Maꞈtehˬ 25
25
Aˬ buˇ zaˬ guˬ tseˇ gʼaˬ gaˇ kawˆ yaw jeˬ ma jeˬ
1“Aˇ nah aˇ yamˬ kʼoeˇ yamˬ keuˆ le ngeh, Mˬtaˆ Miˇkʼahˬ-aˬ, heu loꞈ-ehˇ duˇ tehꞈ-a. Miˬ zaˬ sheuˬ le-eu kʼaˬ dzeˇ zaˬ-ahˇ ha laˬ leˇ-eu gʼaˇ duˬ, aˬ buˇ zaˬ guˬ tseˇ gʼaˬ yawˬ ha-euˬ tsiˇ kʼmˬ ciˬ-awˇ le-euˬ meh. 2Aˬ buˇ zaˬ guˬ kʼoeˇ deuˬ-aˬ, yaw laiꞈ ngaˬ gʼaˬ hawˇ-eu noeˬ dahˇ doe-eu ngaˬ gʼaˬ meh. 3Yaw laiꞈ kʼoeˇ ngaˬ gʼaˬ-aˬ, tsiˇ kʼmˬ ciˬ gʼeh-euˬ kʼawꞈ, tsiˇ aˇ dzehˬ maˬ yuˇ gʼeh-a. 4Noeˬ dahˇ doe-eu kʼoeˇ ngaˬ gʼaˬ-aˬ, tsiˇ kʼmˬ ciˬ gʼeh-awˇ, tsiˇ maˇ tsaꞈ kʼawꞈ ciˬ gʼeh-euˬ meh. 5Miˬ zaˬ sheuˬ le-eu kʼaˬ dzeˇ zaˬ kʼoeˇ gʼaˬ yaw kawˇ-ehˇ maˬ oe keuˆ-eu miˇ neh, aˬ buˇ zaˬ guˬ kʼoeˇ deuˬ yuꞈ yoeˇ ngeuˇ laˇ-awˇ, yuꞈ kʼaˆ-euˬ meh.
6“‘Miˬ zaˬ sheuˬ le-eu gʼaˬ oe keuˆ-euˬ meh. Ha laˬ laˇ-awˬ’ lehˇ guˇ doˆ laˇ ngeh, sehˇ gʼahˇ ceh laˇ-euˬ meh. 7Aˬ buˇ zaˬ guˬ kʼoeˇ tseˇ gʼaˬ noeˬ laˇ-awˇ, yawˬ ha-euˬ tsiˇ kʼmˬ yawˬ ha laˆ nyehˆ-euˬ meh. 8Yaw laiꞈ deuˬ noeˬ dahˇ doe-eu deuˬ-ahˇ ehˇ nehˬ-eu, ‘Nga maꞈ-ahˇ tsiˇ ui cuiˆ biꞈ laꞈ sheˇ. Nga maꞈ-euˬ tsiˇ kʼmˬ miˆ-iˇ shaw-iˬ meh.’ 9Noeˬ dahˇ doe-eu kʼoeˇ ngaˬ gʼaˬ ehˇ-eu, ‘Nga maꞈ gʼaˇ duˬ maˬ ngeuˇ naˇ maˬ loꞈ leˇ-eu paˬ. Tsiˇ ahˬ gaˇ iˇ-awˇ zeuˇ laˬ-iˇ-awˬ.’ 10Kʼoeˇ ngeh, aˬ buˇ zaˬ guˬ yaw laiꞈ kʼoeˇ deuˬ tsiˇ zeuˇ-eu lehˇ doˆ-iˇ-euˬ meh. Aˬ yawꞈ maꞈ iˇ dzeuˇ ngeh, miˬ zaˬ sheuˬ le-eu gʼaˬ oe keuˆ-euˬ meh. Lehˬ hmˬ dah taˬ-euˬ aˬ buˇ zaˬ guˬ kʼoeˇ ngaˬ gʼaˬ-aˬ, aˬ yawꞈ nehˬ-ehˇ oeˇ mˇ baˇ-eu bawˬ-iˬ gʼeh gaˇ uˇ leˇ-euˬ meh. Kʼoeˇ naˇ, laˇ gʼoˆ piˬ tehˬ-euˬ meh.
