbiri za itsʼi yehu. Ao anamwabudu Mulungu kwa moyo wao wosi usiku na mutsana. Bee mufalume Agiripa, aa Ayahudi ananilumbira kwa kuluphiro riro tu! 8Na kwadze mwi Ayahudi asena munaona vikomu muno kukuluphira kukala, Mulungu nikwafufula afadzi?
9 #
Mahe 8:3; 22:4, 5 “Mimi nami pho pʼindi, nákala ninaona ni vidzo kuhenda vyangu vyosi niidimavyo kuripinga dzina ra Jeso wa Nazareti. 10Maneno gago ndigo gago gahenda ko Jerusalemu. Mimi mwenye nákala nidzihewa widimi ni makuhani abomu, na náatiya jela atʼu anji amukuluphirao Jeso. Na aripholamulwa aulagwe, mimi nápiga kʼura ya kukubali. 11Mimi náahenda atiywe akili masinagogini kʼano nyinji, na náheza hata kwagaramisha ariche kukuluphira. Na mwanzo mino bee, nákala nidziatsukirirwa muno hata nichendaatsakula hata midzi ya kure, na kwahendera mauku.”
Pʼaulo unasema arivyotivywa
(Mahendo 9:1-19; 22:6-16)
12Pʼaulo waenderera kwamba vivi, “Ukati umwenga, nákala ninenda Damasiki, na phapho nákala nidzihenzezwa, na nidzilagizwa ni makuhani abomu, kwendaahendera mauku atʼu amukuluphirao Jeso. 13Mwishimiwa, dzuwa ririphofika vitswani, nákala ni njirani ninenda vyangu, na ndipho nichona mungʼalo wa kungʼala kuriko wa dzuwa, uchinibiririkira kulaa mulunguni, na uchinizunguluka mimi na aratʼu okala hu hosini mumo charoni. 14Siswi hosi phapho hwagwa photsʼi, nami nichisikira laka ra mutʼu richigomba kwa Chiburania richamba vivi, ‘Saulo, Saulo! Kwadze unanihendera mauku? Uwe unadzilumiza bule dza nzao yipigayo hala ndatʼa ya bwanawe.’ 15Ndo nami nichiuza nichamba, ‘U ani we bwana?’ Riro laka ra Bwana richiniudzidza richinamba, ‘Mimi ni Jeso, ariye uwe unanihendera mauku. 16Elako, unuka vivi wime! Mimi nidzikulairira, kwa hata nikuhende ukale muhendikazi wangu, na undaashuhudiyira atʼu anjine maneno godzigaona rero, na garatʼu gondakudzakonyesa. 17Mimi nindakutivya kati ya Ayahudi, na atʼu a makabila manjine. Mimi nindakuhuma kwao, 18ukaangʼaze matso gao, wahende alae dzizani aphenye mwangani, na walavye utawala wa Shetani amugalukire Mulungu, kwa hata apate kusamehewa madambi gao, na apate kwikwa duu ra atʼu angu, kuchirira kunikuluphira mimi.’ ”
Pʼaulo unasema vyosumurira neno ra Mulungu
19Pʼaulo waenderera kwamba vivi, “Kwa vivyo mufalume Agiripa, mimi nátuwa goambirwa ko ono riro ra Mulungu, 20#Mahe 9:20, 28, 29na nichanza kwasumurira ao okala ko mudzi wa Damasiki. Chidzako nichendaasumurira achina Jerusalemu, itsʼi ya Ayahudi, na hata kwa atʼu a makabila manjine. Mimi náakalata atʼu atye, na aonyese kwa mahendo kukala, áricha dambi zao achimugalukira Mulungu. 21Gago ndigo goahenda aa Ayahudi anigwire phokala ni Hekaluni, na átsuma kuniulaga. 22Ela Mulungu unaniaviza, na ndo hata vivi rero niimire phapha kulavya ushuda kwenu, mwimwi abomu na otsʼi vyeo. Nigagombago ni garatʼu goambwa ni agomvi a Mulungu na Musa kukala, gandalairira. 23#1 Akor 15:20; Isa 42:6; 49:6Yaani kukala, yamubidi yiye Kʼirisito afe, na akale wa mwanzo kufufuka kulaa kuzimu, kwa aatangazire Ayahudi na atʼu a makabila manjine kukala, aokoke na uo undakala dza mwanga kwao.”
Pʼaulo unamushuhudiya mufalume Agiripa na anjine
24Pʼaulo ariphofika phapho kwenye kudziheherakwe, gavuna Fesito wamutsinza ulimi achimwamba, “Una vitswa uwe Pʼaulo! Cho chisomocho chibomu chidzikutiya vitswa vivi.”
25Ela Pʼaulo yiye achimuudzidza achimwamba, “Tsʼina vitswa mino, mwishimiwa Fesito. Na rangu nigombaro, bee ni ujeri uphuphu, 26hata uwe mufalume Agiripa unagamanya maneno gaga. Kwa vivyo, mimi ninaidima kugomba photsʼi wasiwasi mberezo. Mino nina kanuni unagamanya gago gosi, mana, gago kʼagahendekere kutʼu chifitsoni. 27Mufalume Agiripa, ninamanya kukala, unagakuluphira gago gákwandikwa ni o agomvi a Mulungu.”
28Mufalume Agiripa yiye achimuudzidza achimwamba, “Vidze, unaona uno ukati uchache odzigomba nami unaidima kunihenda mujeso?” 29Pʼaulo yiye achimuudzidza achimwamba, “Mino ninamuvoya Mulungu kukala, hata kumba vindahwala ukati unji, hebu ukati uchache, mwimwi mosi munisirikisao vivi rero, mukale vivyo nirivyo mimi, hata ni mwi mukale photsʼi yiyi minyororo, na gago tsʼigavoyera uwe hicheyo tu!”
30Phapho yiye mufalume, yiye gavuna, Berinike na osi okala a phamwenga nao ázuka, 31achilaa konze, na kuko achambana vivi, “Mutʼu yuyu kʼahendere chochosi chiidimacho kumuhenda anyongwe, hebu kufungwa.” 32Mufalume Agiripa achimwamba vivi yiye gavuna, “Mutʼu yuyu kala kʼakatʼire pili kwa Kaisari, angari kurichwa akalaa jela.”
Actualmente seleccionado:
Mahendo 26: CHIDUR
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión