JUANIS 18
18
I Jisus rinakop
(Mat. 26:47-56; Mrk. 14:43-50; Luk. 22:47-53)
1Kopongo i Jisus nakiasi' raginio, ugar Io nabaya' ra maamaya' Nano am sindaup ilo ra rondo' sungoi ininggalanan ra Kidron. Giu' i minongoi ilo ra rondo' taman. 2I Judas, ondo' nampataak Riso ra pantula' Nano, nakapandai ra intok i, sabap ra masalok i Jisus am maamaya' Nano mongoi ra giu' i. 3Ginio ra i Judas pana minongoi ra giu' i nababaya' ra santayaran saujor Roma am kukula' ngaulun pulis ru Baloi Tuhan, ondo' sinusub ru tingganai imam Jaudi am niayuk ulun-ulun ru Parisi. Ilo ti nagibit ra lentera am titiu am poyo ilang. 4Nakapandai i Jisus ra ngaangai' ondo' masauk Riso no. Ginio ra inggaari' No ilo am pangkuot, “Osoi uyumon min?”
5Taam ilo, “I Jisus, ulun ru Nasarit.”
Kon ri Jisus risilo, “Aku no Io.”
I Judas, ondo' nampataak Riso ra pantula' Nano, minigor niayuk nabaya' risilo. 6Pakaindagu ayuk i Jisus risilo ra, “Aku no Io,” pakalugut ilo ngaangai' am karatu'. 7Pangkuot Io poyo risilo, “Osoi uyumon min?”
Taam ilo, “I Jisus, ulun ru Nasarit.”
8Indagu i Jisus, “Nambala' Aku noyo ramuyun ra Aku no Io. Amon ru Aku no uyumon min, polosoo' min ayuk rangan-rangan Kuno mugar.” ( 9Minindagu Io raginio, koson nasugut boo ondo' rinagu Nano ragili; ‘Ama', intor ra ulun-ulun ragitio ondo' pinataak Muti Raki', kolondo' sangulun pana maluus.’)
10I Simon Pitrus nagibit ra ilang. Butuso' no ilang i am piaso' no talingo ra pamiris ru sangulun ulipon ru Tingganai Maayo Imam Jaudi. I Malkus inggalan ru ulipon i. 11 Kaa' indagu boo i Jisus ri Pitrus, “Paangkapo' ilang muno! Musiti' Aku manginum ra sangkir kaimbalaan ondo' inaru' noyo ri Ama' Raki'.”
I Jisus pinauma' ri Annas
12Ginio boo ra santayaran saujor Roma nabaya' ra tingganai nilai am pulis-pulis ru Baloi Tuhan no, namparakop ri Jisus am bangkilo' nilo Io. 13Ibito' nilo boo i Jisus paumaa' galing ri Annas, iwan ri Kayapas. I Kayapas ti noyo Tingganai Maayo Imam Jaudi ra bilor raginio. 14 Io no ondo' minindagu ra ulun ru Jaudi ra, “Moonsoi poyo sangulun ayuk matoi, suali ru ngaangai' bansa'.”
Nagali' i Pitrus
(Mat. 26:69-70; Mrk. 14:66-68; Luk. 22:55-57)
15I Simon Pitrus am sangulun maamaya' ra bokon i siminunu' ri Jisus. Maamaya' ra bokon ti nauligan ru Tingganai Maayo Imam Jaudi i, ginio ra pakasubol io mabaya' ri Jisus ra liliut ru istana ru Tingganai Maayo Imam Jaudi. 16Kaa' i Pitrus naginaa ra liwar, giu' ra kulobon ru timbok. Kabuoi ragili maamaya' ri Jisus ra bokon ti miningkual poyo am minindagu ra ruandu' magagalung ra kulobon i, am paumposo' no boo i Pitrus. 17Kaa' indagu ruandu' i riso, “Sala' ka kia okou niayuk sangulun intor ra maamaya' ru ulun no?”
Taam io, “Sala'.”
18Paat ragili masimu', ginio ra pampaang ulipon am pulis-pulis no ra apui, am rarang ilo. Ongoi boo inggaar i Pitrus risilo am baya' rarang.
Tingganai Maayo Imam Jaudi nangkuot ri Jisus
(Mat. 26:59-66; Mrk. 14:55-64; Luk. 22:66-71)
19Ginio ra Tingganai Maayo Imam Jaudi i nangkuot ri Jisus ra maamaya' Nano am niayuk pangilaan Nali. 20Taam Io, “Nambala' Aku noyo toojo ra saang ru ulun masuang. Nangila' Aku ra baloi sambayangan am giu' ra Baloi Tuhan, ondo' masalok titimungan ru ulun ru Jaudi. Kalo nansibuni Aku ra Aku minindagu. 21Kua kuati' mu Aku? Kuati' ilo ondo' nokorongog ra nangilaan Kuli. Maaru' ilo no nakapandai ra rinagu Kuno.”
