IJRA 1
1
Nangiou Raja' Koris ra ulun ru Jaudi muli' ra pagun nilo
1 Paat ra bilor kasaa' ra pamarintaan ru Raja' Koris, raja' ru Pirsia, sinugut ru Tuhan ragu Nano ondo' pinasaboi Nali pinabala' galing ra Nabi Jirimia. Inunsu' ru Tuhan guang ri Raja' Koris maa' raginio mangingkual ra susuban tinulisan, ondo' atarin koson basaan giu' ra titikop ru pamarintaan nano. Bolos no koson ragitio:
2 “Koon ragitio susuban ru Raja' Koris, raja' ru Pirsia: Tuhan, i Aki Kapuuno' panguasa' giu' ra suruga', nampasauk noyo raki' ra raja' ru titikop ru tana' ti. Nangani' Io raki' ra kandoi koson mambaal ra Baloi tayar Nano giu' ra Jirusalim, giu' ra pagun ru Jiuda. 3Gama' ru i Aki Kapuuno' manindung ramuyun ngaangai' ondo' nasauk ra ulun Nano. Musiti' kau sumaguli' ra Jirusalim am mambaal saguli' ra Baloi ru Tuhan, i Aki Kapuuno' ru Israil, i Aki Kapuuno' ondo' sambaan giu' ra Jirusalim. 4Amon ru mokoondo' sasangulun intor ra ulun Nano giti ra intok pamatiran ti ondo' gumogot ra indangan koson ra muli', pasambalayan nano musiti' mangindangan. Musiti' ilo mangani' riso ra pirok am mas, lutu' koson pangkiralanan am niayuk bibiag koson magaut ra kuliamos, am niayuk taak koson ra Baloi ru Tuhan giu' ra Jirusalim.”
5Ginio ra tingganai ru bansa' intor ra bansa' ru Jiuda am Binjamin, imam-imam am niayuk ulun-ulun ru Liwi, am moonong ulun ondo' inunsu' guang no ri Aki Kapuuno', timinampos koson muli' ra Jirusalim am mambaal saguli' ra Baloi ru Tuhan. 6Ngaangai' pasambalayan nilo niayuk nangindangan ra nangani' ra kuliamos ondo' makapakuan: kuliamos ru pirok, mas, lutu' koson ra pangkiralanan, bibiag koson magaut ra kuliamos, rapu' ra bokon am niayuk taak koson Baloi ru Tuhan.
7Pinasaguli' ru Raja' Koris ngaangai' mangkuk am sangkir ondo' ragili pinakai giu' ra ralalom Baloi ru Tuhan giu' ra Jirusalim. Kuliamos no inibit ru Raja' Nibukadnijar am binulian giu' ra ralalom ru kuil ru dewa-dewa nano galama'. 8Pinataak ru Raja' Koris kandoi manalingapu ra kuliamos no ri Mitridat, tingganai ru intok pambulian ra kuliamos ru pamarintaan. I Mitridat pana nambaal boo ra ngaangai' inggalan ru kuliamos no ra tayar ri Sisbajar, gabenor ru pagun Jiuda. 9-10Gitilo noyo suang ru inggalan no:
| mangkuk mas koson ra upacara papataakan | 30 |
| mangkuk pirok koson ra upacara papataakan | 1,000 |
| piring mangkuk ra bokon | 29 |
| mangkuk boborok intor ra mas | 30 |
| mangkuk boborok intor ra pirok | 410 |
| kuliamos ra bokon | 1,000 |
11Ngaangai' no ra suang no 5,400 piring mangkuk intor ra mas am intor ra pirok am niayuk kuliamos ra bokon. Ngaangai' kuliamos no inibit ri Sisbajar intor ra Babilonia mongoi ra Jirusalim, nababaya' ra ulun pinatiran ra bokon.
Currently Selected:
IJRA 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.