Niverow 26
26
An Nessa Niveryans
1Wosa an pla, an Arloedh a leveris dhe Moyses ha dhe Eleazar mab Aron an oferyas, 2‘Gwra niveryans a'n kuntelles oll a vebyon Ysrael, a-dhia ugens bloedh ha moy, herwydh chiow aga thasow, peub yn Ysrael a yll mos yn-rag dhe vresel.’ 3Ha Moyses hag Eleazar an oferyas a gewsis gansa yn plenys Moab ryb Yordan, a-dal Yeriko, ow leverel, 4‘Gwra niveryans a'n bobel, a-dhia ugens bloedh ha moy, dell worhemmynnis an Arloedh dhe Moyses.’ Mebyon Ysrael, a dheuth yn-mes a bow Ejyp, o:
5Rewben, kynsa-genys Ysrael: a Hanok, teylu an Hanokysi; a Pallu, teylu an Palluysi; 6a Hesron, teylu an Hesronysi; a Karmi, teylu an Karmysi. 7An re ma yw teyluyow an Rewbenysi; ha'ga niver o tri ha dew-ugens a vilyow, seyth kans, deg warn ugens. 8Ha mebyon Pallu: Eliab. 9Ha mebyon Eliab: Nemuel, Dathan, hag Abiram. An re ma yw an Dathan hag Abiram, dewisys a'n kuntelles, neb a genkias erbynn Moyses hag Aron yn kowethas Koragh, pan genkisons erbynn an Arloedh,#26:9 Gwel Niverow chaptra 16. 10ha'n dor a igoras y anow ha'ga howllenki war-barth gans Koragh, pan verwis an kowethas na, pan gowlloskas an tan dew kans gwer ha hanter-kans; hag i a dheuth ha bos gwarnyans. 11Byttegyns, ny verwis mebyon Koragh.
12Mebyon Simeon herwydh aga theyluyow: a Nemuel, teylu an Nemuelysi; a Yamin, teylu an Yaminysi; a Yakin, teylu an Yakinysi; 13a Zeragh, teylu an Zeraghysi; a Shaul, teylu an Shaulysi. 14An re ma yw teyluyow an Simeonysi, dew warn ugens a vilyow, dew kans. 15Mebyon Gad herwydh aga theyluyow: a Sefon, teylu an Sefonysi; a Haggi, teylu an Haggysi; a Shuni, teylu an Shunysi; 16a Ozni, teylu an Oznysi; a Eri, teylu an Erysi; 17a Arod, teylu an Arodysi; a Areli, teylu an Arelysi. 18An re ma yw teyluyow mebyon Gad herwydh aga niver, dew-ugens mil pymp kans.
19Mebyon Yuda o Er hag Onan; hag Er a verwis yn pow Kanan. 20Ha mebyon Yuda herwydh aga theyluyow: a Shela, teylu an Shelanysi; a Peres, teylu an Peresysi; a Zeragh, teylu an Zeraghysi. 21Ha mebyon Peres o: a Hesron, teylu an Hesronysi; a Hamul, teylu an Hamulysi. 22An re ma yw teyluyow Yuda herwydh aga niver, hwetek ha tri-ugens a vilyow, pymp kans.
23Mebyon Yssakar herwydh aga theyluyow: a Tola, teylu an Tolaysi; a Puva, teylu an Punysi; 24a Yashub, teylu an Yashubysi; a Shimron, teylu an Shimronysi. 25An re ma yw teyluyow Yssakar herwydh aga niver, peswar ha tri-ugens a vilyow, trihans.
26Mebyon Zebulun herwydh aga theyluyow: a Sered, teylu an Seredysi; a Elon, teylu an Elonysi; a Yahleel, teylu an Yahleelysi. 27An re ma yw teyluyow an Zebulunysi herwydh aga niver, tri-ugens mil, pymp kans.
28Mebyon Yosep herwydh aga theyluyow: Manasse hag Efraym. 29Mebyon Manasse: a Makir, teylu an Makirysi; ha Makir a dhineythis Gilead; a Gilead, teylu an Gileadysi. 30An re ma yw mebyon Gilead: a Iezer, teylu an Iezerysi; a Helek, teylu an Helekysi; 31hag a Asriel, teylu an Asrielysi; hag a Shekem, teylu an Shekemysi; 32hag a Shemida, teylu an Shemidaysi; hag a Hefer, teylu an Heferysi. 33Lemmyn, Selofehad mab Hefer ny'n jeva mebyon, mes myrghes: ha henwyn myrghes Selofehad o Mahla, Noa, Hogla, Milka, ha Tirsa. 34An re ma yw teyluyow Manasse; ha'ga niver o dew ha dew-ugens a vilyow, seyth kans.
