LUKAS 20
20
Pangkuatan ra kuasa' ri Jisus
(Mat. 21:23-27; Mrk. 11:27-33)
1Sangarawan raiti, paat ri Jisus nangila' am nampabala' ra Tanou Moonsoi ra ulun masuang giu' ra Baloi Tuhan, ratong tingganai imam Jaudi, mangingila' ra Ukum ri Musa am tingganai ru ulun ru Jaudi 2am indagu Riso, “Balai' akai, atan kuasa' Muno mambaal raginio? Osoi kia nangani' rirun ra kuasa'?”
3Taam i Jisus, “Aku pana masaga' mangkuot ramuyun. Balai' Aku, 4osoi kia nangani' ri Juanis Mampariu' ra kuasa' mampariu' ra ulun, i Aki Kapuuno' kia kapoam ulun?”
5Tumalimpuun ilo boo magagansang ra rondo' am bokon, “Atan nua' pataamon takau? Amon ru tumaam takau, ‘Intor ri Aki Kapuuno'’, maaru' mindagu Io ritakau, ‘Kua kalo nangintopot kau ri Juanis?’ 6Kaa' amon ru tumaam takau, ‘Intor ra ulun,’ bobolon takau ra batu ru ngaangai' ulun, sabap ra ilo mangintopot toojo ra i Juanis ti sangulun nabi.” 7Taam ilo boo, “Kalo nakapandai akai osoi nangani' riso ra kuasa' no.”
8Indagu i Jisus risilo, “Amon ru koson poyo raginio, Aku pana kalo mambala' ramuyun atan kuasa' Kuno mambaal raginio.”
Abig ra ulun-ulun ondo' naniwa' ra umo ru anggur
(Mat. 21:33-46; Mrk. 12:1-12)
9 Tunungo' ri Jisus abig ragitio ra ulun-ulun no, “Mokoondo' sangulun nantanom ra anggur ra umo nano. Pasiwai' no ra kukula' ngaulun, am ugar io minongoi ra sampagunan am nabuoi io ra giu' i. 10Kasuku' pangupuan ra kawa' ru anggur, tatangan ra umo i nanusub ra ulipon nali mongoi ra ulun-ulun naniwa' no mangalap ra tayar nali intor risilo. Kaa' linamba' ulipon nali ru ulun naniwa' no, pinauli' am kalo pinagibit ra atan ayuk pana. 11Tatangan ra umo i nompoongoi poyo ra sangulun ulipon ra bokon. Kaa' linamba' niayuk ulipon ragitio, tinauyu', pinauli' am kalo pinagibit ra atan ayuk pana. 12Panusub io boo ra ulipon katalu. Kaa' linamba' nilo niayuk saboi napilatan ulipon ragitio am pinatiran poyo ra lisar ru umo i. 13Indagu tatangan ra umo i, ‘Atan poyo baalon kutu? Susubon ku anak galama' ondo' tagamin kuno; maaru' urumaton io!’ 14Kaa' kakito io ru ulun naniwa' no, pansusunur ilo, ‘Gitio anak ru tatangan ra umo ti. Potoyon takau am maa' raginio itakau makaalap ra umo ti.’ 15Papatiro' nilo io ra lisar ru umo i am potoyo'.”
Pangkuot i Jisus, “Atan poyo baalon ru tatangan ra umo i ra ulun naniwa' no? 16Matong io am potoyon no ilo ngaangai' am pasiwain no ra ulun ra bokon.”
Pakaining ulun-ulun raginio, indagu ilo, “Kalo tupo masauk!” 17 Ponontong i Jisus risilo am pangkuot, “Atan guat arati' ragu ru Buuk Kitab ragitio?
‘Batu ondo' inimpayan ru manambaloi
nasauk noyo ra batu ondo' maatang kaga'.’
18Moonong ulun ondo' maratu' pokoontot ra batu no matutuk; am amon ru batu ti maratu' ra sasangulun, maaru' matutuk io.”
Pangkuatan intor ra mambayar ra cukai
(Mat. 22:15-22; Mrk. 12:13-17)
19Mangingila' ra Ukum ri Musa am tingganai imam Jaudi no nangkinam mamulali' mamparakop ri Jisus, sabap ra natutunan nilo ra ilo galama' kon ru abig ni; kaa' nalaa' ilo ra ulun masuang. 20Ginio ra naginaa ilo ra kaluagan moonsoi. Susubo' nilo kukula' ngaulun sumalu ra ulun ondo' mangintopot kunu' Riso mongoi pangkuot koson makaalap ilo ra panguwan mamparakop Riso. Koson raginio mataakan nilo i Jisus ra kuasa' ru gabenor. 21Indagu ilo boo ri Jisus, “Mangingila', nakatutun akai ra motopot ngaangai' raguon am pangilaan Muno. Nakatutun akai niayuk ra kalo mampili' Kou ra ulun, kaa' mangila' Kou ayuk ra atan ondo' motopot intor ra kasagaan ri Aki Kapuuno' ra ulun. 22Balai' akai, sumugut ra Ukum ri Musa, makasala kia kapoam kalo mambayar ra cukai ra Kaisar Roma?”
23Nakarati' i Jisus ra pamaguangan malaat nilai. Indagu Io risilo, 24“Ilong Aku ra ruit no. Osoi kia ra bulos am inggalan ondo' pinolokot ra ruit ti?”
Taam ilo, “I Kaisar!”
25Indagu boo i Jisus risilo, “Amon ru koson poyo raginio, pasagulio' min ra Kaisar ondo' io tatangan am pasagulio' niayuk ri Aki Kapuuno' ondo' Io tatangan.”
26Kolondo' natuum nilo ra panguwan ri Jisus giu' ra saang ru ulun masuang no. Nongkoror ilo am nangimuag ra pinataam Nali.
Pangkuatan ra kaayagan saguli'
(Mat. 22:23-33; Mrk. 12:18-27)
27 Kukula' ngaulun ru Saduki ondo' kalo mangintopot ra kaayagan saguli' minatong ri Jisus. Kuati' nilo i Jisus, 28 “Mangingila', mokoondo' tinulisan ra Ukum ri Musa, ‘Amon ru matoi sangulun ungkuyon makaandu', kaa' kolondo' anak nilo, napuor no paanduin ra pongkotob ru minatoi i. Amon ru makaanak ilo, gitio karaan koson sayat intor ra ralaki no ra minatoi i.’ 29Ginio nai mokoondo' tulu' ngaulun ungkuyon sangkaaka'. Katuaan i nanangandu' am minatoi kaa' kolondo' anak. 30Ondo' karuo i nanangandu' ra ruandu' i, 31am katalu i poyo. Gitio nasauk ra katulu' ringai' sangkaaka' i, minatoi ilo ngaangai' am kolondo' anak. 32Pupus i, ruandu' i pana minatoi. 33Paat ra orou kaayagan saguli' no, ati boo rondo' ralaki ru ruandu' ti, sabap ra ilo ringai' nakapanangandu' riso.”
34Taam i Jisus, “Ulun ra raino ti magagandu', 35kaa' ilo ondo' sama' bayagon saguli' am maayag ra mantilayun kalo boo magagandu' ilo. 36Ilo ti koson boo ra malaikat; kalo boo matoi ilo. Masauk ilo ra anak ri Aki Kapuuno' sabap ra binayag ilo intor ra kapatayan. 37 I nabi Musa pana nambala' ra totopot ulun ondo' matoi bayagon saguli'. Koson ra tinulisan intor ra bulungkut nosolob i, indagu io ra i Aki Kapuuno' no ‘Tuhan ondo' sambaan ri Abragam, Isak am i Jakub.’ 38I Aki Kapuuno' sala' ka Tuhan ondo' sambaan ru ulun minatoi, kaa' ulun maayag, sabap ra pagilangan ru Tuhan ngaangai' ulun maayag ayuk.”
39Indagu kukula' ngaulun mangingila' ra Ukum ri Musa, “Natanda' toojo pinataam Muni.” 40Sabap ra sotopot no kalo boo makakau' ilo mangkuot ra atan ayuk pana ri Jisus.
Pangkuatan ra Mamamayag ondo' sinusub ri Aki Kapuuno'
(Mat. 22:41-46; Mrk. 12:35-37)
41Pangkuot i Jisus risilo, “Ati kulaan raguon ru ulun ra Mamamayag ondo' sinusub ri Aki Kapuuno' no papag ru raja' Daut? 42 I Daut galama' minindagu ralalom kitab Mazmur nano, kono,
‘Minindagu i Aki Kapuuno' ra Tuhan kuno:
Panturung tampilon ra pamiris Kutu,
43saboi baalon Ku pantula' Muno kumuku' ngai' Rirun.’
44Amon ru sabiton Io ri Daut ra ‘Tuhan’, ati kulaan Mamamayag ondo' sinusub ri Aki Kapuuno' masauk ra papag ri Daut?”
Mampakara' i Jisus ra ilalain paliso ru mangingila' ra Ukum ri Musa
(Mat. 23:1-36; Mrk. 12:38-40)
45Liliwa' ngaangai' ru ulun nangkirongog ra ragu ri Jisus, indagu i Jisus ra maamaya' Nano, 46“Ilalai' min mangingila' ra Ukum ri Musa. Masaga' ilo mugar am mambayang ra sukub moonsoi am makikiilong ra ulun giu' ra pasar. Manturung ilo ra panturungan pinabatang ra saang ra baloi sambayangan am giu' ra bunsag. 47Mamparuung ilo ra napuor koson talingaawon nilo baloi nilai, kaa' giu' ra saang ru ulun, mabuoi ilo rokokoon makiasi'! Mulu' poyo bagat ru ukuman nilo ra maagu no.”
Currently Selected:
LUKAS 20: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.