Kiilanu 21
21
Pɔlu taga koe Darisalamu
1Mɔ nun anu la fatandeŋɛ kɔma, mɔ bakkita kulun banba tɔ. Sure min tɔgɔ Kosu, mɔ tagata ɲɔ kila telendeŋɛ la. Wo tabantaka, sure min tɔgɔ Rodosi mɔ keta ɲɔ. Mɔ bɔɔta ɲɔ, mɔ tagata ke Patara saa tɔ. 2Mɔ to ka kulun banba taran ɲɔ min be tɛgɛla ba tɔ tagala Fenisi jamanɛ tɔ, mɔ bakkita wo tɔ, mɔ tagata. 3Mɔ ka Sipiri sure yen wagate min tɔ, mɔ ka a to mɔ bolo mara tɔ, mɔ be tagala Siri duge mafanna, mɔ yɛlɛta Tiiri saa tɔ bayi kote be bɔɔla kulun banba butɔ ɲɔ le. 4Mɔ ka talibe donu taran ɲɔ, mɔ ka tele wɔrɔwila ma anu fɛ. Wonu ka a fɔ Pɔlu ye Hakkili saniyandeŋɛ barikɛ tɔ, aa a kana yɛlɛ Darisalamu. 5Kɔnɔ mɔ to ka wo tele wɔrɔwila lakamali, mɔ ka kila bita mɔ tagata. Anu bɛ ka mɔ masɔ sa anu la musenu nun anu la deŋɛnu kunma han mɔ bɔɔta saa butɔ. Mɔ kimisirinta ɲɔ le ba dala Ala mataraŋɛ la. 6Mɔ to banta saarala ɲɔgɔn na, mɔ bakkita kulun banba tɔ, ande tugun saagita anu bata.
7Mɔle tugun bɔɔta Tiiri, mɔ tagata ke Potolemayi saa tɔ; mɔ ka ji tɔ kila lakamali ɲɔ le. Mɔ ka ɲɔ nɛɛnɛdɔndɛ diinaɲɔgɛnu kɔntɔn, mɔ nun anu ka tele dɔndɔ ma.
8Wo tabantaka, mɔ bɔɔta ɲɔmɔ tagata Sesare saa tɔ. Mɔ donta Filipu la boŋɛ tɔ, min mu kibaru ɲinma lakela la, ale tugun be wo kayi wɔrɔwila le ɲaama minnu be kiilanu dɛmanna.#21:8 Kɛ kitabue, sora 6, haaya 1-6 fɛlɛ. Mɔ yigiyata a ma. 9Den museren naani be a bolo, wonu be walueya wale mala.
10Mɔ to ka tele siyama ma ɲɔ, nabiyonmɛ do be Juda duge tɔ, a tɔgɔ Agabusi, wo bɔɔta ɲɔ, 11a nata ke mɔ ma, a ka Pɔlu la tɛtakitiraŋɛ jigan, a ka a yɛtɛ kɛŋɛnu nun a bolenu kiti a la, a ko: «Ala Hakkili saniyandeŋɛ be kɛ-lɛ fɔren, aa kaye min tan mu kɛ tɛtakitiraŋɛ la, Yahudenu be wo tigi kitila kɛ mɔɔle le la Darisalamu, anu ni a to sii gbɛtɛ mɔgɛnu sagoe tɔ.» 12Mɔ nun talibenu minnu be wo saa tɔ, mɔ to ka wo kuma mɔɛ, mɔ bɛ tota Pɔlu madiyala, a kana yɛlɛ Darisalamu. 13Wo butɔ, a ka mɔ jaabi, a ko: «Wo be dila fenna, wo ni n juse makasa? Wo ni a lɔn nde be n tabɛnden de n kiti koe la, wo tun ma, hali faga koe la Darisalamu Marige Isa tɔgɛ la ko la.» 14A to ma sɔn mɔ bolo, mɔ sabarita, mɔ ka a fɔ: «Ala mu a sagoe mala!»
15Wo lɔ́gɛ́nu tanbi kɔma, mɔ ka mɔ tabɛn, mɔ ka kila bita yɛlɛla Darisalamu. 16Talibenu minnu be Sesare, wo donu tugun tagata mɔ masɔ, anu ka mɔ doni mɔ yigiya tɔ kaye do bata, a tɔgɔ Manasɔn, a mu Sipiri kaa le la. Talibi do le mu a la bɔɔla bima.
