JAKUBUS 1
1
1 Aku i Jakubus, sangulun ulipon ri Aki Kapuuno' am niayuk ulipon ru Tuhan Jisus Kristus. Kaansayan ku ra ngaangai' ulun ri Aki Kapuuno' ondo' soroi ra titikop ru tana' ti.
Pangintapatan am kapintaran
2Pabukat kau ngai'. Paat ra akau makatuum ra nansalinut pangkinaman, karaa' min gitio koson ra rondo' kaantakan, 3sabap ra napandayan min noyo ra ampos ru akau makagula' ra pangkinaman, iono guang pantataan. 4Ginio ra moonsoi pirot kano pantataan am pai' kano noyo kalawo, saboi matanda' kau toojo am kolondo' boo kalawaan min ra atan ayuk pana. 5Amon ru mokoondo' intor ramuyun no kalo mapintar, moonsoi ru makiasi' io ayuk ri Aki Kapuuno', maa' raginio aniin io ra kapintaran; sabap ri Aki Kapuuno' ti noyo manaak ra osoi ayuk ulun mabaya' ra asi' am kinataau ru guang Nano. 6Kaa' osoi makiasi' no musiti' mangintopot toojo, sala' ka paginduoon guang. Sabap ra osoi ayuk maginduo guang, io ti koson ra kinulun ru raat ondo' maibit ayuk ru angin. 7-8Ulun koson raginio kalo maaru' pamaguangan kapoam kiralan ru kaayagan nano. Ginio ra kalo pana malansan io ra mokoowot no atan-atan intor ra Tuhan.
Musikin am langkaya'
9Musiti' no sangulun Kristian ondo' musikin makaansuk amon ru pasingkoton io ri Aki Kapuuno'. 10 Musiti' no sangulun Kristian ondo' langkaya' makaansuk amon ru paratuon io ri Aki Kapuuno'. Sabap ra pupus no kalangkayaan no mapuso niayuk, mogondo' ra busak ru sakot no molonot. 11Paat ra mato ru orou sumirang ra mapangit toojo, lumonot boo sakot no am busak nano pana matagag, am kolondo' boo kinoonsoi nano. Koson niayuk ra ulun langkaya', pusoon ra tatanga' io mirot mampaugar ra kandoi nano.
Pangkinaman am pamarundukan
12Pakaansuk noyo ulun ondo' tumaan paat ra io makatiu' ra pangkinaman. Sabap ra amon ru magula' no ra io kinamin, makaapu io ra ampos no, ioginio, kaayagan ondo' binantu' ri Aki Kapuuno' ra ulun ondo' motogom Riso. 13Amon ru sasangulun marunduk ru pangkinaman, pai' indagu ra, “Pamarundukan ti intor noyo ri Aki Kapuuno'.” Sabap ri Aki Kapuuno' kalo noyo maalap karunduk ru kalaatan, am kalo niayuk igondo' Io mamarunduk ra osoi ayuk pana. 14Kaa' moonong ulun marunduk amon ru maibit am mimaya' io ru kasagaan malaat ru guang nano galama'. 15Bagu, paat ra kasagaan malaat ru guang imayaan ru sasangulun, makatula io; am amon ru kalo lumonggo' io mambaal ra tula, ginio boo magibit riso ra kapatayan.
16Pabukat kau ngai' ondo' tagamin ku, pai' kano karuung! 17Ngaangai' taak ra moonsoi am kolondo' sala, intor noyo ra suruga'; ioginio intor ri Aki Kapuuno' ondo' nampasauk ra ngaangai' sinda ru limbowon. Io ti kalo noyo makulau koson ra babara' ondo' kalo rumoro'. 18Sumugut ra kasagaan Nano galama', itakau pinakaanak No mansail ra bala' Nano ra motopot ondo' pinasaboi ritakau. Ginio sabap ra nangani' Io poyo ritakau ra intok kasaa' intor ra ngaangai' sinauk Nano.
Mangkirongog am manginsugut
19Pabukat kau ngai' ondo' tagamin ku, karaa' min toojo gitio! Moonsoi ru makapaliso kau ra maluoi mangkirongog, kaa' kalo mataki' manulu' ra bokon am poyo kalo mataki' malasu' guang. 20Ulun ondo' mataki' malasu' guang, kalo noyo makapambaal ra atan ondo' mapabansuk ra guang ri Aki Kapuuno'. 21Ginio nai ra patiri' noyo ngaangai' kaindalaman ra majamol kapoam malaat. Mabaya' boo ra guang minggana', apuo' noyo bala' ri Aki Kapuuno' ondo' porondonon Nano ra guang min. Sabap ra bala' ragitio noyo ondo' makapamayag ramuyun.
22Kaa' suguto' min toojo atan ondo' pinabala' noyo ramuyun ri Aki Kapuuno', am sala' ka rongogon ayuk. Sabap ra amon ru koson raginio, akau ayuk galama' miruruung. 23Ulun ondo' mangkirongog ayuk ra bala' ri Aki Kapuuno', kaa' kalo insuguton no, koson io ra ulun ondo' magilong ra bulos nano galama' ra asilan, 24kaa' kailai' no raiti, mugar io am malilianan no boo baal ru bulos nani. 25Ukum ri Aki Kapuuno' motopot am poyo makakuasa' mampalabus ra ulun. Am ulun ondo' masalok migigila' am manginsugut toojo ra ukum Nano, arati' no, sala' ka mangkirongog ayuk am lilianin boo, io no barakaton ri Aki Kapuuno' ralalom ru ngaangai' ondo' baalon nano.
26Amon ru mokoondo' sasangulun mangkara' ra io ti noyo manginsugut toojo ri Aki Kapuuno', kaa' kalo panantulangon rila' ra io mindagu, io galama' ayuk miruruung am panginsugutan nati pana kolondo' onong. 27Kaa' panginsugutan ra motopot ondo' moonsoi toojo ra pagilangan ri Aki Kapuuno', Ama' takau, ioginio; mangindangan ra lalaing ra kolondo' matuo am poyo napuor ondo' makakapaganan, am niayuk magalung ra guang galama' koson ra kalo jamalin ru kalaatan ru tana' ti.
Currently Selected:
JAKUBUS 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.