Kiilanu 12
12
Yaguba la faga nun Piyɛri sa koe geele tɔ
1Wo tɛmuɛ yati le, mansa Herodu fɔlɔta donu lasɔla anu tɔɔrɔ koe la dɛnkɛnɛyabaga jama tɛma. 2Wo butɔ, a ka Yaya nɛɛnɛdɔndɛ Yaguba#12:2 Isa ka Yaya nun Yaguba masubɛ anu ni ma a la talibenu la. Injila Isa Luki be min sɛbɛren, sora 5 haaya 10 faga faŋɛ la. 3A to ka a yen, wo diyata Yahudenu ye, a ka Piyɛri tugun bita dɛgɛ lɛbini bɔnɛ sali tɛmuɛ. 4A la a bitareŋɛ, a ka a sa geele tɔ. A ka a don sɔɔri kuruŋɛ naani bolo, kurun yo kurun sɔɔri naani, a ko anu ma, anu ni a kanta. A be a nataren a ni a makiiti jama ɲala, Hɔrɔya sale tini bɔɔ a la. 5Piyɛri to be balanden geele tɔ, dɛnkɛnɛyabaga jama tugun tota Ala mataranna a ye anu hanige bɛ la.
6A sɔgɔ be Herodu la a ni a makiiti sinan ɲɔgɔn. Bi sue, Piyɛri be kinnɔgɔla sɔɔri fila tɛma, a be kitiren jɔlɔnkɔn fila la. Kantarilanu tugun be sɔren geele bonda tɔ a kanta koe la. 7Awa, Marige la maleka do sɔta a kɛnna kisanna, nɔɔra ka geele butɔ lamalan. Maleka ka Piyɛri sɔngɔ magarin, a ka a lakunɛn, a ka a fɔ a ye: «Wuli teriya la!» Jɔlɔnkɔŋɛnu bɔɔta a bole tɔ kisanna, anu boeta. 8Maleka ka a fɔ a ye: «I tɛ kiti, i ni i la samatanu don.» A ka wo ma. Maleka ka a fɔ a ye tugun: «I la doroki banba wanɛ i ma, i ni n jokki.» 9Piyɛri bɔɔta, a ka maleka jokki. Maleka be min maren, Piyɛri ma a lɔn wo koe mu tɔɲa le la, a be maren a ye iko kiboe. 10Anu to tanbita kantarila fɔlɛnu la, anun a filaɲɔgɛ la, nɛgɛ bonda min be a ɲamatelenden saa ye, anu keta wo ma. A lakata anu ye a fan na, anu bɔɔta, anu tagata ɲatɔ donden kila kunma. Maleka bɔɔta a kunma ɲɔ kisanna.
11Piyɛri to ka hakkili sɔtɔ wo koe ma, a ka a fɔ: «N bata a lɔn kɔtɛ yati, Marige le bata a la maleka kii, a ni n bɔɔ Herodu bolo a mɛn ni n natanga Yahude jama sagona koe bɛ ma.» 12A to ka fahamu sɔtɔ, a tagata Mariyama la boŋɛ tɔ, Yaya Maraki nɛɛnɛ. Mɔgɔ siyama be madɛnden ɲɔ, anu be Ala mataranna. 13A to ka dondula bonda kɔnkɔn, jon muse do, min tɔgɔ Rode, wo tagata ɲɔ fɛlɛ. 14A to ka Piyɛri kumari kulɛ talɔn, a ɲagalinta han a tota a ma bonda laka, fɔ a borita donna le, a ka a fɔ aa Piyɛri be sɔren bonda tɔ. 15Anu ka a fɔ a ye: «I bata dakuya!» A ka anu lalaa, aa a be ɲɔgɔnna le, kɔnɔ anu ko: «Kɔnɔ a la maleka ma ba?» 16Han bi Piyɛri tota bonda makɔnkɔnna tun. A tɔɛ la, anu to ka bonda laka, anu ka a yen, anu kaabɛta han. 17Kɔnɔ a ka anu masabari a bole la, anu ni anu mɔdɛ. Marige ka a labɔɔ geele tɔ ki min na, a ka wo ɲatabɔ anu ye. A mɛn ko: «Wo ni kɛ koenu lasaagi Yaguba#12:17 Kɛ Yaguba mu Isa nɛɛnɛdɔndɛ le la. A nun Yaya nɛɛnɛdɔndɛ Yaguba dɔndɔ ma. nun nɛɛnɛdɔndɛ doenu ma.» Wo kɔma, a naata bɔɔ, a tagata dula do tɔ.
18Ɲɔ la kɛnɛreŋɛ, ɲatadoŋɛ banba tota sɔɔrenu tɛma, Piyɛri la sama koe la. 19Herodu ka a ɲini, kɔnɔ a ma a yen. Wo butɔ, a ka a kantalanu makiiti, a ka yamɔre sa anu bɛ ni faga. Wo kɔma, Herodu naata bɔɔ Juda, a jigita Sesare saa tɔ, a tota ɲɔ.
Mansa Herodu la faga
20Wo tɛmuɛ, Herodu be dumɛnden koola Tiiri kaanu nun Sidɔn kaanu ma. Wo butɔ, wonu tagata a dula hanigi dɔndɔ la, ka anu si kɛlɛ ban anu tɛma, bayi anu la jamanɛ balue be bɔɔla a la jamanɛ tɔ le. Wo butɔ, anu ka Bilasiti, Herodu la bon kuŋɛ ma anu jatige la. 21Anu bɛnta luŋɛ min ma, Herodu ka a makiti a la mansaya kutanu tɔ, a sigita a la mansa tintiŋɛ tɔ, a be kumala jama ye. 22Mɔgɛnu be sɔnkɛ layɛlɛla, anu ko: «Ala le kulɛ mu ka, mɔgɔ ma!» 23Herodu to ma Ala biliya, Marige la maleka do ka a botege kisanna, wo butɔ, tunbenu ka a dɔmɔ han a nɛ bɔɔta.
24Ala la kuma kan tota sɛnbɛ sɔtɔla tun, a tota yiriwala. 25Baranabasi nun Sɔlu to banta kiila lakela Darisalamu, anu saagita Antiyoki, anu ka Yaya Maraki tugun doni anu fɛ.
Actualmente seleccionado:
Kiilanu 12: MOG
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión