MARK 12
12
Yesu tin ndal boyna u suu horok senena
(Matiye 21.33-46; Luk 20.9-19)
1Yesu gijaŋ ɓak suuna u ndal boyna ana, «Sana li senena li ni, dlaɓam yamu, vek zulla a em gugutlura, nam pi mbutluɓma duku. Nam a tuɗ hu li ma daŋŋa wanni, ɦam ka maŋ suuna ana asi lam kaa. 2Tlesuu hu senena ndak a feɗta ndakŋi, nam sun sana ay eg suu sunda ana asi ŋgaam ii mamsina aya. 3Asi vam paɓ, poŋom taa taa, gam u kom ma vadlna. 4Malaŋ senena sun sa daŋŋa na olo. Sa namma asi coom yam kam ɦooɗoɗ, karakam ŋgulla ha lay. 5Nam hin sun ma daŋŋa ha huwa, namma asi cam ki maɗna gaw. Malaŋ senena cuk suu daŋŋa ay ŋgol su suu jewna olo, suu ɦiw suu li sunda hu senena poŋosi taa taa, suu hiŋŋa asi casi ki maɗna. 6Gorom ma nam minim ɦayna, hin kommi nam dew. Nam sun goorom ha dagan ni ana, Tasi hin mbuɗ zolo kombi su? 7Suu li sunda hu senena wam wi ni, ɓak duk tasi ana, Cow ni sa yow daa jo bumma. Tuɗ caygina ki ci ni, jo bum hin ki maygi silik silik. 8Asi vam gaw, cam ki ci ni, gam ha ki keŋ senena.»
9Yesu dasi ana, «Malaŋ senena hin li nanage? Nam hin mba ci suu asina kiyo, varak suu daŋŋa hu sene mamma. 10Agi hum boy ma ɓiiri hu magaarana kaɗi su?
Ҥinira suu min goŋga noyoɗ ki kaŋgara,
hin mbuɗ a jiv goŋga ki ni ndaɗu.
11Gola ni dlara Bu Suuna laɗta,
aygi goloɗ na ni,
ndaɗ su ki kaygi cocoo.»
12Muli suu Juifna hal a vi Yesu, kay asi wi ki ana nam tinisi ndal boy namma ni kasiya. Asi li ndaana ko suuna moli cocora, asi hinim tani, cuk tasi gaw.
Warak taara maŋ Mulna
(Matiye 22.15-22; Luk 20.20-26)
13Asi sun suu Farisenna ɦiw u suu vi Herodna ha eg Yesu a duum delem u boyna. 14Asi mbay eg Yesu dam ana, «Malaŋ Haɗta, ami wi ana aŋŋi sa gasina. Aŋ ka tin yaŋ kay saara vi saɗi lay. Aŋ takŋi voɗta vi Lona ta gasira. U gaɗ maygira ni, ɦal taara maŋ Sesar, ɗowba ɦalɗi su?» 15Yesu wasi mbeleŋesi na ni, nam dasi ana, «Agi hal a duun delen ni kay mege? Ҥan sili ay dew. An goloɗ gige.» 16Asi ɦam taa ay dew, nam joɓosi ana, «Tinni hu ni yam gege? Ɓiiri hu ni sem gege?» Asi dam ana, «Ni Sesar.» 17Yesu dasi ana, «Vaŋ Sesarna ɦam maŋ Sesar, vaŋ Lonna aŋ ɦam maŋ Lona may.» Asi mbuɗ lakira na jim ko boy ma Yesu hoŋosinana.
Joɓpa kay paɗta kolora vi suu miɗina
(Matiye 22.23-33; Luk 20.27-40)
18Suu Sadusenna mbay eg Yesu. Asi ni suu di ana suu miɗina ka paɗ ki kolo iiriɗi na. 19Asi joɓom ana, «Malaŋ Haɗta, Moiz hiniygi gaɗta ka ana, Lini sana wayamma miɗa, hin caamba ka bay goo koɗu, nam kakaɗ a vuɗ gotra maŋ wayamma. 20Ko ndaɗtana goryoŋ cara dewra na kiɗisiya. Ma ŋgolna vi cara miɗ ki bay vuɗuɗ goo koɗu. 21Ma kamma kakaɗu, miɗ ki bay vuɗuɗ goo koɗ olo. Ma hindina li ni na lay. 22U dlaasira kiɗisiyara jokoɗ usi halaŋ, daɓ miɗna bay vuɗuɗ goo koɗu. Ŋgorosi dagani cara miɗ ha may. 23Asi kiɗisiya kakaɗ ay ki usi bel may ni, hu buu ma suu miɗina paɗ ki kolona, ndaɗ hin kak a cara ni u maana ge?» 24Yesu hoŋosi dira ana, «Agi viɗ tagi wa, kay agi ka wi Boy Lonanaɗi, ka wi saɓakŋa vi Lonaɗi lay. 25Falira suu miɗina paɗ ki kolo iirira, sa njufna ka ɗum caɗi lay, ca ka kak njufɗi lay. Asi hin kakŋi ko suu sunda kolo huulonara na. 26Agi gol ka hu magaara vi Moiz kay paɗta kolora vi suu miɗina u boy ma Lona dam maŋ Moiz duk gu ma siinaɗi su? Lona di ana, Anni Loŋ Abrahamma, Loŋ Isaakŋa, Loŋ Yakobma. 27Nam ka Lo ma vi suu miɗinaɗi, Lo vi suu iirina ni namu. Kay boy namma wanni, agi viɗ tagi kam cocoo.»
