MARK 14
14
Mulina gi gagara kay Yesu
(Matiye 26.1-5; Luk 22.1-2; Jaŋ 11.45-53)
1Luu ma asi ti fu ma bay kuffa umma, yam ana Pakŋa hin buuna mba' a lira. muli suu li ɓivunna u suu wi magaara hal yalna a vi Yesu u mbeleŋŋa, a cam kiyo. 2Asi di vun tasi ana, «Vam u luuna a suuna mun yaraɗi.»
Cara vo mbul ma hisna kay Yesu
(Matiye 26.6-13; Jaŋ 12.1-8)
3Yesu ka hu Betani wanni, nam kak vi sa liɓina, yam ana Simon. Nam kakira a ti funa, cara kal ay um u mbul ma hisna koɗ hu koloɓona. Mbul namma jiviya, gus way ɦay. Ndaɗ malam vunum ki mal ni, yamam ki kay Yesu. 4Suu dukusi ɦiw ni hurusi ɓeŋ ki egeɗ ana, «Ndaɗ ɓeŋ mbul namma kina ni kay mege? 5Nam a gus ki ni su gursu ma kis kis hindina ɗowɗi su? Ɓorowom gin maŋ suu hahawraɗi su?» Asi gurni u ca ndaɗta coco ɦay. 6Yesu dasi ana, «Hinigira na en! Agi ɦeɓeɗ ni kay mege? Dlara ndaɗ landa egenda ni jiviɗi su? 7Suu hawra ka ni egegi tew tew. Falira hurugi a lasi jivira, agi hin lasira. Ko an na ni ka li egegi gak gakgi. 8Ndaɗ li ni va ma saɓakaɗ ndak a lamma. Ndaɗ yaman mbulna kan ni, minin ni maɗan a panda gawɗi su? 9An dagi ni gasagi, falira Boy ma Ayra di ki hu duliyara halaŋ wani, suuna humusi hin gasi kay dlara ca ndaɗta landa egenda.»
Yudas min a ɦal Yesu ki maŋ muli suu li ɓivunna
(Matiye 26.14-16; Luk 22.3-6)
10Sa maa dew duk suu doogo yam mbana yam ana Yudas Iskariyot nam tuɗ eg muli suu li ɓivunna ana nam hin ɦasi Yesu kiyo. 11Asi humum vunum na ni, hurusi furi ɦay ana, asi hin ɦam gursura. Nam Yudas hal li ma jivi ma ɦasina kina.
Yesu ti mappa Pakŋa u suu haɗi mamma
(Matiye 26.17-25; Luk 22.7-14,21-23; Jaŋ 13.21-30)
12Hu buu ma jew ma luu ma asi ti fu ma bay kuffa, ni buu ma asi ŋgaɗ gor timigiina kay luu Pakŋa huna, suu haɗina joɓ Yesu ana, «Aŋ min ana ami yaŋ mappa ma Pakŋa ni arage?» 13Yesu cuk suu haɗina mba' dasi ana, «Tuɗugi hu zi ma ŋgolna, agi hin ŋgaf sana u gegelna kamu, cuk tagi umu. 14Zi ma nam kal huna, agi joɓ malaŋ zina, Malaŋ Haɗta joɓoŋ ay ana zira nam hin a ti fu Pakŋa u suu mamsinara ni arage? 15Sa namma hin takagi zira ŋgolla kolo kay ndaraɗta u tlena ki mini huruɗ halaŋ, agi hin laygi tlena ni huwa.» 16Suu haɗina tuɗ hu zi ŋgolna, fi tlena halaŋ ko Yesu dasira na may. Asi li tlesuu Pakŋa huwa.
17Fiɗigi ɗaŋi Yesu mba u suu doogo yam mbana. 18Asi ŋguy a ti mappana wanni, Yesu dasi ana, «An dagi ni gasira, dukugi agi suu ti mappana u anna, sa maa dew hin ɦan ki maŋ suuna.»
19Asi mbuɗ ɗus irisiya, joɓom ki dew dew ana, «Ni an su? Ni an su?» 20Yesu hoŋosi dira ana, «Ni dukugi agi suu doogo yam mbana, sa ma kom cuk u an hu ŋgotta dewra. 21Goŋ Sanna hin miɗ ko Boy Lonana di ki kamba na. Hahawra ŋgolla kay sa ɦal Goŋ Sanna ki na, nam vuɗ ki ginɗi ni mariyaɗ.»
