Debtere ba'ad waa ba'ad voo nɔ 20
20
Laalı̵́ Pól woo hág Masedo̧wá̧nné kan Gɛrɛ́ggı̵́
1Sey moo gbo̧o̧ kaa yȩlȩ́ ka 'wáa sú̵'ú̵ máa, Pól su̵g waa duulí Yesu woo vu̵, zigid vu̵ zó̧ó̧, vu̵ vá'án, ma Pól daa laa hág Masedo̧wá̧nné. 2Ya̧a̧ duu la hág yȩlȩ́; zigid nán kirtȩ́n vu̵ zó̧ó̧ duu wu̵lı̵́, kan moo moolȩ́ ɓu̵u̵lı̵́ na'a; ma daa laa hág Gɛrɛ́ggı̵́. 3La səə wu̵lı̵́ sȩȩ ta̧a̧nɔ́.
Ka hí̧í̧ bi dɔ́ nɛ́ŋ́ laa hág Siiríilí máa, ki nán Yúúda vu̵n ta ya̧g ɓı̵́d yúú biilí, ma duu o̧ ba bíń vȩ́' duu hág Masedo̧wá̧nné. 4Nán tóó vu̵ ba"u̵. Nán sú̵u̵ vu̵u̵ yɛ nɔ: Sopatée Piirú waa (ká waa kaa Beeréeɨ), vu̵ kan Aristáar kan Sɛkúndu (ká vu̵ waa Tesaloníi vu̵ yu̵), kan Gayús (ká waa Dɛ́rbəɨ), kan Timɔtée, kan Tisíg kan Trofím (ká vu̵ waa hág Aazíi vu̵ yu̵) á̧ḿ. 5Nán yȩ vu̵ ɓə́ə́ la laa vɔ́ kaa Trowáddı̵́.
6 Zá̧ga̧ mam vúnní 'yɛ́ wág sá ka ya̧a̧ sú̵'ú̵ máa, vɔ́ dɔ́ nɛ́ŋ́ kaa Filíbbí.
Bá' nɔ́nɔ́ ka ya̧a̧ máa, vɔ́ la maa vu̵ kaa Trowáddı̵́, vɔ́ səə wu̵lı̵́ alad dágá.
Sí̧'í̧d 'yȩ́m Pól woo kaa Trowáddı̵́
7Mɛn asawəlı̵́ máa, vɔ́ sú̵g moo hȩn lálı̵́ Tayɨɨ ɓɛlı̵́, ma Pól baa mbad vu̵ moo há̧á̧ ya̧ vid sa̧a̧m, moo ya̧g ka̧'a̧m woo tée, wú̵ń lúú sú̵'ú̵. 8Ká vɔ́ dɨ kan lám vu̵ ɓu̵u̵lı̵́ na'a, lig ı̵́ yúba kóó sú̵g wu̵lı̵́ yȩlȩ́. 9Náásaa tóó yéé woo Ɛtikís, ɗáá mbaa ya̧g fȩnɛ́ɛtərlı̵́, nə la mgbad, moo Pól ka mba moo ɗii na'a má nɔ.
Nəm ka mbaga kɛb máa, wá̧á̧ pu̧u̧ pɛ zu̵u̵ hágá lig ı̵́ yúba ku̵u̵ yo̧o̧ ha'an dɔg ta̧a̧nɔ́ peelı̵́. Nán vu̵ luuwu̵ dɔg, a̧máa nɔɔ ma.
10Pól ka ho̧ máa, sí zu̵u̵, nə'əy zu̵u̵ yúú woolı̵́, ma"o̧ dɔg nagá, o̧: “I gbɔ́ dam sá. Mbaa zá̧a̧dɨ.”
11Ma Pól duu ɗáá dɔg, yɨ nan, lá, duu moo moo fáá, há̧á̧ zá̧ga̧ ye' wu̵lı̵́, ma daa vúd lúú. 12Nán vu̵ daa pa̧ŋ ya náásaa pee zá̧a̧dná. Hȩn woo sȩn nánán vu̵ fó̧ó̧ 'waapád.