22Karagu ginio ri Jisus, sangulun pulis ra giu' i nampalapis ra pingas Nali, am indagu, “Ginio kia tataam Muno ra Tingganai Maayo Imam?”
23Taam i Jisus, “Amon ru kalo motopot ragu Kuno, balai' noyo ulun-ulun ti atan nasala. Kaa' amon ru motopot ragu Kuno, kua lapiso' mu Aku?”
24Kopongo ragili, i Jisus ondo' lakat ayuk poyo nabangkil, pinauma' ri Annas ri Kayapas, Tingganai Maayo Imam Jaudi.
Nagali' poyo i Pitrus
(Mat. 26:71-75; Mrk. 14:69-72; Luk. 22:58-62)
25I Simon Pitrus lakat ayuk poyo nangintairoi rarang ra giu' i. Pangkuot ulun-ulun no riso, “Sala' ka kia okou ti pana sangulun maamaya' Nano?”
“Sala'!” kon ri Pitrus ra io nagali'.
26Sangulun ulipon ru Tingganai Maayo Imam Jaudi i, io ti pabukat ru ulun ondo' piniasan ri Pitrus ra talingo, minindagu, “Sala' ka kia okou nakito ku giu' ra taman i nabaya' Riso?” 27Kaa' igondo' poyo i Pitrus nagali' am paat ragili niayuk naningkuluuk manuk tandaa' i.
I Jisus pinauma' ri Pilatus
(Mat. 27:1-2, 11-14; Mrk. 15:1-5; Luk. 23:1-5)
28Nokorondom ra iosusuab, ibito' nilo i Jisus intor ra baloi ri Kayapas mongoi ra istana ru gabenor. Kaa' tingganai ru Jaudi galama' kalo minumpos ra istana i, koson kalo majamol ilo sumugut ra kaulayan ru ugama nilai, sabap ra masaga' ilo gumulung ra akanon ru Pangiantakan ra Paska. 29Ginio sabap boo ra ingkual i Pilatus tumuum risilo am pangkuot io, “Atan kia panguwan min ra ulun ti?”
30Taam ilo, “Kalo paumaan mai Io rirun amon ru kolondo' sala Nano.”
31Indagu i Pilatus risilo, “Alapo' am ukumi' min Io sumugut ra ukum mino galama'.”
Kaa' taam tingganai ru ulun ru Jaudi no, “Kolondo' kuasa' mai mangani' ra ukuman potoyon.” (32 Gitio nasauk koson nasugut boo ragu ri Jisus ra ati kulaan patayan Nano.)
33Ginio ra subol i Pilatus saguli' ra istana am pampiau ri Jisus am kuati' no, “Okou no kia raja' ru ulun ru Jaudi?”
34Taam i Jisus, “Pangkuatan mutu intor ra guang muno galama' kia kapoam tinunungan kou ru ulun bokon?”
35Taam i Pilatus, “Aku sala' ka ulun ru Jaudi. Ulun ru bansa' Muno galama' am tingganai imam no ondo' nampauma' Rirun raki'. Atan guat binaal Muno?”
36Kon ri Jisus, “Pamarintaan Kuno sala' ka giti ra tana' ti. Amon ru giti ra tana' ti, maaru' maamaya' Kuno manggal, maa' raginio kalo pataakin Aku ra tingganai ru Jaudi no. Kaa' sotopot no pamarintaan Kuno sala' ka giti ra tana' ti.”
37Indagu i Pilatus Riso, “Ginio poyo, Okou ti sangulun raja'?”
Taam i Jisus, “Rinagu mu noyo ra Aku ti sangulun raja'. Ginio ra Aku inanak am minatong ra tana' ti, koson mampatanou ra katapatan ri Aki Kapuuno'. Osoi ayuk gumagaya' ra katapatan ti mangkirongog io Raki'.”
38Pangkuot i Pilatus Riso, “Atan nua' katapatan?”
I Jisus inukum potoyo'
(Mat. 27:15-31; Mrk. 15:6-20; Luk. 23:13-25)
Pakapangkuot i Pilatus raginio, ingkual io poyo am indagu ra ulun-ulun ru Jaudi no, “Kolondo' rondo' pana sala natuum ku ra ulun ti. 39Kaa' sumugut ra kaindalaman, moonong Pangiantakan ra Paska mampalabus aku ra sangulun inaput. Masaga' kau kia ru palabuson ku ramuyun raja' ru ulun ru Jaudi ti?”
40Golok ilo, “Kalo! Sala' ka Io! Palabuso' ramon i Barabas!” (I Barabas ti sangulun teroris.)
Currently Selected:
JUANIS 18: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.