Funa vi Buu Suuna
(Matiye 26.26-30; Luk 22.15-20; 1 Korintna 11.23-25)
22Mayra asi a ti funara wanni, Yesu tli funa komu, gi deɓ Lona kamu, mbulukum irim ki duk mbulukŋi, ɦasina ana, «Vagina, ni tliwinu.» 23Nam tli sum veŋŋa kom olo, gi deɓ Lona kamu, ɦasina. Asi cam bel. 24Nam dasi ana, «Ni busu ma agi vi banara u Lona u namma. Ni busu ma vo ki kay suuna halaŋ a bulumusi coosira ki na. 25An dagi ni gasira, an ka ci vuɗ gugutlura u agi oloɗi gak gak, an hin ci ma wilina ni hu Mul Lonara tuwa.» 26Asi gi soolla luuna gi ni, cuk tasi tuɗ kay ɦinira Conora.
Yesu ana Piyer hin tin vunum kamu
(Matiye 26.31-35; Luk 22.31-34; Jaŋ 13.36-38)
27Yesu di suu haɗi mamma ana, «Agi halaŋ hin noyon kiyo. Kay Boy Lonana ki ɓiiri ana, An hin ci sa taa timigiina kiyo. Timigii mamsina hin njay ki may. 28Falira an paɗ ki kolo iiri wani, an hin tuɗ ha fokogi Galile.» 29Piyer kaam vunum ana, «Lini suu halaŋŋa hiniŋ ki lay ni, an na ɗow ni ka hiniŋ kiɗi.» 30Yesu hoŋom dira ana, «An daŋ ha ni gasi, jew golok tlekŋa hel a yamba mbara wanni, aŋ hin tin vunuŋ ki kan yaŋŋa hindi ana aŋ ka wanɗi.» 31Piyer so vunum ki paɗ paɗ ana, «Asi li can ki u aŋ lay ni, an ka di ana, an ka waŋgiraɗi.» Suu haɗi suu hiŋŋa halaŋ di na lay.
Yesu cen Lona hu Getsemane
(Matiye 26.36-46; Luk 22.39-46)
32Asi mba hu li ma yam Getsemane. Yesu di suu haɗi mamma ana, «An nda cen Lona, agi lakagi ka tani na ca.» 33Nam yow ki Piyer u Jak u Jaŋ umu. Nam gijaŋ li ndaana may, tam tuɗum na dukuk dukuk. 34Nam dasi ana, «Hahawra fan wa, ni vun maɗanu. Lakagi jek jekee, buurugi senɗi, ko an na may.» 35Nam ɦuɗ fok nde ni, gi tam kaŋga, cen ana li ni dla ndaɗta liya ni, hahaw ndaɗta ɦuɗ ki egen day. 36Nam di ana, «Abba, Bunu, tlena halaŋ ka li koŋ loɓbi. Hahaw ndaɗta aŋ hininda kanɗi. Ni ka min mandaɗi, li ko aŋ minda na.»
37Nam hoŋ ay eg suu haɗi mam suu hindina wanni, fasi ki senna. Nam di Piyer ana, «Simon aŋ buu ni senna su? Aŋ ndak a kak u iriŋ na njok ki su? 38Lakagi jek jekee, buurugi sennaɗi, cenegiya a va ndemegiɗi. Saara mina, tliw tara dawiya.»
39Nam hoŋ a cenda, di ni boy ma namma olo. 40Nam hoŋ ay egesi fasi senna olo, kay irisi goŋ ki kasiya, asi ka fi ɗoɓ boy ma dambi.
41Nam hoŋ ay egesi a yamba hindira dasi ana, «Agi buu senna, koɗogi tagi ɗaŋi nanage? Lin ndak wa. Gologiya! Goŋ Sanna ɦam ki ko suu hurusi cona. 42Yowogi koloo! Tuɗuygiya! Sa ɦan kina ka tok.»
Suuna vi Yesu
(Matiye 26.47-56; Luk 22.47-53; Jaŋ 18.3-12)
43Vunum ma ɓakŋa bay ndi kaŋga tu may ni, Yudas ma duk suu doogo yam mbana mbay u suuna um bolowo, ŋgewegina bikisi may, tokolora kosi may. Sunusi ay ni muli suu li ɓivunna, u suu wi magaara, u suu ŋgolona lay. 44Yudas, ma ɦam kina, takasi mbeleŋŋa ay ki ana, «Aygi tuɗuygi ha wana, sa ma an gam deɓpa mboɗom kolo hurunna, ni namu, vagina. A tuɗumba wanni, vagina kogi jiviya.» 45Yudas mba mba ni, ɦuɗ tam eg Yesu gaw, yam ana, «Malaŋ Haɗta, gaŋ deɓpa,» mboɗom kolo hurumu. 46Suu ay u Yudasna ŋguf Yesu, vam gaw. 47Sa dew duk suu vi Yesuna paɗ ŋgew mamma, ka hum sa li sunda fok mul ŋgol ma li ɓivunna kiyo. 48Yesu dasi ana, «Agi mbay u ŋgewegina bikigi may, tokolora kogi may, a van ni, an ni sa kul su? 49An ay haɗagi hu Ziŋ Lonara tew tew ni, agi vanɗi kay mege? Dla ndaɗta mbay kan ni, ko Boy Lonana di ay ki fok jewra na.» 50Suu haɗi mamma hinim tani, njay piira gaw.
