LUKAS 5
5
I Jisus mampili' ra maamaya' Nano ondo' kasaa'
(Mat. 4:18-22; Mrk. 1:16-20)
1 Paat ra rondo' orou, nangintairoi i Jisus ra nagas ru tasik Ginisarit. Masuang ulun liminimpu Riso koson mangkirongog ra Bala' intor ri Aki Kapuuno'. 2Kakito ri Jisus ruo parau ra nagas i. Ulun-ulun mangingimpait minasak intor ra parau am mambagu' ra ralo nilai. 3Rondo' intor ra parau raginio i Simon tatangan. Gitio sinakayan ri Jisus am panusub Io ri Simon mompoloyog koborok ra parau no. Panturung i Jisus am pangila' ra ulun masuang.
4Kakai' Io nangila', indagu Io ri Simon, “Kabili' parau mutu ra malandom no am paatango' ralo muno koson mampasulung ra papait.”
5 Indagu i Simon, “Tuan, saboi nasuaban akai namparalo, kaa' kolondo' siminulung! Kaa' amon ru okou manusub, paatangon ku poyo ralo ti.” 6 Pakaatang ralo nilai, nakaalap ilo ra masuang papait saboi mamaar marilak ralo nilai. 7Ginio ra pangulawi ilo pakiindangan ra rangan nilo ra bokon i intor ra parau ra bokon. Ratong rangan nilai, suangi' nilo karuruo parau i ra papait saboi napanu' am maar makalom parau nilai. 8Kakito ri Simon baal raginio, igulatur io ra saang ri Jisus am indagu, “Iruani' aku, Tuhan! Sabap ra aku ti ulun makatula!”
9I Simon am ngaangai' ulun pababaya' nali nangimuag nakakito ra masuang kaga' papait noowot nilai. 10Rangan-rangan ri Simon pana naliangan. Ilo ti am i Jakubus am i Juanis, karuruo ti anak ri Jibidius. Indagu i Jisus ri Simon, “Pai' kalaa'! Intor raino mangkimait kou ra ulun mangintopot Raki'.”
11Paasako' nilo parau nilai am iruani' nilo ngaangai' no am baya' ilo ri Jisus.
Namabas i Jisus ra sangulun ungkuyon makamaruol ra kungkung ondo' maaja'
(Mat. 8:1-4; Mrk. 1:40-45)
12Paat ra sangarawan, soroi i Jisus ra rondo' pekan am giu' i mokoondo' sangulun ungkuyon makamaruol ra kungkung ondo' maaja'. Napuu inan nali ra maruol no. Pakakito io ri Jisus, igulatur io ra saang Nali am indagu, “Tuan, amon ru masaga' Kou, maalap Mu aku ra babas!”
13Pokopoo' boo ri Jisus kalindu' Nali ra ulun no liliwa' minindagu, “Masaga' Aku, kapali' no!” Paat ragili niayuk nairu' maruol ru ulun i. 14 Nanginggalar i Jisus ra ulun no mantunung ra osoi ayuk pana ra atan nasauk riso. Indagu Io, “Sumugut ra Ukum ri Musa, ongoi no ra imam Jaudi am polosoo' io mangiou ra okou nababas noyo. Panaak boo niayuk ra taak simbalui maya' ra susuban ralalom Ukum ri Musa, koson tatandu' muno ra ngaangai' ulun ra napali' kono.”
15Kaa' nakatabual poyo tanou intor ri Jisus ti saboi masuang ulun minatong mangkirongog am makibabas Riso. 16Kaa' masalok i Jisus mongoi ra intok masiluk ra masaga' Io poyo makiasi'.
Namabas i Jisus ra sangulun kalo makalulu'
(Mat. 9:1-8; Mrk. 2:1-12)
17Sangarawan ragili paat i Jisus nangila', mokoondo' kukula' ngaulun ru Parisi am mangingila' ra Ukum ri Musa nantuturung mangkirongog Riso. Minatong ilo intor ra bandar Jirusalim am poyo intor ra moonong intok giu' ra libung Galilia am Judia. Kuasa' ru Tuhan siminoroi ri Jisus koson mamabas ra ulun marualan. 18Paat ragili ratong kukula' ngaulun ungkuyon namandas ra sangulun ungkuyon ondo' kalo makalulu'. Ulun no pinalangan ra intok namandasan. Kinamin nilo paumposo' ulun no ra baloi no paumaan ri Jisus. 19Kaa' kalo nakaumpos ilo sabap ra masuang kaga' ulun ra giu' i. Ginio ra pagaloi ilo ra rasawat ru baloi am sukiapo' nilo taap i. Patuuno' nilo ulun no nabaya' ra bandasan nali giu' ra tuma' ri Jisus ra tatanga' ru ulun masuang. 20Pakakito i Jisus ra maikang pangintapatan nilai, indagu Io ra ulun no, “Rangan, tula muno inampun noyo.”
21Kaa' mangingila' ra Ukum ri Musa am ulun-ulun ru Parisi nansusunur ra rondo' am bokon, “Osoi ulun ragitio ondo' makakau' magasab ri Aki Kapuuno'? Osoi mangampun ra tula kaa' i Aki Kapuuno' ayuk galama'?”
22Nakapandai i Jisus ra pamaguangan nilai, indagu Io, “Kua pampaguang kau koson raginio? 23Ati kia matasu' raguon, ‘Inampun noyo tula muno’, kapoam mindagu ra, ‘Sukal am ugar no’? 24Kaa' raino aniin takamin ra tatandu' ra Anak ru Ulun makakuasa' ra tana' ti mangampun ra tula.” Indagu boo i Jisus ra ulun kalo makalulu' no, “Sukal no, kayango' noyo bandasan muno am uli' no!”
25Tirong ulun no ra saang nilai ngaangai'. Kayango' no bandasan nali am uli' liliwa' nongompor ri Aki Kapuuno'. 26Nokosolong ngaangai' ulun am pongompor ilo ri Aki Kapuuno'. Nabaya' ra pangkaraan malaa', konilo, “Orou raiti' nakakito takau ra kaimuagan.”
Nampiau i Jisus ri Liwi
(Mat. 9:9-13; Mrk. 2:13-17)
27Kopongo ragili, ugar i Jisus am pakakito Io ri Liwi, sangulun mampalulur ra cukai. Panturung io ra pangandayan nali. Indagu i Jisus riso, “Baya' Raki'.” 28Bigor i Liwi am iruani' no ngaangai', am baya' io boo ri Jisus.
29Kopongo ragili pambaal i Liwi ra rondo' bunsag giu' ra baloi nano koson mangiantak ra ratangan ri Jisus. Masuang mampalulur ra cukai am ulun ra bokon poyo giminulung pangakan risilo. 30 Kukula' ngaulun ru Parisi am mangingila' ra Ukum ri Musa kalo naansayan ilo raginio. Konilo ra maamaya' ri Jisus, “Kua gulung kau pangakan am panginum ra ulun mampalulur ra cukai am poyo ulun ondo' karaan ra malaat?”
31Taam i Jisus, “Pai' ru ulun maligag makibabas kaa' ulun marualan ayuk. 32Aku minatong sala' ka mampiau ra ulun ondo' moonsoi rokokoon, kaa' ulun makatula koson tumalikur ilo intor ra tula.”
Pangkuatan ra mampali
(Mat. 9:14-17; Mrk. 2:18-22)
33Indagu kukula' ngaulun ri Jisus, “Maamaya' ri Juanis no am maamaya' ra ulun-ulun ru Parisi no masalok mampali am makiasi'. Kaa' maamaya' Muti mangakan am manginum ilo.”
34Taam i Jisus, “Makapanusub kau kia ra ulun ondo' minongoi sual ra bunsag ru paguguatan no mampali, amon ru ungkuyon uatin lakat ayuk poyo soroi risilo? Maaru' kalo! 35Kaa' masuku' ungkuyon uatin no alapon intor risilo am kalio boo, paat raginio niayuk ilo mampali.”
36Tunungo' boo ri Jisus risilo abig ragitio: “Kolondo' sangulun pana mampaangkup ra sabinsang konoon intor ra bayang baguon ra bayang lairon. Amon ru baalon no ginio, maaru' makumbo bayang baguon no am niayuk kalo matimpok amon ru bibinsang baguon paangkupon ra bayang lairon. 37Koson niayuk ra kolondo' sangulun pana mampalingig ra wain baguon ralalom kantungan kungkung ondo' lairon. Maaru' marilak kantungan no sabap ra wain baguon no, am lumawas boo wain no am kantungan no pana maapu'. 38Kaa' wain baguon no maaru' lingigon ralalom kantungan baguon niayuk. 39Koson niayuk ra osoi ayuk pana maindalom manginum ra wain ondo' lairon, marara' io boo manginum ra wain ondo' baguon. Sabap ra, ‘Lairon no moonsoi kaga',’ kono.”
Currently Selected:
LUKAS 5: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.