LUKAS 22
22
Mangatang ra orou mamatoi ri Jisus
(Mat. 26:1-5; Mrk. 14:1-2; Jua. 11:45-53)
1 Mamaar noyo Pangiantakan ra Ruti' Kalo Linatakan ra Ragi ondo' sabiton ra Paska. 2Tingganai imam Jaudi am mangingila' ra Ukum ri Musa no maguyum ra kaluagan mamatoi ri Jisus ra kalo mapandayan ru ulun, sabap ra nalaa' ilo ra ulun masuang.
I Judas nampataak ri Jisus ra pantula' Nano
(Mat. 26:14-16; Mrk. 14:10-11)
3I Judas, ondo' sabiton ri Iskariot, sinubol ru Tingganai ru riwato. I Judas ti sangulun intor ra mopor am ruo ngaulun maamaya' ri Jisus. 4Ongoi boo i Judas am pansusunur ra tingganai imam Jaudi am tingganai ru magagalung ra Baloi Tuhan no ra ati kulaan i Jisus rokopon am pataakin risilo. 5Naansukan am nangiou ilo koson mangani' ri Judas ra ruit. 6I Judas pana nangiou am intor ragili maguyum io ra kaluagan ra ati kulaan io mampataak ri Jisus ra kalo mapandayan ru ulun.
Momongo ra intok pagakanan ru Paska
(Mat. 26:17-25; Mrk. 14:12-21; Jua. 13:21-30)
7Nasuku' noyo orou ra Pangiantakan ra Ruti' Kalo Linatakan ra Ragi, ioginio paat anak domba simbaluyon ra pagakanan ru Paska. 8Panusub i Jisus ri Pitrus am i Juanis, indagu Io, “Ongoyo' min pongoono' kalalair intok pagakanan takau ra Paska.”
9Pangkuot ilo, “Ati ra intok kasagaan Muno pongoonon mai?”
10Taam i Jisus, “Ra akau sumubol ra bandar, makatuum kau ra sangulun ungkuyon muli' nansagou. Sunuo' min io suku' ra baloi umpasan nano, 11am kamin ra tatangan ru baloi no, ‘Kon ru Mangingila', ati nua' intok pagakanan Kuno am maamaya' Kuno ra Paska?’ 12Tuluin kau ru ulun no rondo' lamin maayo ra rasawat ondo' natampos noyo. Pongoono' min ayuk ra giu' no ngaangai'.”
13Ongoi ilo am katuum nilo ngaangai' ondo' rinagu ri Jisus i, am pongoono' nilo boo intok pagakanan ru Paska no.
Pagakanan ru Tuhan
(Mat. 26:26-30; Mrk. 14:22-26; 1 Kor. 11:23-25)
14Kasuku' pagakanan ru Paska no, nantulibung i Jisus am rasul-rasul Nano ra rondo' mija'. 15Indagu Io risilo, “Masaga' Aku toojo mangakan ra pagakanan ru Paska ti magugulung ramuyun ra Aku kalo poyo imboloon! 16Balain takamin: Kalo boo mangakan Aku ra pagakanan ragitio saboi ra arati' nati pabalaan giu' ra Tana' Bagu ri Aki Kapuuno'.”
17Kopongo ragili alapo' boo ri Jisus sangkir, paringkuanang Io ri Aki Kapuuno', am indagu, “Alapo' min gitio, am sonongo' min tatayaro'. 18Balain takamin: Intor raino kalo boo manginum Aku ra wain ti saboi i Aki Kapuuno' mamarinta ra ngaangai'.”
19Kopongo ragili alapo' No boo ruti', paringkuanang Io ri Aki Kapuuno', pipilango' am tatayaro' No risilo, liliwa' minindagu, “Gitio noyo inan Kutu, ondo' pataakon ramuyun. Baalo' min gitio koson ra pangkaraan min Raki'.” 20 Koson niayuk raginii, kopongo ilo nangakan, pataako' No sangkir i risilo liliwa' minindagu, “Sangkir ragitio nabantuan bagu ri Aki Kapuuno', saukon ralalom ru raraa' Kuno, ondo' pasasaron ramuyun.
21 Kaa' ilai'! Ulun ondo' mampataak Raki' soroi ragiti liminibung ra mija' ti! 22Anak ru Ulun matoi koson ra inaru' ri Aki Kapuuno'; kaa' aibui boo ra usung ru ulun ondo' mampataak Riso!”
23Ilo pana tumalimpuun boo mangkukuot ra rondo' am bokon, ra osoi nua' intor risilo mambaal raginio.