Gaɗta su ndarayaɗnara
(Matiye 22.34-40; Luk 10.25-28)
28Sa wi magaara humusi asi ciwayra duk tasiya. Nam wi ana Yesu hoŋ dira maŋ suu Sadusenna jiviya ni, nam ɦuɗ tam egemu, joɓom ana, «Gaɗta su ndarayaɗnara ni taarage?» 29Yesu hoŋom dira ana, «Gola ni gaɗta su ndarayaɗnara, Suu Israelna, humugi haa. Looygina Bu Suuna ni nam dew. Lo ma daŋ kaɗi. 30Aŋ min Lona Bu Suuna u huruŋ halaŋ, u musukuŋ halaŋ, u saɓakaŋ halaŋ. Nira jewra. 31Ta mbara wanni ana, Aŋ min ndaraŋŋa ko aŋ min taŋga na. Gaɗta su kay ta mbara ca ni kaɗi.» 32Sa wi magaara dam ana, «Malaŋ Haɗta, aŋ di ni u voɗoɗu. Ni na ɗaŋ may. Bu Suuna ni Lona dew, ma daŋ kaɗi. 33Sana min Lona u hurum halaŋ, u musukum halaŋ, u saɓakam halaŋ, min ndaramma ko tamba na. Dla ndaɗta jivi su ɓivunna u poora suuna laɗta halaŋ.» 34Yesu wi ana sana hoŋom dira ɗegeera ni, nam dam ana, «Aŋ ka ki eg Mul Lonara dayɗi.»
Ŋgoo daganda wanni, sa ndak ka a joɓom boy ma daŋ oloɗi.
Kristu ni goŋ ki na ge?
(Matiye 22.41-46; Luk 20.41-44)
35Yesu haɗ hu Ziŋ Lonara joɓ ana, «Suu wi magaara di ana Sa ma Lona Fuurumma ni Goŋ Davidna ni nanage? 36David u tamba di ki u saɓakŋa vi Musuk Lonara ana,
Bu Suuna di maŋ Bu Suuna manna ana,
Kak kay bikin ma njufna,
gak gak an cukuŋ babali maŋsina ki
kaŋga u seŋ tuwa.
37David u tamba yam ana, Bu Suuna mamma, nam hin mbuɗ a Goŋ Davidna ni nanage?»
Yesu ne suuna ki eg suu wi magaara
(Matiye 23.1-36; Luk 20.45-47)
Suuna moli cocoo hum Yesu u ayra. 38Yesu di suu nam haɗasina ana, «Lagi tagi jivi ko suu wi magara. Asi suu poy u baraw ma ŋgolona. Asi min deɓpa duk bolowra. 39Asi min ana hu Zira Tokka ni, asi lakŋi foko. Asi man lii jivina a ti funa duk bolowra. 40Asi daɓ tlesuu vi boyogi suu ki donona ni asiya. Lay ni asi li cenda fiyekka a jiv tasi ki ii suuna. Suu asina Lona hin mba kaasi ɓak ma cona kasiya.»
Cara donora ɦal gursura maŋ Lona
(Luk 21.1-4)
41Yesu kak eg zandukka suuna cuk gursura maŋ Lona hura. Nam gol suu cuk gursura huna. Suu ɦizina cuk ŋgolo. 42Cara donora hawi mba cuk sili mba'. 43Yesu yi suu haɗi mamsina egemu, dasi ana, «An dagi ha ni gasira, suuna kof day cuk gursura ni, cara donora wihawra cuk suusi bel bel. 44Asi halaŋ cukŋi kay asi kay tasi ndakiya. Ndaɗ u hahaw maɗta cuk ki ni, ma ndaɗ ti gin vunuɗ u namma halaŋ.»
Actualmente seleccionado:
MARK 12: BMS
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Bible Moussey © Bible Society of Chad, 2002.