ROMMA 3
3
1Dlara ɦuɗ sana fok a nam sa ma Juifna ka su? Caw ɗiwra jiviɗ ni ana mege? 2U ŋgara ŋgolla ay ni eg suu Juifna kay nam ɦasi boy mamma ay fok jewe. 3Lini suu hiŋŋa bay viya, bay vi ndaɗta hin ɓeŋ ɗegee Lonara ki su? 4Ni ka naɗi, ni kay Lona tak gasi mamba, lini suuna halaŋŋi suu kaboyna lay ko ɓiira dira naa,
«Dlaaŋga tak ki kaŋ ɗegee
ko aŋ dira na may,
lini tuɗuŋ fun ɓakŋa wa ni
boy maŋŋa hin li jivi may.»
5Lini cora aygi laɗta tak ana Lona ɗegeera ni aygi hin di ni ana mege? Lona lini co kay nam gaygi daŋgayna su? An ɓak na ni u saara vi suuna. 6Ni ka naɗi, Lona lini coo ni nam hin kaɓakŋa kay suuna su?
7Lini kaboy manna tak ki gasira vi Lona ɗegee a geleɗem lay ni, ɓakŋa hin ka kan ko sa ma cona na ni kay mege? 8Ni aygi di ana, «Laygi cora kay nam hin laygi jivira suwa,» naɗi kay mi ologe? Suu ɦiw di cora kamiya, kaami boyna kami kay boyna ko wanni na, suu asina ɓakŋa hin mba ka kasiya.
Sa ma ɗegee kaɗi
9Aygi suu Juifna dlaaygi ŋgol su suu hiŋŋa su? Ka dewɗi. An di ki wa daa, ana suu Juifna u njaf suu hiŋŋa fun tasi hu cora dew.
10Ɓiira di ki ana,
«Sa ma ɗegee kaɗi dew lay kaɗi.
11Sa ma hum ka dewɗi,
ma hal Lona kaɗi lay.
12Suuna halaŋ viɗ ki eg Lona day,
asi halaŋ ba ki wa,
sa ma li jivira kaɗi, dew lay kaɗi.
13Delesi ni ko zulla pi maɗna
ki malira na,
sinisi ɓakŋi dlara ganyamba,
boy ma kal ay ki funusina ni
ko ŋgis guygina na.
14Vunusi oy u boy co
ma gala ma ba sana kina.
15Asi liŋ saɓak kay a ci sa kiyo.
16Lii asi kal huna ni ɓalakka
u yoora hin ka huwa.
17Asi ka wi voɗta vi heɓpaɗi.
18Asi ka li ndaa u Lona ndeɗi lay.»
19Aygi wi ana dlara gaɗta daɗta dini maŋ suu li uɗna, vun sa ka mal a di boy ma puruɗ tam kiɗi, kay a suuna halaŋ ɓakŋa vi Lona mba tok kasiya. 20Sa ma li u va ma gaɗta damma ana nam ɗegee fok Lona ni kaɗi. Gaɗta tak ki ni cora vi sana.
Lona suɗ sana ni nanage
21Cecemi Lona takay voɗta nam mbuɗuygi ki ɗegee fokomba, ni bay gaɗta diya. Gaɗta u suu jok vun Lona di anaba, 22Lona min mbuɗ suuna ɗegee u hurusi ma tini kay Yesu Kristuna, nam lini kay suu tin hurusi kay Kristuna halaŋ, nam ka ɓorow ii suunaɗi. 23Suuna halaŋ li cora wa, ka ndaki kay a fi ŋgolla fok Lonaraɗi. 24Lona u jivi mamba mbuɗ suuna ki ɗegee ɦawa ni u Goromma Yesu Kristu ma buɗusi kina. 25Lona li ɓivunna ki u namu, u miɗ mamma Yesu yow cora vi suu vi umma kiyo, Lona li takka ki a wi ana nam ɗegee u jewra nam ɗil irim kay cora vi suuna. 26Cemi wanda nam tak dlara nam mbuɗ suuna ɗegeera nam min a mbuɗ suu tin hurusi kay Yesuna ki ɗegee may.
27Ni dlara sa hin a ŋga tam kaɗ daŋ olo su? Ka naɗi, ni kay mege? Kay nam hum u gaɗta, ni ka naɗi, ni kay mege? Kay nam tin hurumu. 28Ay wi ana sana mbuɗ ɗegee fok Lona ni kay nam tin hurumu, ka kay nam vi u gaɗtaraɗi. 29Na ni Lona ni Lo vi suu Juifna dew su? Nammi ka Lona vi njaf suu daŋŋa layɗi su? Nammi Lona vi njaf suu daŋŋa lay. 30Kay mege Lona nam dew daŋ, nam mbuɗ suu Juifna ɗegee ni u viisira, hin mbuɗ njaf suu daŋŋa ɗegee ni u viisira lay. 31Lini na ni aygi mbuɗ gaɗta ki maŋi u vira wa su? Ni ka naɗi, aygi haɗni saɓakŋa na ɗow.
Actualmente seleccionado:
ROMMA 3: BMS
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Bible Moussey © Bible Society of Chad, 2002.