Pól vu̵ lúú kaa Trowáddı̵́, vu̵ daa laa kaa Miléelı̵́
13Vɔ́ ɓə́ə́ vóó tíŋ́, moo bi la dɔ́ nɛ́ŋ́ ı̵́ ka dɨ vɔ́ gané laan kaa Asósdı̵́ má nɔ. Vɔ́ bi la laa Pól ya̧g mammé, moo Pól hí̧í̧ bi 'yȩm zu̵u̵ kan dooɨ.
14Kóó ya̧ kaa Asósdı̵́ máa, vɔ́ ɓɛgɛ ya̧g mammé wu̵lı̵́, vɔ́ daa laa kaa Mitilɛ́nné.
15Ya̧g ka̧'a̧m woo máa, vɔ́ duu lúú wu̵lı̵́, vɔ́ ya̧ tíŋ́ mam bam Kióolı̵́.
Ya̧g ka̧'a̧m tóó máa, vɔ́ duu laa la ya̧ mam bam Samɔ́sdı̵́.
Ya̧g ka̧'a̧m tóó ka duu tú máa, vɔ́ duu lúú la ya̧ kaa Miléelı̵́. 16Pól hí̧í̧ bi duun kaa gbaŋ Ɛfɛ́ɛzlı̵́ né, moo bá' ba kan ɓu̵u̵d bi hág Aazíilí. Ha fó̧ó̧, moo bi ya̧ la Yerúsalemmé pȩ́ń, mam vúnní Páŋ́tékósta ba a ya̧.
Pól mbad ı̵́ nii sú̵ggı̵́ kaa gbaŋ Ɛfɛ́ɛzlı̵́ vu̵ moo
17Pól ɓɛ nán tóó vu̵ kaa Miléelı̵́, ba' vu̵ la kaa gbaŋ Ɛfɛ́ɛzlı̵́, moo u̵u̵ beed bi ı̵́ nii sú̵ggı̵́ vu̵ yu̵.
18Sey ı̵́ nii pee ku̵u̵ ya̧ ya máa, Pól o̧d vu̵: “Ví gaa mbaalı̵́ míí diga sey káń dəŋ dɔ́ ya hág Aazíilí yɛlı̵́ máa 'waapád. 19Mí baa nə' yúú kɔ́n ı̵́ 'yɛ́lı̵́ ba'ad wu̵lı̵́ kan mɛmɛ́ḿ, moo nán Yúúda vu̵ táń ya̧g ɓı̵́d yúú míílí̧. 20Ví gaa mí yu̵gu̵n ví hȩn tóó a du̵u̵n ví máa né. Mí tú'ud ví hȩn 'waapád, mí vud o̧d ví la zo"ı̵́, kan kíi víí vu̵lı̵́ á̧ḿ. 21Mí bee nán Yúúda vu̵ kan nán ı̵́ ku̵u̵ Yúúda pɛ́lı̵́ máa vu̵, moo u̵u̵ tii zó̧ó̧ duu Tayɨɨ, u̵u̵ 'yɛ́ zó̧ó̧ voo ı̵́ 'yɛ́lı̵́ baa ví Yesu woolı̵́ á̧ḿ. 22A̧máa 'ya̧'a̧ yɛ máa, yigid Tayɨɨ woo ndaa laan mí Yerúsalemmé yɔ. Mí gaan hȩn a kɔ́n mí wu̵lı̵́ máa né. 23A̧máa kaa káń laa wu̵lı̵́ 'waapád, yigid Tayɨɨ woo baa o̧n ba míń dɔ́ púúsina, ba míń nuŋ kan hȩn ndɔ́gɔné Yerúsalemmé á̧ḿ. 24A̧máa ı̵́ míí, mí ho̧n mbaalı̵́ míí hágá yɛlı̵́ kɔ́ ı̵́ hȩn gbo̧o̧ tóó wɔgɔ né á̧ḿ. Séý mí hí̧í̧ bi kɔ́ ba'ad ı̵́ 'yɛ́lı̵́ míí Yesu ka gbɔn nagá yɛ 'waa pȩ́ń. Míń pa moo to̧o̧ 'maŋ ı̵́ zó̧ó̧ nán Tayɨɨ woo yɛ nɔ.