Pagansangan ra osoi maatang
24 Mamaya' ri Jisus nagagansang ra osoi kia intor risilo i maatang kaga'. 25 Indagu i Jisus risilo, “Raja' ru tana' rati makakuasa' ra mamagun nilono, am mokoondo' intor risilo no sabiton ra ‘Manindung ra mamagun’. 26 Kaa' pai' kau tilu raginio. Sotopot no, ulun ondo' maatang kaga' intor ramuyun musiti' masauk koson ra ulun mamulok am niayuk osoi ayuk tingganai min musiti' io masauk koson ra ulipon. 27 Osoi maatang kaga'? Ulun ondo' manturung pangakan ra mija' kia, kapoam ondo' mampasulung riso no? Ondo' manturung pangakan ra mija' tupo. Kaa' Aku soroi ra tatanga' min koson ra ulun ondo' mampasulung.
28Kaa' siminimpung kau Raki' buoi ru pangkinaman Kutu. 29Koson niayuk ra Aku inanian ru Ama' Kuno ra kuasa' mamarinta, Aku pana mangani' ramuyun ra kuasa' raginio. 30 Mangakan am manginum kau ra rondo' mija' mababaya' Raki' paat ra Aku masauk ra raja'. Akau pana saukon ra raja' koson mangakim ra mopor am ruo ngantayaran bansa' ru Israil.”
Manala' i Jisus ra magali' i Pitrus Riso
(Mat. 26:31-35; Mrk. 14:27-31; Jua. 13:36-38)
31“Simon, rongogo'! Tingganai ru riwato no iniou noyo mangkinam ramuyun ngaangai' koson ra sangulun mangatap ra bilor. 32Kaa' nakiasi' Aku noyo ra pangintapatan muno kalo malawo. Ra okou sumaguli' Raki', okou tupo niayuk mampaikang ra pangintapatan ru pabukat-pabukat muno.”
33Taam i Pitrus, “Tuhan, aputon kapoam matoi marumar Rirun pana, nakatampos aku noyo!”
34Indagu i Jisus, “Pitrus, balain tokou; ra kalo poyo maningkuluuk manuk tandaa' no rondom raiti', intalu kono magali' ra nakaulig kou Raki'.”
Rumpit, kantungan am ilang
35 Pangkuot boo i Jisus risilo, “Ra Aku nanusub ramuyun ragili am kalo pinagibit ra rumpit, kantungan kapoam kasut, makakapaganan kau kia?”
Taam ilo, “Kolondo' rondo' pana!”
36Indagu i Jisus, “Kaa' raino, osoi ayuk mokoondo' ra rumpit kapoam kantungan, ibito' noyo; am osoi ayuk kolondo' ilang, talanon no sukub nano pambabali ra ilang no. 37 Balain takamin, ondo' tinulisan noyo ra Buuk Kitab, ‘Kinara' Io koson ra sangulun malaat,’ maaru' masauk Raki', am sotopot no masauk noyo ra raino ti.”
38Indagu maamaya' Nano, “Tuhan, ilai' giti mokoondo' ruo ilang.”
Taam i Jisus, “Sama' noyo!”
Nakiasi' i Jisus giu' ra Bulur Jaitun
(Mat. 26:36-46; Mrk. 14:32-42)
39Iruani' ri Jisus bandar no, am koson ra kaindalaman No, minongoi Io ra Bulur Jaitun am maamaya' Nano minaya' niayuk Riso. 40Pakasuku' ra giu' i, indagu i Jisus risilo, “Pakiasi' kano maa' raginio makainggalur kau intor ra pangkinaman.”
41Inggalur Io poyo boo koborok, olo'-olo' koson ra galur ru kababalan ra batu, igulatur am pakiasi' Io, indagu Io, 42“Ama', amon ru masaga' Kou, painggaluro' noyo sangkir kaimbalaan ti intor Raki'. Kaa' sala' ka sumugut ra kasagaan Kuno, kaa' kasagaan Muno ayuk saukon.” 43Pulusat ru sangulun malaikat ru Tuhan mampaikang ra guang Nano. 44Maimbolo' Io tojojo am mapirot Io poyo nakiasi', saboi rasang Nano koson ra raraa' momosok ra tana'.
45Kopongo nakiasi', saguli' i Jisus ra maamaya' Nano am ilai' No nokororot ilo sabap ra mangiluk toojo guang nilai. 46Indagu i Jisus risilo, “Kua pombolong kau? Karat kano am pakiasi', maa' raginio makainggalur kau intor ra pangkinaman.”
I Jisus rinakop
(Mat. 26:47-56; Mrk. 14:43-50; Jua. 18:3-11)
47Tatanga' i Jisus lakat ayuk poyo minindagu, ratong sampulalai ru ulun masuang. I Judas, sangulun intor ra mopor am ruo ngaulun maamaya' ri Jisus no, siminigulu risilo. Alaki' boo ri Judas i Jisus. 48Kaa' indagu i Jisus, “Judas, mabaya' ra alok kia okou mampataak ra Anak ru Ulun?”