11“Kʼoeˇ ngeh, aˬ buˇ zaˬ guˬ yaw laiꞈ kʼoeˇ ngaˬ gʼaˬ gʼoꞈ keuˆ laˇ-awˇ guˇ-eu, ‘Sahˬpaˬ-oˇ, Sahˬpaˬ-oˇ, nga maꞈ-ahˇ laˇ gʼoˆ tiˬ poˆ pah nehˬ laꞈ sheˇ.’ 12Oeˇ mˇ baˇ le-euˬ gʼaˬ ehˇ kʼoꞈ nehˬ-eu, ‘Ngaˇ maˇ jawˆ ni ehˇ-eu ma. Naw maꞈ-ahˇ ngaˇ maˬ siˬ’
13“Tsawˇhaˬ-euˬ Zaˬmaˇ zaꞈ ka le-eu aˇ nah aˇ yamˬ naw maꞈ maˬ siˬ duˬ nya-eu miˇ neh, yaw beuˇ beuˇ-ehˇ dehꞈ-awˬ.
Zaˬ kʼaˆ smˇ gʼaˬ gaˇ kawˆ yaw jeˬ ma jeˬ
(Luˇkaꞈ 19.11-27)
14“Aˇ nah aˇ yamˬ kʼoeˇ yamˬ keuˆ le ngeh. Mˬtaˆ Miˇkʼahˬ-aˬ, heu loꞈ-ehˇ duˇ tehꞈ-a. Tsawˇ haˬ tiˬ gʼaˬ gaˇ ma doˆ-iˇ-eu lehˇ gʼeh-eu miˇ neh, aˬ yawꞈ-euˬ zaˬ kʼaˆ deuˬ-ahˇ kuˇ-awˇ, aˬ yawꞈ-euˬ pyuˇ shuiˇ myawˬ gahˬ deuˬ-ahˇ bi haw bi pyaˆ yaꞈ-euˬ meh. 15Yawˬ gʼaˬ na luꞈ-ahˇ, yawˬ ha-ahˇ kʼaˇ geuˇ-eu myaˆ ni a nehˬ yaꞈ-awˇ bi haw-euˬ meh. Tiˬ gʼaˬ-ahˇ-aˬ, shuiˇ maˇ byaˆ ngaˬ heˇ byaˆ, tiˬ gʼaˬ-ahˇ-aˬ, nyiˬ heˇ byaˆ, tiˬ gʼaˬ-ahˇ-aˬ, tiˬ heˇ byaˆ lehˇ a nehˬ yaꞈ-awˇ, gaˇ ma doˆ-iˇ-euˬ meh. 16Shuiˇ maˇ byaˆ ngaˬ heˇ byaˆ ha geuꞈ taˬ-euˬ gʼaˬ-aˬ, tiˬ poˆ tehꞈ-ehˇ jeˬ gaꞈ gaꞈ-iˇ-awˇ, ngaˬ heˇ byaˆ paˇ gaꞈ jeuˬ-euˬ meh. 17Kʼoeˇ loꞈ-ehˇ duˇ ni, nyiˬ heˇ byaˆ ha geuꞈ taˬ-euˬ gʼaˬ kʼawꞈ, nyiˬ heˇ byaˆ paˇ gaꞈ jeuˬ-euˬ meh. 18Ehˇ kʼawꞈ, tiˬ heˇ byaˆ ha geuꞈ taˬ-euˬ gʼaˬ-aˬ, miˇ tsaˬ-ahˇ duˬ kʼahˬ kʼahˬ-awˇ, aˬ yawꞈ-euˬ baw leˬ neh a nehˬ yaꞈ-euˬ shuiˇ maˇ byaˆ kʼoeˇ deuˬ duˬ pahˬ-awˇ bi jaˆ-euˬ meh.
19“Aˇ nah aˇ yamˬ myahˇ laˇ ngeh, zaˬ kʼaˆ kʼoeˇ deuˬ-euˬ baw leˬ gʼaˬ gʼoꞈ keuˆ laˇ-awˇ, zaˬ kʼaˆ kʼoeˇ deuˬ nehˬ-ehˇ pyuˇ sawˇ tsaˬ-euˬ meh. 20Shuiˇ maˇ byaˆ ngaˬ heˇ byaˆ ha geuꞈ taˬ-euˬ zaˬ kʼaˆ kʼoeˇ gʼaˬ-aˬ, jiˇ jeuˬ ngaˬ heˇ byaˆ jiˇ yuˇ laꞈ-awˇ, baw leˬ-ahˇ a nehˬ-awˇ ehˇ-eu, ‘Baw leˬ-oˇ, nawˇ ngaˬ-ahˇ shuiˇ maˇ byaˆ ngaˬ heˇ byaˆ biꞈ taˬ yaꞈ-euˬ meh. Haw sheˇ. Ngaˇ ngaˬ heˇ byaˆ paˇ gaꞈ jeuˬ taˬ-euˬ ma.’ 21Baw leˬ ehˇ-eu, ‘Saˇ jaˇ ziꞈ-eu muiˬ-eu zaˬ kʼaˆ-oˇ. Nawˇ gaˇ mˇ-euˬ muiˬ dui dui ngaˇ. Nawˇ gaˇ yaw nyiˇ mˇ-euˬ saˇ jaˇ ziꞈ-eu miˇ neh, nawˬ-ahˇ ngaˇ gaˇ yaw huiˬ bi mˇ ma. Nawˬ-euˬ baw leˬ nehˬ-ehˇ tiˬ kawˆ loꞈ-ehˇ laˬ kʼaˬ cehˇ laˇ-awˬ.’
22Kʼoeˇ naˇ, shuiˇ maˇ byaˆ nyiˬ heˇ byaˆ ha geuꞈ taˬ-euˬ zaˬ kʼaˆ kʼoeˇ gʼaˬ oe-awˇ, ‘Baw leˬ-oˇ, nawˇ ngaˬ-ahˇ shuiˇ mehˇ byaˆ nyiˬ heˇ byaˆ biꞈ taˬ yaꞈ-euˬ meh. Haw sheˇ. Ngaˇ nyiˬ heˇ byaˆ paˇ gaꞈ jeuˬ taˬ-euˬ ma.’ 23Baw leˬ ehˇ-eu, ‘Saˇ jaˇ ziꞈ-eu, muiˬ-eu zaˬ kʼaˆ-oˇ. Nawˇ gaˇ mˇ-euˬ muiˬ dui dui ngaˇ. Nawˇ gaˇ yaw nyiˇ mˇ-euˬ saˇ jaˇ ziꞈ-eu miˇ neh, nawˬ-ahˇ ngaˇ gaˇ yaw huiˬ bi mˇ ma. Nawˬ-euˬ baw leˬ nehˬ-ehˇ tiˬ kawˆ loꞈ-ehˇ laˬ kʼaˬ cehˇ laˇ-awˬ.’
24“Kʼoeˇ naˇ, shuiˇ maˇ byaˆ tiˬ heˇ byaˆ ha geuꞈ taˬ-euˬ zaˬ kʼaˆ kʼoeˇ gʼaˬ oe-awˇ ehˇ-eu, ‘Baw leˬ-oˇ, nawˇ yaw yaꞈ meh lehˇ ngaˇ siˬ nya ma. Nawˬ neh maˬ ka-euˬ gaˇ nawˇ yehˬ dzaˬ-awˇ, nawˬ neh maˬ baw shawˇ-euˬ cehˇ-ahˇ nawˇ tawˆ geuꞈ-eu meh. 25Nawˬ-ahˇ ngaˇ guˆ-eu miˇ neh, nawˬ-euˬ pyuˇ miˇ tsaˬ-ahˇ duˬ pahˬ taˬ-euˬ ma. Hehˬ. Nawˬ-euˬ myawˬ nawˇ yuˇ kʼoꞈ-awˬ.’