25“Mí pa moo gbaŋ waalı̵́ Tayɨɨ woo kə̧́ə̧́ daa sa̧a̧m víílí 'waapád, a̧máa 'ya̧'a̧ yɛ mí gaa víń duu ho̧n mí sı̵́ né. 26Moo woo nɔ, mí vud moo o̧d ví sı̵́ ɓəə yɔ. Tow nán tóó a ti sa̧a̧m víílí tée, míi tinnɔ né, 27moo mí tú'ud ví hȩn Tayɨɨ ka hí̧í̧ bi kɔ́ máa 'waapád sú̵'ú̵. Mí yu̵gu̵n ví hȩn tóó né sá̧ḿ. 28I tu̵ hú' máa yigid Tayɨɨ woo ka gbɔd ví tu̵lı̵́ yȩ ó̧. I tu̵ fó̧ó̧ víí vu̵ á̧ḿ. I tu̵ nán sú̵ggı̵́ Tayɨɨ woo ka hɨ kan mɛm waa woo Yesu yȩ vu̵ ú̵. 29Mí gaa ú̵, pig lúúlí míílí̧ tée, nán ku̵u̵ man kan zág ya̧'a̧d vu̵ yȩ vú̵ń yaa víílí dɨlı̵́, moo bi á̧ hú' mbee yȩ vu̵ ú̵. 30Kóó sa̧a̧m víí yɛlı̵́ si̧', nán tóó vú̵ń lúú moo moo vbád, moo nán sú̵ggı̵́ tóó u̵u̵ duu bi ú. 31Tée i nə sá, i taa ve' ta̧a̧nɔ́ wu̵ yɛ nɔ, vid kan zá̧ga̧ á̧ḿ, mí gbɔn ví moo tú"í kan mɛmɛ́ḿ nɔ́lȩ́ né á̧ḿ. 32A̧máa 'ya̧'a̧ yɛ mí gbɔ ví nag Tayɨɨ woolı̵́, kan moo zó̧ó̧ nán woo yȩ. Wú̵ńnɔ sȩn ví fó̧ó̧, wú̵ń pú̵ ví hȩn ka 'yɛ́d nán woo vu̵ kɔ́ ı̵́ hȩn gaga wɔgɔ yȩ á̧ḿ. 33Mí hí̧i̧n sɨɨde nán tóó woolı̵́ wu̵ nuní ní, kóó hȩn nagá woo tóó, kóó sa̧a̧m woo. 34Aga ví gaa á̧ḿ, mí kɔ́ ba'ad kan nag dáń míí yɛ, ma vɔ́ nuŋ hȩn kan dan ı̵́ 'yȩ́m vu̵ wu̵lı̵́. 35Mí tú'ud ví hȩn yȩ vu̵ 'waapád, moo i kɔ́ duu wu̵lı̵́, moo i pú̵ nán gíḿ vu̵ hȩn wu̵lı̵́ á̧ḿ. Ba taa ví moo ı̵́ 'yɛ́lı̵́ Yesu ka moo kan fó̧ó̧ woo yɛ nɔ: ‘Hȩn kaa pú̵ máa, wu̵ dȩ' ba zó̧ó̧ mba ı̵́ ku̵u̵ pú̵ ba máa.’ ”
36Pól ka moo moo yȩ 'waa máa, ya voo 'waapád vu̵ gu doo núug hágá, vu̵ o̧d Tayɨɨ moo. 37Vu̵ ká̧ŋ́ ya voo 'waapád, vu̵ ka Pól pi̧i̧ ya zó̧ó̧lȩ́, vu̵ vá"u̵ kan hȩn hu̧u̧lí̧. 38Zó̧ó̧ ví̧i̧ vu̵ moo Pól ba o̧d vu̵ ba vú̵ń duu ho̧n bi sı̵́ né má nɔ, ma vu̵ ba"u̵ la dii ya̧g nɛ́ŋ́ŋı̵́.
Actualmente seleccionado:
Debtere ba'ad waa ba'ad voo nɔ 20: DIINT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Nouveau Testament en Dii © Bible Society of Cameroon, 2001.