SAGULION 2
2
1 Pupus no, sumugut ra susuban ru Tuhan, siminaguli' takau ra tana' kaagisan nansail ra ralan ondo' sumuku' ra Teluk Akaba. Nabuoi kaga' itakau timinanggau giu' ra intok kabuluran ru pagun Idom.
2Kopongo raginio nambala' Tuhan raki' 3ra nabuoi kaga' itakau timinanggau giu' ra kabuluran no, am musiti' mongoi takau giu' ra ralayo. 4 Nanusub Io raki' manaak ra panuluan ragitio ramuyun, ‘Kalo boo mabuoi mumpos kau ra intok kabuluran ru pagun Idom, wilayah ru pabukat mino, iono papag ri Isau. Malaa' ilo ramuyun kaa' kalo iowon kau 5mantula' risilo, sabap ra kalo masaga' Aku manaak ramuyun ra samito persegi pana intor ra tayar ru tana' nilo. Nanaak Aku noyo ra pagun Idom no ra papag ri Isau. 6Makapambali kau ra akanon am timug intor risilo.’
7Karaa' noyo! Nambarakat noyo Tuhan i Aki Kapuuno' min ramuyun ralalom ru ngaangai' pirot min. Nagalung Io ramuyun buoi akau timinanggau ra tana' kaagisan ondo' malangka' ti. Nanindung Io ramuyun buoi apat ngoopor ngambilor am nanaak ra ngaangai' ondo' pakuan min.
8Itakau pana narayus boo ugar, am mangiruan ra ralan ondo' mansail ra bandar Ilat am Ijion-Gibir, ondo' sumuku' ra Raat Matoi, am likou takau ra sirangon ralayo am sumuku' ra tana' kaagisan giu' ra Moab. 9 Tuhan pana mindagu raki', ‘Pai' jojowo' ulun ru Moab, papag ri Lot, kapoam mangayou risilo. Nanaak aku noyo risilo ra tana' Ar, am kalo manaak Aku ramuyun ra kasanganu pana intor ra tana' nilo.’
(10Galing i ulun ru Imim, rondo' bansa' ru maayo ulun, minayan giu' ra Ar. Masawat ilo koson ra ulun ru Inak ondo' niayuk bansa' ru maayo ulun. 11Koson ra ulun ru Inak, ulun ru Imim niayuk nauligan ra ulun ru Ripaim, kaa' ulun ru Moab nanginggalan risilo ra ulun ru Imim. 12Galing i ulun ru Or minayan giu' ra Idom, kaa' pinagiru' am pinuso ilo ru papag ri Isau. Papag ri Isau pana nangayan ra tana' nilo, nogondo' koson ra ulun ru Israil, ondo' paat orou tauli napagiru' ra pantula' intor ra tana' ondo' tinaakan ru Tuhan risilo.)
13Itakau pana liminaup ra Sungoi Jirid koson ra nanusuban ru Tuhan. 14 Sauk raginio nasauk talu ngoopor am balu' ngambilor malupus itakau nangiruan ra Kadis-Barnia. Ngaangai' ulun ondo' makapangayou intor ra ulun ondo' minatoi noyo, koson ondo' rinagu ru Tuhan. 15Nararayus Tuhan giminula' risilo saboi pupus no napuso ilo ngaangai'.
16Kopongo ilo ngaangai' minatoi, 17indagu Tuhan ritakau, 18‘Paat orou raiti' mansail kau ra wilayah Moab, maya' ra ralan ondo' mansail ra bandar Ar. 19 Mamaar kau boo ra pagun ru ulun ru Amon, papag ri Lot. Pai' jojowo' kapoam pamulunsar risilo, sabap kalo manaak Aku ramuyun ra kasanganu pana intor ra tana' ondo' tinaakan Ku noyo risilo.’
(20Wilayah raginio niayuk nauligan ra tana' ru ulun ru Ripaim, sumugut ra inggalan ru bansa' ondo' minayan ra giu' no ragili; ulun ru Amon nanginggalan ra bansa' raginio Jamjumim. 21Ulun ru Ripaim makainan masawat koson ra ulun ru Inak. Maikang ilo kaga' am masuang ilo, kaa' namuso Tuhan risilo maa' raginio makaayan ulun ru Amon ra tana' raginio. 22Koson raginio niayuk ondo' binaal ru Tuhan ra ulun ru Idom, iono papag ri Isau, ondo' minayan giu' ra intok kabuluran ru Idom. Namuso Tuhan ra ulun ru Or maa' raginio mayan ulun ru Idom ra tana' nilo. Saboi raino lakat poyo mayan ulun ru Idom ra giu'. 23Tana' giu' ra igig ru nagas Raat Tanga' inayanan ru ulun intor ra pulu' Krita. Namuso ilo ra ulun ru Awi, mamagun toojo ru intok raginio, am nampagaau ra titikop ru tana' ra giu' no saboi ra bandar Gaja, giu' ra tampilon rabugus.)
24Pakasail takau ra Moab, indagu Tuhan ritakau, ‘Raino ugar kano am laup kano ra Sungoi Arnon. Pataakon Ku ramuyun i Sigon, raja' ru Amori intor ra Gisybon, am niayuk tana' nano. Bulunsaro' noyo io am ayani' noyo tana' nano. 25Intor orou raiti' mangkinibit Aku ra bansa'-bansa' ra ati ayuk, malaa' ramuyun. Moonong ulun monontol sabap malaa' paat mokorongog ra inggalan min sabiton.’ ”
Ulun ru Israil nangala ra Raja' Sigon
(Un. 21:12-30)
26“Kopongo raginio nangator aku ra kukula' ngaulun sinusub intor ra tana' kaagisan Kidimot mongoi ra Raja' Sigon giu' ra Gisybon, am labati' ra pabansayan ragitio: 27‘Iowo' noyo ra akai ngaangai' mansail ra pagun muno. Marayus akai ngaangai' mugar ra kalo lumisang ra ralan. 28Mambayar akai ngaangai' ra akanon ondo' akanon mai am inumon ondo' inumon mai. Masaga' akai mansail ayuk ra pagun muno, 29saboi makalaup akai ra Sungoi Jordan koson mongoi ra tana' ondo' pataakon ramon ru Tuhan i Aki Kapuuno' mai. Papag ri Isau minayan giu' ra Idom am ulun ru Moab minayan giu' ra Ar, nangiou noyo ramon mansail ra wilayah nilo.’
30Kaa' kalo nangiou Raja' Sigon ritakau nansail ra pagun nano. Ginio ra Tuhan i Aki Kapuuno' nangkinibit ra Raja' Sigon bambalingatan am mingkotog manggal ritakau, maa' raginio makapangala takau riso am mampagaau ra wilayah nano, ondo' inayanan takau saboi raino.
31Indagu boo Tuhan raki', ‘Ilai' noyo, pinataak Ku noyo ramuyun Raja' Sigon am pagun nano. Gaawo' noyo am ayani' noyo tana' nano.’ 32Ingkual Raja' Sigon nabaya' ra ngaangai' ulun nano koson mamulunsar ritakau maar ra bandar Jagas, 33kaa' Tuhan i Aki Kapuuno' takau napataak riso ritakau. Pinatoi takau Raja' Sigon, anak-anak ungkuyon nano am ngaangai' ulun nano. 34Paat raginio niayuk ginaau am linunsai takau moonong bandar, am namatoi ra moonong ungkuyon, ruandu' am niayuk lalaing. Kalo nompoloso takau ra sangulun pana maayag. 35Inalap takau bibiag tinambiag am ginaau takau bandar nilo. 36Tuhan i Aki Kapuuno' takau nangindangan ritakau nampagaau ra ngaangai' bandar, intor ra Aroir giu' ra pompor ru limayak Arnon, am bandar ondo' giu' ra tanga' ru limayak no saboi ra libung Giliad. Kolondo' rondo' pana bandar makatimbok ondo' mapiot kaga' ritakau. 37Kaa' kalo mininggaar takau ra wilayah ru ulun ru Amon, kapoam igig ru Sungoi Jabok, kapoam bandar ra ati pana giu' ra intok kabuluran kapoam intok ra bokon ondo' inggalarin ru Tuhan i Aki Kapuuno' takau.”
Currently Selected:
SAGULION 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.