LUKAS 19
19
I Jisus am i Jakius
1Tungguli' ri Jisus pangkiralanan Nali sumubol ra Jiriko am pansail Io ra bandar no. 2Giu' i mokoondo' sangulun tingganai ru mampalulur ra cukai makainggalan ri Jakius. Io ti sangulun langkaya'. 3Gumogot io mintutun osoi i Jisus no, kaa' giu' i masuang ulun am kalo makakito io ri Jisus sabap ra ulun magana' io. 4Pasimbul io sigulu ra ulun-ulun no am pangkiwa' ra sampuun tataun sikamor, koson makakito io ri Jisus ra Io mansail ra giu' i. 5Pakasuku' i Jisus ra tuma' ru puun tataun i, katingaa' No am indagu riso, “Jakius, ribaki' tuun! Sabap ra raiti' niayuk mongoi Aku ra baloi muno.”
6Pagindibok i Jakius timinuun am ibito' no i Jisus ra baloi nano nabaya' ra kaansukan. 7Ngaangai' ulun pana sabubutok boo mangalimut magilong ragitio. Konilo, “Ulun ti mapit poyo boo ra baloi ru ulun makatula.”
8Kaa' bigor i Jakius am indagu ri Jisus, “Tuan, rongogo', sampiruo intor ra rapu' kuno tatayaron ku ra ulun musikin, am ondo' rinuung kuli pana, pasagulion ku poyo saboi inggapat suang no!”
9Indagu i Jisus riso, “Orou raiti' akau sambaloi binayag ri Aki Kapuuno', sabap ra okou pana papag ri Abragam. 10 Anak ru Ulun no minatong maguyum am mamayag ra ulun nakalayau.”
Abig ra ruit mas
(Mat. 25:14-30)
11 Maar Io noyo ra Jirusalim am ulun lakat poyo nangkirongog ra ragu Nali. Indoson nilo mamaar noyo i Aki Kapuuno' mamarinta koson ra Raja' ra tana' ti, am tunungo' ri Jisus abig ragitio risilo: 12Indagu Io, “Mokoondo' sangulun langkaya' minongoi ra rondo' pagun ondo' maalur koson saukon io ra sangulun raja'. Kopongo raginio sumaguli' io ra intok nano galama'. 13Kaa' io kalo poyo minugar, piawo' no mopor ngaulun ulipon nali am sinonong ilo anii' ra sampila' ruit mas. Kono, ‘Kinami' min ruangi' ruit ti paat ra aku kalio.’ 14Kaa' mamagun nali galama' pana masisang riso. Pakaugar io, panusub boo mamagun ra ulun mongoi pangator ra bilin riso, kon nilai, ‘Marara' akai ra ulun ti masauk ra raja' mai.’
15Sinauk niayuk ulun i ra raja', am saguli' io ra pagun nali. Piawo' no mopor ngaulun ulipon nali ondo' pinaira' no ra ruit mas i, sabap ra masaga' io makapandai ra kula' poyo suang ru naalap nilai. 16Ratong ulipon ra kasaa' i am indagu, ‘Tuan, nakaalap aku poyo mopor ngampila' ruit mas intor ra ruit ondo' pinairaan muli.’ 17‘Moonsoi toojo,’ kono, ‘Okou no ulipon ra matanda'! Malansanan kou ra kandoi ondo' kalo kula' maatang, paalungin ku rirun mopor ngabandar.’ 18Ratong ulipon ra karuo i am indagu, ‘Tuan, nakaalap aku poyo limo ngampila' ruit mas intor ra ruit ondo' pinairaan muli.’ 19Indagu io riso, ‘Okou pana, paalungin ku rirun limo ngabandar.’ 20Ratong poyo ulipon ra bokon i am indagu, ‘Tuan, ilai' gitio ruit mas muli. Binulian ku ayuk polopoto' ra konoon. 21Sotopot no malaa' aku rirun sabap ra nakapandai aku ra okou ti kolondo' guang. Sala' pana ka okou tatangan, alapon mu niayuk, am sala' ka tinanom mu, kumoson mu niayuk.’ 22Indagu raja' no riso, ‘Okou no ulipon ra kolondo' onong! Ragu muno galama' mangukum rirun. Nakapandai kou noyo ra aku kolondo' guang. Sala' pana ka aku tatangan, alapon ku niayuk, am sala' ka tinanom ku, kumoson ku niayuk. 23Ginio poyo, kua pai' mu paulio' ruit kuli ra bank am ra aku sumaguli' maapu ku boo ruit i mabaya' ra ampos nano.’ 24Kopongo ragili indagu raja' ra ulun-ulun ondo' minigor ra giu' i, ‘Alapo' min ruit mas nano, am pataaki' ra ulipon ondo' mokomopor ngampila' i.’ 25Indagu ilo ra raja' i, ‘Tuan, kaa' mokoondo' io no alia mopor ngampila'!’ 26 Taam ru raja' i, ‘Balain takamin: Osoi ayuk mokoondo' masuang, ruangin poyo. Kaa' osoi kolondo' atan-atan, sanganu ayuk pana ondo' indos no soroi riso, alapon poyo. 27Ilo ondo' nakimantula' raki', ondo' marara' ra aku saukon ra raja', rokopo' am potoyo' min ilo ngaangai' ra saang kutu!’ ”