35An re ma yw mebyon Efraym herwydh aga theyluyow: a Shuthelagh, teylu an Shuthelaghysi; a Beker, teylu an Bef; a Tahan, teylu an Tahanysi. 36Ha'n re ma yw mebyon Shuthelagh: a Eran, teylu an Eranysi. 37An re ma yw teyluyow mebyon Efraym herwydh aga niver, dewdhek warn ugens a vilyow, pymp kans. An re ma yw mebyon Yosep herwydh aga theyluyow.
38Mebyon Benyamin herwydh aga theyluyow: a Bela, teylu an Belaysi; a Ashbel, teylu an Ashbelysi; a Ahiram, teylu an Ahiramysi; 39a Shefufam,#26:39 Shefufam: War-lergh an Pentatewgh Samaritanek, an Syriek, ha'n Vulgat: Shufam. War-lergh an Septuagint Shufan. teylu an Shufamysi; a Hufam, teylu an Hufamysi. 40Ha mebyon Bela o Ard ha Naaman: a Ard, teylu an Ardysi; a Naaman, teylu an Naamanysi. 41An re ma yw mebyon Benyamin herwydh aga theyluyow; ha'ga niver o pymp ha dew-ugens a vilyow, hwegh kans.
42An re ma yw mebyon Dan herwydh aga theyluyow: a Shuham, teylu an Shuhamysi. An re ma yw teyluyow Dan herwydh aga theyluyow. 43Teyluyow oll an Shuhamysi, herwydh aga niver, o peswar ha tri-ugens a vilyow, peswar kans.
44Mebyon Asher herwydh aga theyluyow: a Ymna, teylu an Ymnysi; a Yshvi, teylu an Yshvysi; a Beria, teylu an Beriysi. 45A vebyon Beria: a Heber, teylu an Heberysi; a Malkiel, teylu an Malkielysi. 46Ha hanow myrgh Asher o Serah. 47An re ma yw teyluyow mebyon Asher herwydh aga niver, trydhek ha dew-ugens a vilyow, peswar kans.
48Mebyon Naftali herwydh aga theyluyow: a Yahseel, teylu an Yahseelysi; a Guni, teylu an Gunysi; 49a Yeser, teylu an Yeserysi; a Shillem, teylu an Shillemysi. 50An re ma yw teyluyow Naftali herwydh aga theyluyow; ha'ga niver o pymp ha dew-ugens a vilyow, peswar kans.
51An re ma yw an re niverys a vebyon Ysrael, hwegh kans hag onan a vilyow, seyth kans, deg warn ugens.
52An Arloedh a leveris dhe Moyses: 53‘Dhe'n re ma an tir a vydh rynnys rag eretons herwydh an niver a henwyn. 54Dhe loeth bras ty a re eretons bras, ha dhe loeth byghan ty a re eretons byghan; pub loeth a vydh res y eretons herwydh y niverow. 55Mes an tir a vydh kevrennys gans tewlel prenn; herwydh henwyn kordhow aga thasow i a wra erita. 56Aga eretons a vydh kevrennys herwydh an prenn ynter an brassa ha'n byghanna kordhow.’
57An re ma yw an Levysi dell vons niverys herwydh aga theyluyow: a Gershon, teylu an Gershonysi; a Kohath, teylu an Kohathysi; a Merari, teylu an Merarysi. 58An re ma yw teyluyow Levi: teylu an Libnysi, teylu an Hebronysi, teylu an Mahlysi, teylu an Mushysi, teylu an Koraghysi. Ha Kohath o tas Amram. 59Hanow gwreg Amram o Yokebed myrgh Levi, a veu genys dhe Levi yn Ejyp; ha hi a dhineythis dhe Amram Aron ha Moyses ha Miryam aga hwoer. 60Ha dhe Aron y feu genys Nadab, Abihu, Eleazar hag Ithamar. 61Mes Nadab hag Abihu a verwis pan offrynnsons tan astranj#26:61 astranj: An styr yw ankler: martesen estren, po heb awtorita. a-rag an Arloedh. 62Ha'n re anedha niverys o tri mil warn ugens, pub gorreydh a unn mis y oes ha moy; rag ny vons niverys yn mysk mebyon Ysrael, drefenn na veu res eretons dhedha yn mysk mebyon Ysrael.
63An re ma a veu niverys gans Moyses hag Eleazar an oferyas, a niveras mebyon Ysrael yn plenys Moab ryb Yordan, a-dal Yeriko. 64Mes yn aga mysk nyns esa nagonan a'n re niverys gans Moyses hag Aron an oferyas, neb a niveras mebyon Ysrael yn gwylvos Sinay. 65Rag an Arloedh re lavarsa anedha, ‘I a wra merwel y'n gwylvos.’ Ny veu gesys nagonan anedha, marnas Kaleb mab Yefunne ha Yoshua mab Nun.
Actualmente seleccionado:
Niverow 26: ABK
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© Kesva an Taves Kernewek 2004, 2024
© Cornish Language Board 2004, 2024