Pɔlu nun kuntigenu la mamadɛŋɛ
17Mɔ la kereŋɛ Darisalamu, ɲɔ nɛɛnɛdɔndɛ diinaɲɔgɛnu ka mɔ labɛn ɲagaliŋɛ la. 18Wo tabantaka, mɔ nun Pɔlu tagata don Yaguba#21:18 Isa nɛɛnɛdɔndɛ le mu kɛ Yaguba la. Sora 12, haaya 17 fɛlɛ anun sora 15 haaya 13 bata; dɛnkɛnɛyabaga jama kuntigenu bɛ tugun madɛnta ɲɔ. 19Pɔlu to ka anu kɔntɔn, Ala ka koe minnu ma sii gbɛtɛ mɔgɛnu tɛma a la kiilaya wale la, a tota wo dɔndɔ dɔndɔ ɲamakaranna. 20Anu to ka wo mɔɛ, anu ka Ala matɔgɔ, anu mɛn ka a fɔ Pɔlu ye: «Mɔ nɛɛnɛdɔndɛ, i bata a yen, Yahude wulu siyama bata dɛnkɛnɛya, adun anu bɛ be Musa la sariya labaturen a bɛlɛma la. 21Wonu bata i la ko mɔɛ, ka a fɔla, Yahude minnu bɛ be sabatiren sii gbɛtɛ mɔgɛnu tɛma, aa i be wonu karanna, anu ni bɔɔ annabi Musa la sariya kɔma, anu kana anu la deŋɛnu sunna, anu mɛn kana Yahudenu la naamuŋɛnu jokki. 22Wo mɔ si a ma kama le wo tɔ? Anu si a mɔɛ i bata na yan, sikkɛ yo bele wo tɔ. 23Wolo mu, mɔ be min fɔla i ye, i be wolo mala: Kayi naani be mɔ tɛma minnu bata lahire jigan Ala ye. 24I ni wo kayi naanɛ jigan, wo bɛ ni wo yɛtɛ lasaniyan, i mɛn ni anu la sarika bɔɔ, alako anu ni anu kuŋɛ si. Wo butɔ, bɛ si a lɔn, anu ka koe minnu mɔɛ i la ko tɔ, tɔɲa ma wonu la. Anu si a lɔn ile faŋɛ tugun be tagamanna Musa la sariya kɔma, i be a makantaren. 25Sii gbɛtɛ mɔgɛnu kan minnu bata dɛnkɛnɛya, mɔle ka natá jigan, ka a sɛbɛre ma wonu ma: anu kana sube dɔmɔ min be bɔɔren sarika la kuyenu ye, anun subu jifɛreŋɛnu, anun base, anu kana langbeya tugun ma.»
26Awa, wo tabantaka, Pɔlu ka wo kayenu jigan, anu bɛ nun Pɔlu mɛn ka anu saniyan. A donta Ala batu bon banba tɔ, a ka luŋɛ fɔ, saniyaŋɛ lɔ́gɛ́nu si naa kamali lun min na, anun sarika tugun si bɔɔ anu bɛ ye dɔndɔ dɔndɔ.
Pɔlu sa koe geele tɔ
27Wo tele wɔrɔwila saniyaŋɛ be lakamalila lun min na, Asi duge Yahude donu ka Pɔlu yen Ala batu bon banba butɔ, anu ka jama bɛ lamaga. Anu ka Pɔlu bita, 28anu be belebelela, anu ko: «Bani Isirayila kayenu, wo mɔ dɛman! Min be mɔgɛ bɛ karanna dula bɛ tɔ, a be mɔ bɔnsɛ nun Musa la sariya nun kɛ dula saniyandeŋɛ fɛɛyala, ale kaye le mu ka! A mɛn bata mɔgɛnu ladon Ala batu bon banba tɔ minnu ma ma Yahudenu la, a ka kɛ dula saniyandeŋɛ kɔsɔ!» 29Anu ka wo fɔ le, bayi anu bata Tirofimi Efɛsi kaa yen nun, a nun Pɔlu be ɲɔgɔn na saa butɔ, a be toren anu ye Pɔlu ka a ladon de a fɛ Ala batu bon banba butɔ.
30Saa bɛ tugun namagata, mɔgɛnu borita ka madɛn. Anu ka Pɔlu bita anu be a sabaala, anu ka a labɔɔ Ala batu bon banba butɔ, anu ka bondanu tagun kisanna. 31Anu be a faga fɛrɛ ɲinila wagate min tɔ yati, kiila keta sɔɔri kuruŋɛ la mansa banba ma, ka a fɔla Darisalamu bɛ bata lamaga. 32Wo ka sɔɔrenu nun anu la kuŋɛnu jigan kisanna, anu borita jigila tagala anu ma. Wonu to ka sɔɔrenu nun anu la mansa banba yen, anu ka Pɔlu botege koe dan. 33Awa, sɔɔri mansa banba ka a madon, a ka Pɔlu bita, a ka yamɔre sa a ni kiti jɔlɔnkɔn fila la, a mɛn ka ɲininkare ma: «Ɲɔmɔ le mu kɛ la? A be fen de maren?» 34Donu be sɔnkɛ layɛlɛla jama tɛma ko do la, donu ko do gbɛtɛ. Sɔɔri mansa banba to ma nɔ kuma beeyareŋɛ sɔtɔla anu la, sɔnkɛ la ko sabu la, a ka yamɔre sa anu ni Pɔlu doni sɔɔrenu la daaka tɔ. 35Pɔlu to keta boŋɛ yɛlɛdula tɔ, fɔ sɔɔrenu ka a jigan jama la fatiya la ko la, 36bayi wo ka a taran, jama be anu jokkiren, anu be belebelela, anu ko: «A nɛ ká bɔɔ!»
Pɔlu la a fan kunma fɔɛ
37Anu be Pɔlu ladonna wagate min tɔ sɔɔrenu la daaka tɔ, a ka a fɔ sɔɔri mansa banba ye, a ko: «I si sɔn n ni kuma do fɔ i ye ba?» Wo ka a fɔ a ye, a ko: «Yaga, i kusan Girɛki kuma la? 38Misira kaa min ka mɔgɛnu lamurutɛ kɛ wagati tanbireŋɛ tɔ, a ka wo kayi jihadi mala mɔgɔ wulu naani mabita a ka anu doni janfue butɔ, yaga ile ma wo la?» 39Pɔlu ka a jaabi, a ko: «Yahude le mu nde la, n be bɔɔren Tarisi, Silisi duge saa do le tɔ, n sɔtɔ saa le wo la. Wo saa malɔnta han! N bata i táran, i ni n sago sa n ni kuma kɛ jama ye.» 40A ka a sago sa. Wo butɔ, Pɔlu sɔta boŋɛ yɛlɛdula kunma a ka jama masabari a bole la. Sabari banba to mata, a kumata anu ye Hebure kuma tɔ, a ko:
Actualmente seleccionado:
Kiilanu 21: MOG
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión