IMAMAT 2
2
Taak simbalui koson paringkuanangan ra Tuhan
1Paat ra sasangulun no mapataak ra taak simbalui koson paringkuanangan ra Tuhan, taak simbalui no musiti' intor ra tapung moonsoi kaga', ondo' uasin ra umau jaitun am tinaukan ra kaminyan rasawat no. 2Ulun no musiti' magibit ra taak nano ra imam-imam papag ri Arun. Imam ondo' mapataak ra taak simbalui no musiti' mangalap ra sogonggom tapung am niayuk umau no am ngaangai' kaminyan no, am solobon ngaangai' no ra rasawat ru altar koson tatandu' ra kasalingai' no pinataak noyo ra Tuhan. Owou ru taak ra akanon no mapabansuk ra guang ru Tuhan. 3Suwo ru taak simbalui koson paringkuanangan ra Tuhan no iono longgom ru imam-imam. Taak ti matulai kaga' sabap ra inalap intor ra akanon ondo' pinataak noyo ra Tuhan.
4Amon ru taak no ruti' ondo' inansak ralalom ru oven, kalo latakin ruti' no ra ragi. Kakapalon pana ruti' no, baalon intor ra tapung moonsoi kaga' ondo' latakin ra umau jaitun, am kalilison pana ruti' no, ondo' luitin ra umau jaitun.
5Amon ru taak no ruti' ondo' inandab ra intok panguuban, musiti' baalon intor ra tapung moonsoi kaga' ondo' latakin ra umau jaitun kaa' kalo latakin ra ragi. 6Ruti' no musiti' lalapakon am uasin ra umau jaitun paat ra pataakon.
7Amon ru taak no ruti' ondo' ansakon ralalom paliuk, musiti' baalon ruti' no intor ra tapung moonsoi kaga' am umau jaitun. 8Ruti' ondo' binaal koson ragitio musiti' pataakon ra Tuhan, am pataakon ra imam ondo' magibit raginio ra altar. 9Mangalap imam no ra santayaran ra ruti' no, am solobon no ra rasawat ru altar koson tatandu' ra pinataak noyo ngaangai' no ra Tuhan. Owou ru taak ra akanon no mapabansuk ra guang ru Tuhan. 10Suwo ru taak simbalui no longgom ru imam-imam. Taak ti matulai kaga' sabap ra inalap intor ra akanon ondo' pinataak noyo ra Tuhan.
11Taak simbalui koson ra paringkuanangan ondo' pataakon ra Tuhan kalo latakin ra ragi. Pai' noyo lataki' ra ragi kapoam ruu' maningot ralalom ru akanon ondo' pataakon ra Tuhan. 12Ampos ru tinanom ondo' kumoson galing mino ra moonong bilor musiti' pataakon ra Tuhan, kaa' taak no kalo solobon ra rasawat ru altar. 13Taukin ra usi' moonong taak simbalui koson paringkuanangan ra Tuhan, sabap usi' tatandu' ru nabantuan min am i Aki Kapuuno'. Taukin ngaangai' taak mino ra usi'. 14Paat ra ampos ru tinanom galing ondo' kumoson mino pataakon ra Tuhan, pataakon unor baguon ondo' sininggala' kapoam ondo' inumok noyo kaga'. 15Unor-unor no musiti' uasin ra umau jaitun am taukin ra kaminyan. 16Solobon ru imam santayaran ra tapung am umau jaitun, am niayuk ngaangai' kaminyan no, koson tatandu' ra ngaangai' no pinataak noyo koson taak ra akanon ra Tuhan.
Currently Selected:
IMAMAT 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.