AYUP 3
3
Ragu kalumpusan ri Ayup ri Aki Kapuuno'
1 Pupus no, tumalimpuun i Ayup mindagu am magulas ra orou io inanak am mindagu,
2-3“Iou Aki Kapuuno', ulaso' noyo orou ra aku inanak,
am ulaso' noyo rondom ra aku tumalimpuun tininai'.
4Iou Aki Kapuuno', sauko' noyo orou raginio molondom,
luluo' orou raginio intor ra pangkaraan Muno;
pai' Mu noyo polosoo'
sinda mapaang makatampulau.
5Sauko' noyo orou raginio malaut,
am matikop ru kalandaman;
taubi' orou raginio ra gaun,
am silii' sinda mato ru orou.
6Polosoon noyo rondom raginio pusoon
intor ra panguntaban ra bilor am sila'.
7Polosoon rondom raginio matikop ru kalandaman,
kolondo' kaansukan, kolondo' bolos magigindii.
8Akau ulun mapandai kaga' ra sihir, ulun mapandai kaga' ra Liwiatan,
ulaso' noyo orou raginio ra ibot am ulas.
9Pai' polosoo' butitin ru susuab ti suminda;
pai' polosoo' sinda ru tumawang sumirang.
10Ulaso' noyo rondom raginio sabap ra nompoloso raki' inanak,
am nampataak raki' ra kapaganan am kangilukan.
11Kua kia kalo minatoi aku ralalom binunakan ri ina'?
Kua kia kalo minatoi aku paat ra inanak?
12Kua kia ganggali' aku ri ina' am kinubibil no?
Kua kia patitio' aku ra titi' nano?
13Amon ru paat raginio minatoi aku,
maaru' paat ragitio makatangus aku,
14mombolong koson ra raja' am ulun-ulun mamarinta
ondo' nambaal saguli' ra istana nakalair kaga'.
15Maaru' mokororot aku koson ra anak ungkuyon ru raja'
ondo' nanuang ra baloi nilo ra pirok am mas.
16Kua kia kalo narayus aku minatoi ra inanak,
nongorom ra mato koson ra lalagang ondo' minatoi?
17Giu' ra ralalom ru lobong, ulun malaat lumonggo' mambaal ra malaat,
am ulun mangngandoi ondo' naagui mapaabus ra bagui.
18Ulun inaput pana makasia' ra katangusan,
makalabus intor ra susuban makuliga' am galakin.
19Ulun nauligan kaga' inggalan kapoam kalo, ngaangai' no ra giu' no,
am ulipon makaalap ra kalabusan ra pupus no.
20Kua kia ra ulun polosoon marayus maayag ra maimbolo'?
Kua kia ra ulun ondo' mangiluk aniin ra sinda?
21 Maginaa ilo ra kapatayan, kaa' kapatayan kalo matong;
masaga' ilo poyo ra lobong ka intor ra atan ayuk rapu'.
22Kaansukan malimanan ayuk
paat ra ilo matoi am lobongon.
23Pinasibuni ri Aki Kapuuno' orou matong nilo,
am nagawang risilo intor ra ngaangai' intok.
24Koson palit ru akanon, mampalaa aku,
kalo lumonggo' aku mompoloong.
25Ngaangai' ondo' kalaanin kuno lumumpa' raki';
ngaangai' ondo' makaimamang raki' lumumpa' raki'.
26Kolondo' karandanan kuno,
am kapaganan kuno kolondo' pupus.”
Currently Selected:
AYUP 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.