Creenaght Solomon 3
3
CAB. III.
1Agh ta anmeenyn y vooinjer chairal ayns laue Yee, as cha jean guinn y vaaish bentyn roo.
2Er-lesh ny mee-cheeayllee dy row ad geddyn baase: as dy row ad paartail gys seaghyn.
3As nyn immeeaght dy ve slane toyrt-mow: agh t’adsyn ayns shee.
4Son ga dy vel ad seaghnit fenish deiney: foast t’ad ayns slane treishteil yn vaynrys veayn.
5As lurg nyn seaghyn giare bee ad dy mooar er ny chooilleeney: son ta Jee er phrowal, as er gheddyn ad dy ve feeu jeh hene.
6Myr airh ayns y choirrey t’eh er phrowal ad, as er ghoaill roo myr slane oural taitnyssagh.
7Agh ayns laa nyn mriwnys nee ad soilshean: as roie noon as noal myr smayllyn mastey’n stubbyl.
8Nee ad briwnys ny ashoonyn, as bee oc ream harrish y pobble, as nee yn Chiarn oc reill er son dy bragh.
9Nee e hreishteilee toiggal yn ynrickys: as nee adsyn ta firrinagh ayns graih tannaghtyn mârish: son ta grayse as myghin cour e nooghyn, as jeh e chloan reiht t’eh goaill ard-chiarail.
10Agh bee ny mee-chrauee er nyn gerraghey ’syn ardalys oc hene, ta er hoiaghey beg jeh deiney mie, as er hreigeil y Chiarn.
11Son quoi-erbee ta soiaghey beg jeh creenaght as ynsaghey, t’eh ny vouran: as ta nyn dreishteil ayns fardail, nyn laboraght neu-vessoil, as nyn obbraghyn neu-vondeishagh.
12Ta ny mraane oc mee-cheeayllagh, as nyn gloan er drogh-ynsagh.
13Ta’n sluight oc fo mollaght: shen-y-fa bannit ta’n ven ghennish, nagh vel er n’yannoo peccah, nagh vel er n’eiyrt er maarderys: bee sluight eck ayns briwnys ny anmeenyn.
14As bannit ta’n dooinney gennish nagh vel lesh e laueyn er n’eiyrt da mee-chairys, ny ayns drogh smooinaghtyn noi Jee: son dasyn vees er ny choyrt yn ard-yioot dy chredjue, as cronney ayns chiamble y Chiarn, ny s’ennoil gys e aigney.
15Son s’gloyroil ta’n mess dy obbraghyn mie! as cha jean y fraue dy chreenaght dy bragh failleil.
16Er son cloan ny maarderee cha bee oc dy yannoo ayns oikyn casherick: as bee sluight yn lhiabbee foalsey er ny astyrt ass ny fraueyn.
17Son ga dy vel nyn mea beayn, cha bee veg y scansh soit jeu, as bee ad eer gys nyn shenn eash fegooish ooashley.
18As my vees ad giare-heihltagh, t’ad gyn treishteil, as fegooish gerjagh ayns laa ny briwnys.
19Son s’atchimagh ta jerrey yn cheeloghe vee-chrauee!
Actualmente seleccionado:
Creenaght Solomon 3: YNAP
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Society for Promoting Christian Knowledge (SPCK) under licence to the British and Foreign Bible Society (BFBS) 2017