Inurumat toojo i Jisus sumubol ra bandar Jirusalim
(Mat. 21:1-11; Mrk. 11:1-11; Jua. 12:12-19)
28Karagu gini ri Jisus, sigulu Io risilo am tungguli' No pangkiralanan Nali mongoi ra Jirusalim. 29Maar Io makasuku' ra pamagunan Bitpagi am Bitania, giu' ra Bulur Jaitun, susubo' No ruo ngaulun maamaya' Nano sumigulu 30am bilini' No, “Ongoi kau ra pamagunan giu' ra saang no. Paat ra akau makasuku', makito min sanginan anak kaladai rinukugan, am kalo igondo' kurai' ru ulun. Bugali' am ibito' min anak kaladai no ragiti. 31Amon ru mokoondo' mangkuot ramuyun, ‘Kua bugali' min anak kaladai no?’ Balai' min ulun no, ‘Tuhan makapakuan ragitio.’ ”
32Ugar ilo am katuum nilo ngaangai' ondo' rinagu ri Jisus i motopot. 33Liliwa' ilo namugal ra anak kaladai, indagu tatangan ra kaladai i risilo, “Kua bugali' min anak kaladai no?”
34Taam ilo, “Tuhan makapakuan ragitio.” 35Ibito' nilo boo anak kaladai i ri Jisus. Paapino' nilo sukub nilai ra bakulung ru anak kaladai i am posokoyo' nilo i Jisus. 36Liliwa' Io nangura' ra anak kaladai i, paapino' ru ulun masuang sukub nilai ra ralan ondo' bayaan ri Jisus no.
37Maar i Jisus makasaboi ra Jirusalim, giu' ra ralan tumuun intor ra Bulur Jaitun, talimpuun ngaangai' maamaya' Nano mangangansuk am mongongompor ri Aki Kapuuno' ra bolos mosongou sabap ra ngaangai' kaimuagan ondo' nakito nilai. 38 Konilo, “Kabarakat noyo Io ondo' minatong nabaya' ra kuasa' ru Tuhan! Kaansayan giu' ra suruga', am koompor toojo i Aki Kapuuno'!”
39Indagu boo kukula' ngaulun ru Parisi intor ra ulun masuang no ri Jisus, “Mangingila', susubo' maamaya' Muti mongkoror.”
40Kaa' taam i Jisus, “Balain takamin: Amon ru mongkoror ilo, batu-batu ti ondo' maaru' gumolok.”
Mangiluk i Jisus sabap ra makaasi' ra mamagun ru Jirusalim
41Maar makasuku' ra bandar no, tantangin ri Jisus am tangii' No, 42indagu Io, “Mumpara' bonsoi no ru matutunan mu ngaangai' ondo' magibit ra kaansayan! Kaa' saboi raino, kalo matutunan mu. 43Sabap ra masaboi paat no limpuin kou ru pantula' muno, ampangin am awangin kou ra ngaangai' intok. 44Mamagun muno potoyon am kolondo' rondo' batu pana posoroyon ra intok nano am lunsayon kou. Gitio masauk sabap ra kalo natutunan mu ra minatong noyo i Aki Kapuuno' mamayag rirun!”
Siminubol i Jisus ra Baloi Tuhan
(Mat. 21:12-17; Mrk. 11:15-19; Jua. 2:13-22)
45Subol i Jisus ra Baloi Tuhan i am pagiruo' No ngaangai' mantatalan no, 46 indagu Io risilo, “Tinulisan noyo, ‘Baloi Kutu intok pakiasian.’ Kaa' sinauk min boo ra pansibunian ru mantatakou!”
47 Moonong orou nangila' i Jisus giu' ra Baloi Tuhan. Kaa' tingganai imam Jaudi, mangingila' ra Ukum ri Musa am tingganai ru ulun ru Jaudi mirot toojo mamatoi Riso. 48Kaa' kalo naalap nilo kapatoi, sabap ra ngaangai' ulun nabunduk toojo am mapirot mangkirongog ra raguon nano.
Currently Selected:
LUKAS 19: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.