26“Baw leˬ gʼaˬ ehˇ-eu, ‘Haiˬ dui dui-awˇ yaw doeˇ doeˇ dui dui-eu zaˬ kʼaˆ-oˇ, ngaˬ neh maˬ ka-euˬ gaˇ ngaˇ yehˬ dzaˬ-awˇ, ngaˬ neh maˬ baw shawˇ-euˬ cehˇ-ahˇ ngaˇ tawˆ geuꞈ-eu nawˇ siˬ duˬ-eu nga laˬ. 27Toˆ-ehˇ ngeuˇ-eu jeˬ maˇ-iˬ, ngaˬ-euˬ pyuˇ teu deuˬ yuˇ-awˇ, pyuˇ cehˇ jiˇ laꞈ kʼoeˇ nawˇ dawˆ ahˇ-iˇ law nmˇ-aˬ, ngaˇ gʼoꞈ keuˆ laˇ ngeh, ngaˬ-euˬ pyuˇ uˬ taꞈ jiˇ jeuˬ kʼawꞈ za kʼoꞈ tehꞈ-a. 28Tsawˇ haˬ teu gʼaˬ jawˇ gaˇ jaˆ-eu pyuˇ teu deuˬ yuˇ-awˇ, tiˬ muiˇ byaˆ ahˇ-eu gʼaˬ-ahˇ biꞈ-awˬ. 29Aˬ jeˬ miˇ neh ehˇ naˇ, jaˆ-eu tsawˇ haˬ-ahˇ paˇ biꞈ lahˬ nehˬ-awˇ, paˇ bi jaˆ dzehˬ laˇ tehꞈ-a. Maˬ jaˆ-eu tsawˇ haˬ-aˬ, maˬ jaˆ kʼaˇ jaˆ-eu dawˬ tawˆ luꞈ bi yuˇ jiˇ tehꞈ-a. 30Gaˇ dahˇ maˬ tsoeˬ-eu zaˬ kʼaˆ heu gʼaˬ-ahˇ-aˬ, laꞈ nyiˇ paw zahˇ tsui ni gʼeh gaˇ baꞈ dzeh-awˬ. Kʼoeˇ gaˇ, aˬ yawꞈ ngoeˇ ngoeˇ-ehˇ seuˬ teuꞈ teuꞈ-ehˇ shaˬ luꞈ-uˇ.’
