Mahendo 18
18
Pʼaulo unasumurira Nguma Mbidzo Korito
1Gariphochira gago, Pʼaulo wauka mudzi wa Atene, achenda mudzi ubomu wa Korito. 2Kuko wakwendamona Muyahudi mumwenga aihiwaye Akula, muvyalwa wa jimbo ra Pʼonito. Akula na muchewe Pʼirisila ákala akudza kulaa itsʼi ya Italiya dza dzuzi-dzuzi, kwakukala, Kaisari Kilaudiyo wakala ulagiza Ayahudi osi auke Rumi.#18:2 Rumi ni mudzi ubomu wa itsʼi ya Italiya. Ndo Pʼaulo wakwendaatsemberera ko kwao, 3na kwahivira, ao ákala ni mafundi ga kufuma mahema dza yiye, achikala nao achihenda kazi nao. 4Na chila Sabato wakala achenda sinagogini, achenda achigomba na Ayahudi na Ayunani kuheza kwavuha akuluphire.
5Sila na Tʼimoti ariphokwenda ko Korito kulaa Makedonia, Pʼaulo waanza kuhumira ukatiwe wosi kusumurira Nguma Mbidzo. Yiye waashuhudiya Ayahudi kukala, Jeso ndiye yiye Kʼirisito. 6Ela ao Ayahudi ariphomupinga na kwanza kumuhakana, Pʼaulo wahwala valore achirifufula mbere zao na achiaamba, “Muchiyaya mundamanya enye, mimi tsʼina lawama yoyosi dzulu ya neno riro. Na kwanzira rero, nindakwendaasumurira atʼu a makabila manjine.” 7Chisha, Pʼaulo achilaa mumo sinagogini, achendasagala nyumbani kwa mutʼu mumwenga aihiwaye Tito Jusito. Tito Jusito wakala ni mutʼu wa kabila rinjine, na wakala unamwabudu Mulungu. Nyumbaye yakala yi phephi na riro sinagogi. 8Kʼirisipo yekala ni mubomu wa sinagogi, wamukuluphira Bwana phamwenga na atʼue osi. Na Akorito anji osikira udzumbe wa Pʼaulo ákuluphira, na achibatizwa.
9Usiku umwenga, Bwana wagomba na Pʼaulo ononi achimwamba, “Utsʼogophe Pʼaulo! Uwe enderera kusumurira Nguma Mbidzo, na hebu hata utsʼinyamale. 10Maana, mimi ni phamwenga nawe, na kwa vivyo, kʼaphana mutʼu yendakugwavukira na aidime kukuhenda vii phapha, kwakukala, atʼu anji a mudzi uu ni angu.” 11Ndo Pʼaulo wasagala kuko mwaka umwenga na nusu, achifunza neno ra Mulungu kati yao.
12Ela ukati Galiyo ariphoikwa gavuna wa Akaya, Ayahudi ágwirana achimulinga Pʼaulo achimugwira, na achimuphirika kotini. 13Ariphofika kuko ámulumbira achiamba, “Mutʼu yuyu unaalembalemba atʼu amwabudu Mulungu kwa njira yiriyo yi chinyume cha shariya!” 14Pʼaulo ariphokala uhenza agombe, Galiyo waamba Ayahudi vivi, “Hebu sirikisani mwi Ayahudi! Kala mutʼu yuyu munamulumbira kwa wahenda mai, phapho ningari ni kwete kumusirikisa. 15Ela, kwakukala, munamulumbira kwa kʼani tu dzulu ya maneno, madzina na shariya yenu, gago galamuleni enye. Mino tsʼindalamula maneno dza gago!” 16Phapho Galiyo achiavuguza alae konze ya koti. 17Ndo o Ayahudi osi achimugwira Sositene, ariye wakala ndiye mubomu wa sinagogi ukati uo, achimupiga mbere za koti phapho kare. Ela Galiyo kʼagatuwire mijali kamare maneno gago.
Pʼaulo unauya kahiri Anitiyokiya
18 #
Isab 6:18
Pʼaulo ariphokala usagala mudzi wa Korito kwa chiwango, waalaga akuluphiri anzie a kuko, achiuka. Ariphofika bandari ya Kʼenikireya, wanyolwa#18:18 Ayahudi ákala achinyolwa konyesa musindikizo wa hati rao roriika kwa Mulungu. kwa hatire rokala udziriika. Bada ya gago, achipanda meli kwenda jimbo ra Siriya phamwenga na Akula na muchewe Pʼirisila. 19Kulaa phapho, ákwenda hata mudzi wa Efeso, na phapho Pʼaulo achirichana na Akula na Pʼirisila, yiye achenda sinagogini, achendagomba na Ayahudi. 20Achina phapho achimuvoya asagale nao kwa tsʼiku nyinji, ela yiye kʼahenzere. 21Ela ariphokala unauka, waamba, “Mulungu achihenza nindauya kahiri phapha phenu.” Na achipanda meli achiphauka pho Efeso.
22Pʼaulo unalaa Efeso, meli yakwendatiya nanga Kaisariya. Pʼaulo achikotʼa achendaalamusa akuluphiri a Jerusalemu, na chisha, achitserera achenda Anitiyokiya ko Siriya. 23Kuko, wasagala tsʼiku fulani, na chidzako achenderera na charo, na achichira na majimbo ga Galatiya na Furugiya, achiatiya moyo anafunzi osi a kuko.
Apolo unasumurira neno ra Mulungu Efeso na Korito
24Muyahudi mumwenga aihiwaye Apolo, muvyalwa wa mudzi wa Alekizandiriya, wakwenda Efeso. Yiye wakala ni mutʼu amanyaye kugomba, na wakala unamanya chividzo Maandiko ga Mulungu. 25Mutʼu yiye bee, wakala ufunzwa dzulu ya Njira ya Bwana, na wakala achifunzatʼo na nguvu dzulu ya Jeso. Gakwe gofunza gákala ni ga jeri kamare. Ela chakwe chokala unamanya, ni dzulu ya ubatizo tu, urio Johana wakala unasumurira dzuluye. 26Ndo Apolo waanza kugomba photsʼi woga mumo sinagogini, na Pʼirisila na Akula ariphomusikira, ámuhwala achenda naye kwao nyumbani, achendamufunza akaze kuyimanya muno yiyo Njira ya Mulungu.
27Apolo ariphoamula kwenda jimbo ra Akaya, o atʼu a Mulungu kuko Efeso ámutiya moyo kukala ende na achiaandikira baruwa anafunzi kuko Akaya kukala, amuphokere. Naye Apolo ariphofika kuko, waaviza muno o atʼu okala adzimukuluphira Bwana Jeso kwa mbazi za Mulungu. 28Maana, waenderera kwarima Ayahudi chilachu jamani, kwa kwangʼazira kulaa Maandikoni kukala, Jeso ndiye yiye Kʼirisito.
Actualmente seleccionado:
Mahendo 18: CHIDUR
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión