LUKAS 3
3
Tanou ondo' posoboyon ri Juanis Mampariu'
(Mat. 3:1-12; Mrk. 1:1-8; Jua. 1:19-28)
1Paat ra bilor koopor am limo ra pamarintaan ra Kaisar Tibirius, i Pontius Pilatus nasauk ra gabenor ru Judia; raja' Irodis namarinta giu' ra pagun Galilia; Pongkotob ri Irodis, raja' Pilipus, namarinta giu' ra pagun Ituria am Trakonitis; raja' Lisanias namarinta giu' ra pagun Abilini. 2Paat ri Anas am i Kayapas nasauk ra Tingganai Maayo imam Jaudi, minindagu i Aki Kapuuno' ri Juanis, anak ri Jakaria, giu' ra tana' kaagisan. 3Ongoyo' boo ri Juanis ngaangai' intok ra libung ru Sungoi Jordan am nampatanou ra bala' ri Aki Kapuuno', kono, “Talikur kano intor ra tula mino am pakiriu' kau, maa' raginio ampunon kau ri Aki Kapuuno'.” 4 Ragu ri Juanis koson ra tinulisan ra kitab ru nabi Jisaya,
“Makaulun mampipiau giu' ra tana' kaagisan,
‘Pongoono' noyo ralan ru Tuhan,
baniso' noyo pansailan Nano.
5Moonong limayak pumpunin,
moonong gunung am bulur lampayon.
Ralan ra parikou-rikou banison,
am ralan ra takulubok pumpunin.
6Ngaangai' ulun ru tana' ti makakito
ra ati kulaan i Aki Kapuuno' mamayag ra ulun!’ ”
7 Masuang ulun minatong makiriu' ri Juanis. Indagu i Juanis risilo, “Ulun malaat kau! Osoi mindagu ramuyun ra makapagiru' kau intor ra sangit am ukum ri Aki Kapuuno' ra maagu no? 8 Pakitono' min noyo paliso am baal mino ra nakatalikur kano intor ra tula mino! Pai' kau indagu ra rondo' am bokon ra kinamatuaan mini am i Abragam. Karaa' min! Intor ra batu-batu ti pana maangun ri Aki Kapuuno' ra papag ri Abragam! 9 Raino mokoondo' noyo panaa' koson mantagar ra puun ru tataun suku' ra bakat nano. Moonong puun ondo' kalo mangkawa' ra moonsoi, tagaron am solobon ra apui.”
10Pangkuot ulun masuang ri Juanis, “Amon ru koson poyo raginio, atan kia musiti' baalon mai?”
11Taam i Juanis, “Osoi ayuk makabayang ruo, taaki' rondo' ra ulun kolondo' bayang! Osoi ayuk mokoondo' ra akanon, tayaro' akanon no!”
12 Ulun-ulun ondo' mampalulur ra cukai, minatong ri Juanis koson makiriu'. Pangkuot ilo, “Mangingila', atan musiti' baalon mai?” 13Taam i Juanis, “Pai' min kologoo' cukai no intor ra ondo' inaru' no.”
14Mokoondo' niayuk saujor nangkuot, “Ati kulaan ramon? Atan musiti' baalon mai?”
Taam i Juanis, “Pai' kau pampagaau ra ruit ru osoi ayuk pana am pai' kau pangilalaa' ra ulun koson mangalap ra ruit nilo. Sama' noyo ra gaji' mino galama'!”
15Liliwa' ragitio niayuk tumalimpuun ulun mampaguang ru i Juanis ti noyo kia Mamamayag ondo' sinusub ri Aki Kapuuno'. 16Kaa' indagu i Juanis risilo, “Aku ti mampariu' ramuyun ra timug ayuk, kaa' ra maagu no matong sangulun ondo' maayo kuasa' Nano intor raki'. Mamagus ra kasut Nano pana kalo maaya' aku. Mampariu' Io ramuyun ra Ambiluo ri Aki Kapuuno' am apui. 17Io ti koson ra ulun ondo' mangatap ra ngaangai' gandum no saboi mapasau, am timungon no ralalom ru kulapa'. Kaa' ngaangai' apol solobon ra apui ondo' kalo malasa' ra sabubuoi.”
18Paat ri Juanis nampasaboi ra Tanou Moonsoi ra ulun, masuang poyo bilin rinagu nano risilo. 19 Kaa' nansawai i Juanis ra raja' Irodis, gabenor ru pagun Galilia, ra io namundus ra andu' ru pongkotob nano. Inggalan ru ruandu' no am i Irodias. Am masuang poyo kalaatan ra bokon ondo' binaal nano. 20Kaa' giminaai poyo boo laat ru raja' Irodis koson pinaaputan no i Juanis ra lamin pangaputan.
I Jisus riniu'
(Mat. 3:13-17; Mrk. 1:9-11)
21Kakai' ngaangai' ulun riniu', i Jisus pana riniu'. Paat ra Io nakiasi', naukab limbowon 22 am Ambiluo ri Aki Kapuuno' koson ra baal ru susuit asang timinuun Riso. Morongog boo bolos ri Aki Kapuuno' mambala', “Okou noyo Anak Kuno ondo' tagamin Kuno, maansayan Aku Rirun.”
Suang ru kinamatuaan ri Jisus
(Mat. 1:1-17)
23I Jisus nanalimpuun ra kandoi Nano ra Io talu ngoopor ngambilor. Sumugut ra tunung ru ulun, anak Io ri Jusup. I Jusup anak ri Ili. 24I Ili anak ri Matat, i Matat anak ri Liwi, i Liwi anak ri Malki, i Malki anak ri Janai, i Janai anak ri Jusup. 25I Jusup anak ri Matatias, i Matatias anak ri Amos, i Amos anak ri Nagum, i Nagum anak ri Isli am i Isli anak ri Nagai. 26I Nagai anak ri Maat, i Maat anak ri Matatias, i Matatias anak ri Simii, i Simii anak ri Josik am i Josik anak ri Joda. 27I Joda anak ri Joganan, i Joganan anak ri Risa, i Risa anak ri Jirubabil, i Jirubabil anak ri Sialtiil am Sialtiil anak ri Niri. 28I Niri anak ri Malki, i Malki anak ri Adi, i Adi anak ri Kosam, i Kosam anak ri Ilmadam am i Ilmadam anak ri Ir. 29I Ir anak ri Josua, I Josua anak ri Iliijir, i Iliijir anak ri Jorim, i Jorim anak ri Matat am i Matat anak ri Liwi. 30I Liwi anak ri Simion, i Simion anak ri Jiuda, i Jiuda anak ri Jusup, i Jusup anak ri Jonam am i Jonam anak ri Iliakim. 31I Iliakim anak ri Milia, i Milia anak ri Mina, i Mina anak ri Matata, i Matata anak ri Natan am i Natan anak ri Daut. 32I Daut anak ri Isai, I Isai anak ri Obid, i Obid anak ri Boas, i Boas anak ri Salmon am i Salmon anak ri Nagason. 33I Nagason anak ri Aminadab, i Aminadab anak ri Admin, i Admin anak ri Arni, i Arni anak ri Gijron, i Gijron anak ri Piris am i Piris anak ri Jiuda. 34I Jiuda anak ri Jakub, i Jakub anak ri Isak, i Isak anak ri Abragam, i Abragam anak ri Tirag am i Tirag anak ri Nagor. 35I Nagor anak ri Sirug, i Sirug anak ri Riyu, i Riyu anak ri Pilig, i Pilig anak ri Ibir am i Ibir anak ri Sila. 36I Sila anak ri Kinan, i Kinan anak ri Arpaksad, i Arpaksad anak ri Siim, i Siim anak ri Nuu am i Nuu anak ri Lamik. 37I Lamik anak ri Mitusila, i Mitusila anak ri Ginok, i Ginok anak ri Jarid, i Jarid anak ri Magalaliil am i Magalaliil anak ri Kinan. 38I Kinan anak ri Inos, i Inos anak ri Sit, i Sit anak ri Adam am i Adam anak ri Aki Kapuuno'.
Currently Selected:
LUKAS 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.