Niverow 24
24
Tressa Dargan Balaam
1Pan welas Balaam bos plegadow dhe'n Arloedh benniga Ysrael, nyns eth, avel yn prysyow erell, dhe gavoes dewinieth, mes settya y fas war-tu ha'n gwylvos. 2Ha Balaam a dhrehevis y dhewlagas, ha gweles Ysrael ow kampya, loeth ryb loeth. Ha Spyrys Duw a dheuth warnodho, 3hag ev a gemmeras yn-bann y gows, ha leverel,
‘Dargan Balaam mab Beor,
ha dargan an gour igor y lagas,
4ger anodho ev neb a glew geryow Duw,
neb a wel gwelesigeth an Ollgalloesek#24:4 an Ollgalloesek: Ebrow Shadday.,
ow koedha yn transyek,
mes ankudhys y dhewlagas:
5Ass yw teg agas tyldow, A Yakob,
agas kampvaow, A Ysrael!
6Yth omystynnons avel nansow pell,
avel lowarthyow ryb avon,
avel aloewydh re blansas an Arloedh,
avel sedres ryb an dowrow.
7Dowr a wra frosa a-dhiworth y gelern,
ha'y has a vydh yn lies dowr,
y vyghtern a vydh ughella ages Agag,
ha'y ruvaneth a vydh ughelhes.
8Duw a'n dre yn-mes a Ejyp;
ev a'n jeves dell hevel kern an ojyon gwyls,
ev a wra dybri kenedhlow y eskerens,
ha terri aga eskern,
ha'ga gwana gans y sethow.
9Ev a blattyas, ev a wrowedhas avel lew,
hag avel lewes; piw a'n gwra dhe dhifuna?
Benniges re bo pubonan a'th vennik,
ha milliges re bo pubonan a'th villik.’
Peswora Dargan Balaam
10Ha sorr Balak a dhewis erbynn Balaam, hag ev a weskis y dhiwdhorn war-barth; ha Balak a leveris dhe Balaam, ‘My a'th elwis dhe vollethi ow eskerens, hag otta, ty re's bennigas an teyr gweyth ma. 11Ytho lemmyn fi dhe'th tyller; my a leveris, “My a wra dha enora yn sertan”, mes an Arloedh re'th withas dhiworth enor.’ 12Ha Balaam a leveris dhe Balak, ‘A ny wrug vy leverel dhe'th kannasow a dhannvensys dhymm, 13“Mar rolla Balak dhymm y ji leun a arghans hag owr, ny allsen mos dres ger an Arloedh, dhe wul da po drog a'm bodh vy; an pyth a gews an Arloedh, henna my a gews?” 14Ha lemmyn, otta, yth av dhe'm pobel; deus, my a'th warn a'n pyth a wra an bobel ma dhe'th pobel jy y'n dydhyow diwettha.’
15Ena ev a gemmeras yn-bann y gows, ha leverel,
‘Dargan Balaam mab Beor,
ha dargan an gour igor y lagas,
16ger anodho ev neb a glew geryow Duw,
hag a woer skians an Ughella#24:16 an Ughella: Ebrow Elyon.,
hag a wel gwelesigeth an Ollgalloesek#24:16 an Ollgalloesek: Ebrow Shadday.,
ow koedha yn transyek, mes ankudhys y dhewlagas:
17My a'n gwel, mes a-der lemmyn;
my a'n aspi, mes a-der yn ogas;
sterenn a wra dos war-rag yn-mes a Yakob,
ha ternwelenn a wra sevel yn-mes a Ysrael;
hi a wra brewi talyow Moab,
ha kregyn oll mebyon Sheth.
18Edom a vydh perghennys,
y eskerens Seir a vydh perghennys ynwedh,
hag Ysrael ow kul yn kolonnek.
19Dre Yakob gwarthevyans a vydh gwrys,
ha'n re a skap dhiworth sita#24:19 dhiworth sita: Po amendyansow dhiworth Seir, po dhiworth Ar, po dhiworth Ir. a vydh distruys!’
20Ena ev a viras war Amalek, ha kemmeres yn-bann y gows, ha leverel,
‘Amalek o kynsa an kenedhlow,
mes wortiwedh ev a dheu dhe dhistruyans.’
21Hag ev a viras war an Kenyas, ha kemmeres yn-bann y gows, ha leverel,
‘Fast yw dha drigva,
ha dha neyth yw settys y'n garrek;
22byttegyns Kayn a vydh gwastyes.
Pes termyn y hwra Asshur dha gemmeres dhe-ves yn kethneth?’
23Hag ev a gemmeras yn-bann y gows, ha leverel,
‘Eghan, piw a wra bewa pan wra Duw hemma?
24Mes gorholyon a wra dos a-dhiworth Kittim
hag a wra plagya Asshur hag Eber;
hag ev ynwedh a wra dos dhe dhistruyans.’
25Ena Balaam a sevis, ha dehweles dh'y dyller; ha Balak ynwedh eth war y hyns.
Actualmente seleccionado:
Niverow 24: ABK
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© Kesva an Taves Kernewek 2004, 2024
© Cornish Language Board 2004, 2024