Levitikus 27
27
Daspren rag Offrynnow Ambosys
1An Arloedh a gewsis orth Moyses, ow leverel: 2Kows orth mebyon Ysrael, ha leverel dhedha: Mar kwra nebonan ambos arbennik dhe ri tus dhe'n Arloedh, an dalvosogeth a vydh reknys yndella genes: 3dha reknans rag gorreydh a ugens bloedh bys yn tri-ugens bloedh y oes a vydh hanter-kans shekel arghans, war-lergh shekel an sentri.#27:3 shekel an sentri: Talvosogeth shekel an sentri a veu hanter an shekel kemmyn. 4Ha mars yw benynreydh, dha reknans a vydh deg shekel warn ugens. 5Mars yw a bymp bloedh bys yn ugens bloedh y oes, dha reknans a vydh ugens shekel rag gorreydh ha deg shekel rag benynreydh. 6Mars yw a unn mis bys yn pymp bloedh, dha reknans a vydh pymp shekel arghans rag gorreydh, ha'th reknans a vydh tri shekel arghans rag benynreydh. 7Mars yw tri-ugens bloedh po moy, mars yw gorreydh, dha reknans a vydh pymthek shekel, ha rag benynreydh, deg shekel. 8Mars yw re voghosek dhe ri dha reknans, gwra y settya a-rag an oferyas, ha'n oferyas a'n reken war-lergh pygans neb a wrug an ambos.
9Mars yw best a'n eghenn a dhrons avel offrynn dhe'n Arloedh, pub best a'n par na a vo res dhe'n Arloedh a vydh sans. 10Ny worr neppyth yn y le na'y geschanjya, onan da rag onan drog, nag onan drog rag onan da; ha mar keschanj best rag best, ha'n kynsa best ha'n best keschanjys a vydh sans. 11Mars yw best avlan, a'n sort nag yw dres avel offrynn dhe'n Arloedh, ev a sett an best dherag an oferyas, 12ha'n oferyas a reken y dalvosogeth, mars yw da po drog. Kepar dell y'n reknydh, ty, an oferyas, yndella y fydh. 13Mes mar mynn ev y dhasprena, ev a geworr pympes rann moy dhe'n reknans.
14Pan wra gour sakra y ji dhe vos sans dhe'n Arloedh, an oferyas a reken mars yw da po drog. Ev a sev kepar dell y'n reken an oferyas. 15Mar mynn neb a'n sakras dasprena y ji, ev a geworr dhodho pympes rann moy a'n mona war-lergh dha reknans, hag ev a'n pew arta.
16Mar kwra gour sakra dhe'n Arloedh rann a dir y berghennogeth, dha reknans a vydh war-lergh an has anodho: homer has heydh a vydh reknys orth hanter-kans shekel arghans. 17Mar saker y wel a-dhia vlydhen an yubile, ev a bes war-lergh dha reknans; 18mes mar saker y wel wosa an yubile, an oferyas a reken an mona ragdho war-lergh an blydhynyow yw gesys bys yn blydhen an yubile, ha lehes vydh dhiworth dha reknans. 19Mar mynn neb a sakras y wel y dhasprena, ev a geworr pympes rann moy a vona dha reknans, hag ev a'n pew arta. 20Mes mar ny vynn dasprena an gwel, po mar kwerthas an gwel dhe wour arall, ny vydh dasprenys namoy; 21mes an gwel, pan yw delivrys y'n yubile, a vydh sans dhe'n Arloedh, avel gwel sakrys. Perghennys vydh gans an oferyas. 22Mar saker den dhe'n Arloedh gwel re brenas nag yw rann a'y dir eritys, 23an oferyas a reken pris an reknans bys yn vlydhen an yubile; hag ev a re pris an reknans an jydh na, avel tra sans dhe'n Arloedh. 24Yn blydhen an yubile an gwel a dhehwel dhe neb may feu prenys dhiworto, dhe neb o perghennek an tir. 25Oll dha reknansow a vydh war-lergh shekel an sentri, ugens gera dhe'n shekel.
Offrynnow Na Yll Bos Dasprenys
26Mes ny saker denvyth kynsa-genys neb best, rag an Arloedh a bew pub kynsa-genys, ojyon po davas kyn fo. An Arloedh a'n pew. 27Mars yw best avlan, ev a'n daspren war-lergh dha reknans, hag ev a geworr pympes rann moy dhodho; po, mar nyns yw dasprenys, y fydh gwerthys war-lergh dha reknans.
28Byttegyns, neppyth sakrys, a wra gour y sakra dhe'n Arloedh, yn-mes a bup-tra eus dhodho, a dhen, po best, po gwel a'y berghennogeth, ny vydh gwerthys na dasprenys. Pup-tra sakrys yw an moyha sans dhe'n Arloedh. 29Den vytholl a vo sakrys dhe dhistruyans, ny vydh dasprenys. Ev a vydh gorrys dhe'n mernans.
30Oll dega an tir, has an tir po frut an gwydh kyn fo, a vydh dhe'n Arloedh. Sans yw dhe'n Arloedh. 31Gour mar mynn dasprena rann y dega, ev a geworr dhodho unn pympes rann moy. 32Hag oll dega an chatel po an flokk, pup-tra a dremenno yn-dann welenn an bugel#27:32 yn-dann welenn an bugel: Ow siwya an Vulgat. Ebrow: yn-dann an welenn. , an degves a vydh sans dhe'n Arloedh. 33Ha ny wovynn mars yw da po drog, ha ny wra y geschanjya. Mara'n keschanj, hag ev ha'n onan keschanjys a vydh sans. Ny vydh dasprenys.
34An re ma yw an gorhemmynnow a worhemmynnis an Arloedh dhe Moyses rag mebyon Ysrael yn menydh Sinay.
Actualmente seleccionado:
Levitikus 27: ABK
Destacar
Copiar
Comparar
Compartir
¿Quieres tener guardados todos tus destacados en todos tus dispositivos? Regístrate o inicia sesión
© Kesva an Taves Kernewek 2004, 2024
© Cornish Language Board 2004, 2024