SAGULION 1
1
Paguluon
1Kitab ti makasuang ra ragu ondo' pinasaboi ri Musa ra ulun ru Israil paat ilo soroi giu' ra tana' kaagisan giu' ra Limayak Jordan. Limayak raginio giu' ra tampilon sirangon ru Sungoi Jordan, maar ra bandar Sup, lolot ru bandar Paran ra sapapa' am bandar Topil, Laban, Gajirot am Di-Jagab ra sapapa' ra bokon. (2Pangkiralanan intor ra Gunung Sinai mongoi ra Kadis-Barnia mansail ra libung kabuluran Idom, buoi no mopor am rondo' ngoorou.) 3Paat ra orou kasaa' sila' koopor am rondo' ralalom bilor kaapat ngoopor nalupus ilo nangiruan ra Misir, nambala' i Musa ra ulun ru Israil ra ngaangai' ondo' nanusuban ru Tuhan riso, koson posoboyon risilo. 4 Baal ragitio nasauk nalupus Tuhan nangala ra Raja' Sigon, raja' ru ulun ru Amori ondo' namarinta giu' ra bandar Gisybon, am niayuk Raja' Og, raja' Basan, ondo' namarinta giu' ra bandar Asytarot am Idrii. 5Paat ra ulun ru Israil soroi giu' ra tampilon sirangon ru Sungoi Jordan giu' ra Moab, timinalimpuun i Musa nambala' ra sinail ukum am pangilaan ri Aki Kapuuno'.
Indagu i Musa, 6“Paat itakau soroi giu' ra Gunung Sinai, minindagu Tuhan i Aki Kapuuno' takau, ‘Sama' noyo buoi min minayan ra gunung ragitio. 7Raino puwo' pangkiman mino, am ongoi ra intok kabuluran ru ulun ru Amori am giu' ra titikop libung ra liliut no: giu' ra Limayak Jordan, giu' ra intok kabuluran am tana' marata' magana', giu' ra libung tampilon rabugus, am giu' ra nagas ru Raat Tanga'. Ongoi noyo ra tana' ru Kanaan am giu' ra Kagunungan Libanon saboi ra Sungoi Iprat, sungoi ondo' maayo no. 8Aku Tuhan nambantu' noyo koson manaak ra titikop ru tana' ti ra kinamatuaan min i Abragam, i Isak am i Jakub, am niayuk papag nilo. Ongoi noyo am ayani' tana' raginio.’ ”
Nampili' i Musa ra tingganai-tingganai ru bansa'
(Kai. 18:13-27)
9Indagu i Musa ra ulun raginio, “Paat itakau giu' ra Gunung Sinai, kaku ramuyun, ‘Pinalansan koson maningganai ramuyun maagat kaga' raki'. Kalo mabaal ku ginio sangulun. 10Sinauk kau noyo ru Tuhan i Aki Kapuuno' mino ra masuang am koson ra kinasuang ru butitin giu' ra limbowon. 11Gama' ru Tuhan i Aki Kapuuno' ru kinamatuaan min, namparuang ra suang mino saboi saribu ruli' no, am napasauk ramuyun langkaya' koson ra binantu' Nali! 12Kaa' ati kulaan lair aku sangulun makasaan ra pinalansan ondo' maagat koson manalasai ra pansasangaran min? 13Pilio' noyo kukula' ngaulun ungkuyon ondo' mapintar toojo, matanda' am makanailian intor ra moonong bansa', maa' raginio mapili' ku ilo saukon ra tingganai min.’ 14Nangiou kau ra baal raginio moonsoi baalon. 15Ginio ra nampili' aku ra kukula' ngaulun ondo' mapintar toojo am makanailian, ondo' pinili' min noyo intor ra moonong bansa' maa' raginio masauk ra tingganai min. Mokoondo' kukula' ngaulun risilo ondo' pinalansan saribu ngaulun, ondo' bokon no maatus ngaulun, ra limo ngoopor ngaulun, am niayuk ra mopor ngaulun. Nampili' aku niayuk ra pagawai-pagawai ra bokon ra gino ngai' ru bansa' min.
16Paat ragili nambilin aku risilo, ‘Rongogo' toojo pansangaran ondo' nasauk ra gino ngai' ru bansa' min. Pangakim noyo ra moonong pansangaran ra matanda', iou pana ondo' makakulawit ra bansa' min galama', am niayuk ra ulun bansa' ru bokon ondo' minayan ra gino ngai' min. 17Pai' pagimbaso' paat ra okou mamatas; pangakim noyo ra moonong ulun am mamakai ra ralan ra nogondo', kalo ilain osoi ulun no. Pai' kalaa' ra osoi pana, sabap kapatasan ondo' binaal mino kapatasan intor ri Aki Kapuuno'. Amon ru mokoondo' baal ondo' mapagon kaga' ramuyun, pataako' raki' baal raginio; aku mambaal ra kapatasan ra baal raginio.’ 18Paat raginio niayuk tuluin takamin ra ngaangai' baal ra bokon ondo' musiti' baalon min.”
Ulun-ulun pansigo ondo' sinusub intor ra Kadis-Barnia
(Un. 13:1-33)
19“Binaal takau susuban ru Tuhan i Aki Kapuuno' takau. Nangiruan takau ra Gunung Sinai, am minugar nansail ra tana' kaagisan ondo' malangka' am makalalaa', am niayuk sumaboi ra intok kabuluran ru pagun ru ulun ru Amori. Paat itakau nakasaboi giu' ra Kadis-Barnia, 20-21kaku, ‘Raino nakasaboi kau ra intok kabuluran ru pagun ru ulun ru Amori, tana' ondo' tinaakan ritakau ru Tuhan i Aki Kapuuno' takau, Aki Kapuuno' ru kinamatuaan takau. Ilai' noyo, tana' no malangka' ra saang min. Ongoi noyo am ayani' tana' raginio koson ra nanusuban ri Aki Kapuuno'. Pai' kaimamang kapoam kalaa'.’
22Kaa' ratong kau raki' am indagu, ‘Itakau musiti' manusub ra kukula' ngaulun ritakau magulu koson mansigo ra tana' raginio am mambala' ilo ritakau ra ralan moonsoi kaga' ondo' moonsoi bayaan, am baal ru bandar-bandar ra giu' no.’
23Inatangan raginio moonsoi. Ginio ra nampili' aku mopor am ruo ngaulun, sangulun intor ra moonong bansa'. 24Minongoi ilo ra intok kabuluran saboi ra Limayak Iskol, am liminiput ra intok no. 25Nagibit ilo minuli' kikinawa' ritakau, am nambala' ra tana' ondo' pataakon ritakau ru Tuhan i Aki Kapuuno' takano malabung kaga'.
26 Kaa' inanggal min susuban ru Tuhan i Aki Kapuuno' min am kalo masaga' mongoi ra tana' no. 27Pasabutok kau ra akau ngai' liliwa' mindagu, ‘Masisang Tuhan ritakau. Nagibit Io ritakau miningkual intor ra Misir koson pataakon itakau ra ulun ru Amori, maa' raginio mamatoi ilo ritakau. 28Kua kia ongoi takau ra giu'? Malaa' takau. Ulun-ulun pansigo ondo' sinusub takau no nambala' ritakau ra ulun ra giu' no mangaikang poyo am mangasawat poyo intor ritakau. Ulun ra giu' no minayan ra bandar-bandar ondo' timbok no mangasawat saboi ra limbowon. Nakakito ulun-ulun pansigo no ra maayo ulun ra giu'!’
29Kaa' kaku, ‘Pai' kalaa' ra ulun ra giu'. 30Maningganai Tuhan i Aki Kapuuno' ramuyun. Makimantula' Io ra tayar min, koson ondo' nakito min noyo galama' giu' ra Misir 31 am giu' ra tana' kaagisan. Nakakito kau noyo Riso naningganai ramuyun ra matanda' buoi ra pangkiralanan mongoi ra intok ragitio, koson ra sangulun ama' nagiba' ra anak nano.’ 32 Kaa' kabalu' pana minindagu aku koson raginio, magulayun kau kalo masaga' mangintopot ra Tuhan, 33kabalu' pana masalok Io mugar giu' ra saang min koson maguyum ra intok pangkiman ramuyun. Soroi io ra saang min ralalom lugu' ru apui paat ra rondom ti am ralalom lugu' ru gaun paat ra matawang, koson manulu' ramuyun ra ralan.”
Nangukum Tuhan ra Israil
(Un. 14:20-45)
34 “Norongog ru Tuhan butok min am sangit Io. Indagu Io, 35‘Kolondo' sangulun pana ramuyun intor ra sukor ra mangalaat ti mokoongoi ra tana' ondo' malabung no, ondo' binantu' Ku noyo koson pataakon ra kinamatuaan min. 36I Kalib anak ri Jipuni ayuk mokoongoi ra giu', sabap magulayun io giminagaya' Raki'. Manaak Aku ri Kalib am papag nano ra tana' ondo' liniput nano.’ 37Sabap ra akau, siminangit niayuk Tuhan raki' am indagu, ‘Musa, okou pana kalo mokoongoi ra tana' raginio. 38Kaa' kaikango' noyo guang ru mangindangan rirun, i Josua anak ri Nun, sabap maningganai io ra Israil koson mayan ra tana' no.’
39Indagu boo Tuhan ritakau ngai', ‘Anak-anak mino ondo' lakat poyo mamulok kaga' koson mapasuai ra motopot intor ra sala, mokoongoi ra tana' raginio, iono anak-anak ondo' rinagu min ra rokopon ru pantula'. Manaak Aku risilo ra tana' raginio, am ayanin nilo. 40Kaa' akau, talikur am saguli' noyo ra tana' kaagisan mansail ra ralan ondo' sumaboi ra Teluk Akaba.’
41Taam kau, ‘Musa, makatula akai noyo ra Tuhan. Kaa' raino sumonsog akai mangayou koson ra nanusuban ru Tuhan i Aki Kapuuno' takau.’ Mopongo raginio moonong ulun ra gino ngai' min nakatampos mongoi pangayou, am nangkara' ra matasu' ayuk mangayan ra intok kabuluran raginio.
42Kaa' indagu Tuhan raki', ‘Pai' ilo polosoo' sumonsog mangayou sabap ra kalo maya' Aku risilo, am kalaan ilo ru pantula'.’ 43Nampasaboi Aku ra bala' ru Tuhan ramuyun, kaa' kalo linio min. Giminuor kau ra Tuhan, am ra limbau mino minongoi kau ra intok kabuluran koson mangayou. 44Ulun ru Amori pana ondo' minayan ra intok kabuluran no miningkual namulunsar ramuyun. Koson ilo ra maningot ondo' napagiru' ramuyun. Nangilou ilo ramuyun saboi ra Orma, am nangala ramuyun giu' ra intok kabuluran ru pagun Idom. 45Saguli' kau boo am pampiau ra Tuhan makiindangan, kaa' kalo rinongog No kapoam nampalio ramuyun.”
Bilor-bilor giu' ra tana' kaagisan
46“Kopongo raginio minayan takau giu' ra Kadis ra nabuoi kaga'.
Currently Selected:
SAGULION 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.