Aˇ saˬ saˬ ngeh yaˇ kʼaˬ daˇ-eu
31“Tsawˇhaˬ-euˬ Zaˬmaˇ mˬ taˆ gʼaˬ kʼehˇ deuˬ sheuˬ-awˇ, Sahˬ paˬ loꞈ-ehˇ zaꞈ le ngeh, aˬ yawꞈ-euˬ dzoeˬ dzaˬ nuiˇ mahˬ kʼoeˇ taˆ nuiˇ le tehꞈ-a. 32Miˇ tsaˬ tsawˇ jeuˬ tsawˇ ca dawˬ tawˆ luꞈ aˬ yawꞈ-euˬ mehˬ shi uiˬ laˇ tehꞈ-a. Yawˇ bo-eu tsawˇ haˬ yawˇ hawˇ-eu ciꞈ myehꞈ biˇ paˆ-eu loꞈ-ehˇ, tsawˇ haˬ kʼoeˇ deuˬ-ahˇ aˬ yawꞈ nyiˬ muˇ biˇ paˆ tehꞈ-a. 33Yaw tsaˬ yaw dawˇ tsawˇ haˬ deuˬ-ahˇ aˬ yawꞈ-euˬ aˇ maˇ paw bi jawˇ-awˇ, maˬ tsaˬ maˬ dawˇ-eu tsawˇ haˬ deuˬ-ahˇ aˬ yawꞈ-euˬ aˇ caˇ paw bi jawˇ tehꞈ-a. 34Kʼoeˇ naˇ, aˬ yawꞈ-euˬ aˇ maˇ paw jawˇ-eu tsawˇ haˬ deuˬ-ahˇ Sahˬ paˬ heu loꞈ-ehˇ ehˇ nehˬ tehꞈ-a. ‘Ngaˬ Da neh guiˬ lahˬ biꞈ taˬ-euˬ tsawˇ haˬ deuˬ-oˇ, laˇ-awˬ. Mˬ beh miˇ beh ngeh neh naw maꞈ gʼaˇ duˬ lehˬ hmˬ taˬ-euˬ miˇ kʼahˬ-ahˇ jawˇ laˇ-awˬ. 35Ngaˇ hawˬ mehꞈ ngeh naw maꞈ bi dzaˬ laꞈ-awˇ, ngaˇ iˇ cuꞈ mehꞈ ngeh naw maꞈ bi dawˇ laꞈ-euˬ meh. Ngaˇ daˬ yah pyeuꞈ ngeh naw maꞈ ha nehˬ laꞈ-euˬ meh. 36Ngaˇ mehˬ tsoeˬ maˬ ahˇ ngeh, naw maꞈ bi dm laꞈ-euˬ meh. Ngaˇ jawˇ saˇ maˬ doˆ ngeh, naw maꞈ bo saˆ laꞈ-euˬ meh. Ngaˇ paꞈ kuˆ-ahˇ uˇ ngeh, naw maꞈ haw le-euˬ meh.’
37“Kʼoeˇ ngeh, yaw tsaˬ yaw dawˇ tsawˇ haˬ kʼoeˇ deuˬ aˬ yawꞈ-ahˇ heu loꞈ-ehˇ ehˇ nehˬ tehꞈ-a. ‘Sahˬ paˬ-oˇ, nawˇ hawˬ mehꞈ ngeh nga maꞈ mawˇ-awˇ bi dzaˬ-euˬ aˬ myah jaˆ ta. Nawˇ iˇ cuꞈ mehꞈ ngeh nga maꞈ mawˇ-awˇ bi dawˇ-euˬ aˬ myah jaˆ ta. 38Nawˇ daˬ yah loꞈ-ehˇ cah luꞈ gaˇ nga maꞈ mawˇ-awˇ, iˇ kahˇ laꞈ kʼoeˇ ha ahˇ-euˬ aˬ myah jaˆ ta. Nawˇ mehˬ tsoeˬ maˬ ahˇ-eu nga maꞈ mawˇ-awˇ, mehˬ tsoeˬ bi dm-euˬ aˬ myah jaˆ ta. 39Nawˇ naˇ gaˇ maˬ ehˇ, paꞈ kuˆ-ahˇ uˇ gaˇ maˬ ehˇ, nga maꞈ mawˇ-awˇ haw le-euˬ aˬ myah jaˆ ta.’ 40Kʼoeˇ ngeh, aˬ yawꞈ maꞈ-ahˇ Sahˬ paˬ heu loꞈ-ehˇ ehˇ nehˬ tehꞈ-a. ‘Ngaˬ-euˬ aˬ yuiꞈ aˬ nyiˇ heu deuˬ laꞈ kʼoeˇ, aˬ cawˬ naˆ maˬ tseˇ nyiˇ teˬ-eu gʼaˬ-ahˇ naw maꞈ neh ngehˬ gʼeh nehˬ-euˬ jeˬ-aˬ, ngaˬ-ahˇ ngehˬ gʼeh nehˬ laꞈ gaˇ duˇ-eu meh lehˇ, ngaˇ naw maꞈ-ahˇ maˇ jawˆ ni ehˇ-eu ma.’