51Goozoŋ maa dew cuɗ u Yesu haa, u barawna kelewi kelemu. Asi hal a vam may ni, 52nam cukusi barawna ha kosi ca ni, paɗ liŋŋa sili gaw.
Yesu fok suu kaɓakŋa
(Matiye 26.57-68; Luk 22.54-55,63-71; Jaŋ 18.13-14,19-24)
53Asi mba Yesu fok mul ŋgol ma li ɓivunna. Suu ŋgolona u muli suu li ɓivunna u suu wi magaara tok ki gaa egemu. 54Piyer ay ŋgorom day, cuɗum um ay gak gak, mba kal vi mul ŋgol ma li ɓivunna. Nam kak duk suu vi mulnana, hol kura u asiya.
55Muli suu li ɓivunna u suu ŋgolo suu kaɓakŋa hal dlara kay Yesu a cam kira, ka faɗɗi. 56Dlara asi daɗ kay Yesura halaŋŋi, kaboyna sak sak, vunusi ka taɓ ko tambi. 57Suu ɦiw yow koloo, kaboyna egem ana, 58«Ami hum nam di ana, Ziŋ Lonara ta suuna miniɗ u kosira an hin tooɗ kiyo. An hin min mayra ko sa ka egeɗ ɗira, hu buuna hindi.» 59Kay boy namma lay ni, vunusi ka u tam dewɗi lay.
60Mul ŋgol ma li ɓivunna col kolo dukusi, joɓ Yesu ana, «Aŋ ka hoŋomi va ki dukŋa dewɗi amege? Aŋ ka hum dlara asi daŋga kaŋgaɗi su?» 61Yesu seŋ tam yerek yerek, dam vun ka dukgi. Mul ŋgol ma li ɓivunna joɓom olo, «Aŋŋi Sa Lona Fuurumma, ma Goŋ Lonna ma bibiŋilna su?» 62Yesu dam ana, «Ni an ɗaŋ may. Agi hin wi Goŋ Sanna kagi kay bik Lona ma njufna ma saɓakŋa kom belna. Agi hin wam nam hoŋ ay duk ɗugulla.» 63Mul ŋgol ma li ɓivunna hum na ni, haa baraw mamma ki gaw ana, «Hal ni boy me kam olo ge? 64Agi humum vunum ma ŋgul Lona ki halaŋ. Irigi ana mege?» Asi taɓ vunusi halaŋ ana, «Cam ki ciya.»
65Suu ɦiw gijaŋ tofoɗom yoyona kamu, baaram barawna irimu, cam ci ni, joɓom ana, «Sa caŋŋa ni gege?» Suu asgaana cam irim piŋ piŋ.
Piyer tin vunum ki ana, nam ka wi Yesuɗi
(Matiye 26.69-75; Luk 22.56-62; Jaŋ 18.15-18,25-27)
66Piyer hu taraŋga tu wanni, cara li sunda vi mulnara mbaya. 67Ndaɗ wi Piyer hol tam vun kura wanni, ndaɗ golom ki jivi lay, dam ana, «Aŋ ay ni u Yesu ma Nazaretna layɗi su?» 68Piyer tin vunum ki ana, «An ka wi u dlara ndak dan kaɗtaɗi.» Nam gi tam ki vun grekŋa. Golok tlekŋa hel gaw. 69Ca ndaɗta wam wi olo ni, hoŋ di maŋ suu moli egeɗna ana, «Sa namma ay dukusi may.» 70Piyer tin vunum olo. Kak njokŋi, suu molina di Piyer olo, «Gasi. Aŋ ay ni dukusiya. Aŋŋi sa Galilenaɗi su?» 71Piyer gijaŋ suu tamu, «Lini an ka ni boyna ni, Lona gan daŋgayna. An ka wi sa ma agi ɓakan kammaɗi.» 72Vunum ndi kaŋga may ni, golok tlekŋa hel a yamba mbara gaw. Piyer humum gam kay boy ma Yesu damma ana, «Jew golok tlekŋa hel a yamba mbara wanni, aŋ hin tin vunuŋ ki kan yaŋŋa hindi ana, aŋ ka wanɗi.» Piyer gi tam tii u simina irim na buɗuɗ.
Actualmente seleccionado:
MARK 14: BMS
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Bible Moussey © Bible Society of Chad, 2002.