49Pakaliman maamaya' ri Jisus ra bokon no ra atan masauk ra maagu no, indagu ilo, “Tuhan, pirison mai kia ilo ra ilang?” 50Sangulun intor risilo boo nampiris ra ulipon ru Tingganai Maayo Imam Jaudi i am napias talingo ra pamiris nali.
51Indagu i Jisus, “Sama' noyo!” Bagu kamaa' No talingo ru ulun i am napali' io no.
52Indagu boo i Jisus ra tingganai imam Jaudi, tingganai ru magagalung ra Baloi Tuhan am niayuk tingganai ru ulun ru Jaudi ondo' minongoi pamparakop Riso, indagu Io, “Ilain min ra Aku ti koson ra sangulun malaat kia ra mananggal kau ra ilang am pamalamba' koson mamparakop Raki'. 53 Moonong orou soroi Aku giu' ra Baloi Tuhan mabaya' ramuyun am kalo rinakop min Aku. Kaa' gitio noyo kaluagan min, paat ra kuasa' ru molondom mamarinta.”
Nagali' i Pitrus ra makaulig ri Jisus
(Mat. 26:57-58, 69-75; Mrk. 14:53-54, 66-72; Jua. 18:12-18, 25-27)
54Rokopo' am ibito' nilo i Jisus giu' ra baloi ru Tingganai Maayo Imam Jaudi, am i Pitrus siminunu' intor ra maalur. 55Giu' ra liliut ru baloi i nampaang ilo ra apui am i Pitrus pana riminarang nababaya' ra ulun-ulun no. 56Kakito ru sangulun ulipon ra ruandu' ra i Pitrus nanturung rarang ra apui ra giu' i, tantangi' no io am indagu, “Ulun ragitio niayuk minaya' ri Jisus.”
57Kaa' pagali' i Pitrus, kono, “Kalo nakaulig aku ra ulun ragitio!”
58Kalo nabuoi ragili, sangulun poyo nakakito ri Pitrus am indagu, “Okou niayuk sangulun intor risilo i!”
Kaa' taam i Pitrus, “Kalo, sala' ka aku!”
59Mopongo olo'-olo' sanjam, ngansab poyo ru sangulun, “Topot ulun ragitio maamaya' ri Jisus, sabap ra ulun io tupo ru Galilia!”
60Kaa' taam i Pitrus, “Sala', kalo nangarati' aku ra rinagu muni!”
Paat ragili niayuk, ra i Pitrus lakat ayuk poyo minindagu, paningkuluuk manuk tandaa' i. 61Pangkaili am ponontong Tuhan ri Pitrus. Kakara' boo ri Pitrus ragu ru Tuhan i riso, “Ra kalo poyo maningkuluuk manuk tandaa' no rondom raiti', intalu kono magali' ra okou makaulig Raki'.” 62Ingkual boo i Pitrus intor ra giu' i am sisingut nantangi'.
I Jisus iniis am linamba'
(Mat. 26:67-68; Mrk. 14:65)
63Ulun ondo' namparakop ri Jisus i nangiis am nampalamba' Riso. 64Silii' nilo mato Nali am indagu, “Amon ru nabi Kou, kinami' sabito' osoi kia nampalamba' Rirun ti?” 65Am masuang poyo ragu nilo magasab ri Jisus.
I Jisus inibit giu' ra Majlis Ugama
(Mat. 26:59-66; Mrk. 14:55-64; Jua. 18:19-24)
66Io suabon, tingganai ru ulun ru Jaudi, tingganai imam Jaudi am mangingila' ra ukum ri Musa no timinimung ra Majlis Ugama, am paumaa' boo i Jisus risilo. 67Indagu ilo, “Balai' akai! Okou kia Mamamayag ondo' sinusub ri Aki Kapuuno'?”
Taam i Jisus, “Balain takamin pana, kaa' kalo niayuk mangintopot kau. 68Amon ru mangkuot Aku ra atan ayuk pana, kalo niayuk tumaam kau. 69Kaa' intor raino, Anak ru Ulun paturungon ra pamiris ri Aki Kapuuno' ondo' Maayo Kaga' Kuasa'.”
70Nagagampan ilo minindagu, “Ginio poyo, Anak Kou kia ri Aki Kapuuno'?”
Taam i Jisus, “Kamin, Aku noyo Io.”
71Indagu ilo, “Atan pakuan takau maguyum poyo ra sasi'! Norongog takau no ra Io nangiou!”
Currently Selected:
LUKAS 22: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.