41“Kʼoeˇ naˇ, Sahˬ paˬ-euˬ aˇ caˇ paw jawˇ-eu tsawˇ haˬ deuˬ-ahˇ, Sahˬ paˬ heu loꞈ-ehˇ ehˇ nehˬ tehꞈ-a. ‘Miˬyehˇ neh yaˬ kʼehˇ bi yaˬ-euˬ tsawˇ haˬ deuˬ-oˇ, ngaˇ jawˇ gaˇ neh doˆ-iˇ-awˇ, Nehꞈ sahˬ paˬ hawˇ-eu aˬ yawꞈ-euˬ mˬ taˆ gʼaˬ kʼehˇ deuˬ gʼaˇ duˬ lehˬ hmˬ taˬ-euˬ, mˬ maˬ maˬ byaˆ zaˇ ziˇ doꞈ luꞈ-eu miˬ dzaˬ laꞈ kʼoeˇ uˇ-iˇ-awˬ. 42Ngaˇ hawˬ mehꞈ ngeh, naw maꞈ maˬ bi dzaˬ laꞈ-aˬ. Ngaˇ iˇ cuꞈ mehꞈ ngeh, naw maꞈ maˬ bi dawˇ laꞈ-aˬ. 43Ngaˇ daˬ yah pyeuꞈ ngeh, naw maꞈ maˬ ha nehˬ laꞈ-aˬ. Ngaˇ mehˬ tsoeˬ maˬ ahˇ ngeh, naw maꞈ maˬ bi dm laꞈ-aˬ. Ngaˇ jawˇ saˇ maˬ doˆ ngeh maˬ ehˇ, paꞈ kuˆ-ahˇ uˇ ngeh maˬ ehˇ, naw maꞈ maˬ haw le-aˬ.’
44Kʼoeˇ ngeh, aˬ yawꞈ maꞈ aˬ yawꞈ-ahˇ heu loꞈ-ehˇ ehˇ tehꞈ-a. ‘Sahˬ paˬ-oˇ, hawˬ mehꞈ-eu, iˇ cuꞈ mehꞈ-eu, daˬ yah pyeuꞈ-eu, mehˬ tsoeˬ maˬ ahˇ-eu, jawˇ saˇ maˬ doˆ-eu, paꞈ kuˆ-ahˇ uˇ-eu, heu loꞈ-ehˇ gʼeh-eu deuˬ-ahˇ nawˇ ya daˬ luꞈ gaˇ nga maꞈ mawˇ-awˇ, nawˬ-ahˇ maˬ caw ba ni byehˇ-euˬ aˬ myah jaˆ ta.’ 45“Sahˬ paˬ ehˇ-eu, ‘Ngaˇ naw maꞈ-ahˇ ehˇ nehˬ nyaˇ. Tsawˇ haˬ heu deuˬ laꞈ kʼoeˇ aˬ cawˬ naˆ maˬ tseˇ nyiˇ teˬ-eu gʼaˬ-ahˇ naw maꞈ ngehˬ maˬ gʼeh nehˬ ni byehˇ naˇ, ngaˬ-ahˇ ngehˬ maˬ gʼeh nehˬ laꞈ gaˇ duˇ-eu meh.’ 46Aˬ yawꞈ maꞈ-aˬ, mˬ maˬ maˬ byaˆ zaˇ ziˇ kʼehˬ-eu kʼaˆ-eu jeˬ-ahˇ ya daˬ-awˇ, yaw tsaˬ yaw dawˇ tsawˇ haˬ deuˬ-aˬ, mˬ maˬ maˬ byaˆ zaˇ ziˇ dehꞈ-eu jeˬ za tehꞈ-a.”
Actualmente seleccionado:
Maꞈtehˬ 25: AHK
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
Akha Bible Revision (Latin Script) © Thailand Bible Society, 2011.