JUANIS 16
16
1Nambala' Aku ramuyun raginio koson pangintapatan mino kalo malawo. 2Inggalarin kau mumpos ra baloi sambayangan. Masuku' niayuk paat ra osoi ayuk mamatoi ramuyun mangkara' ilo raginio mangandoi ri Aki Kapuuno'. 3Ginio baalon nilo ramuyun sabap ra kalo nakaulig ilo ra Ama' Kuno kapoam Aku galama'. 4Kaa' mambala' Aku ramuyun raino, maa' raginio ra io masauk, makara' min ra binalaan takamin noyo kalalair.”
Kondoyon ru Ambiluo ri Aki Kapuuno'
“Kalo binalaan takamin raginio intor ra talimpuun i, sabap ra lakat Aku ayuk poyo nabaya' ramuyun. 5Kaa' raino sumaguli' Aku Riso ondo' nanusub Raki' i; am kolondo' sangulun pana intor ramuyun mangkuot ra ati angayan Kuno. 6Raino mangiluk guang min sabap ra binalaan takamin noyo. 7Ondo' raguon Kutu ramuyun motopot: Moonsoi ra Aku mugar, amon ru kalo, Mangingindangan no kalo matong ramuyun. Kaa' amon ru mugar Aku, porotongon Ku boo Io ramuyun. 8Paat ra Io matong, mampainono' Io ra ulun ru tana' ti atan sotopot no tula, osoi motopot am atan sotopot no ukum ri Aki Kapuuno'. 9Mampainono' Io ra osoi kalo mangintopot Raki', io no makatula. 10Mampainono' Io ra Aku motopot, sabap ra mongoi Aku ri Ama' am kalo boo makito min Aku. 11I Aki Kapuuno' niayuk nakatalimpuun noyo mangukum, sabap ra io ondo' manguasa' ra tana' ti inukum noyo.
12Masuang poyo pabalaan Kutu ramuyun, kaa' raino ti kalo poyo maapu min. 13Kaa' paat ra Ambiluo ri Aki Kapuuno' no matong, mambala' Io ra katapatan ri Aki Kapuuno' am mampaintutun Io ramuyun ra ngaangai' ru katapatan. Kalo mambala' Io sumugut ra kuasa' Nano galama', kaa' mambala' Io ra atan ondo' morongog Nano am atan ondo' masauk ra tauli no. 14Katulayon No Aku, sabap ra pabalaan Nano ramuyun ngaangai' ondo' norongog no intor Raki'. 15Ngaangai' ondo' longgom ri Ama', longgom Ku niayuk. Ginio sabap ra Aku minindagu ra atan ondo' posoboyon ru Ambiluo ri Aki Kapuuno' no ramuyun intor noyo Raki'.”
Mangiluk guang am maansukan
16“Sangkinolor ayuk boo am kalo makakito kau Raki', am sangkinolor poyo am makakito kau saguli' Raki'.”
17Ginio ra pasakuot boo kukula' maamaya' Nano ra rondo' am bokon, “Atan kon Nano ra, ‘Sangkinolor ayuk boo am kalo makakito kau Raki', am sangkinolor poyo am makakito kau saguli' Raki'?’ am poyo ra, ‘Mongoi Aku ri Ama'?’ 18Atan kon Nano ra, ‘Sangkinolor ayuk boo?’ Kalo maratian takau ragu Nano!”
19Natutunan ri Jisus ra masaga' ilo mangkuot Riso, ginio ra indagu Io risilo, “Raitii' ni minindagu Aku ra, ‘Sangkinolor ayuk boo am kalo makakito kau Raki', am sangkinolor poyo am makakito kau saguli' Raki'.’ Ginii kia ra akau pasakuot? 20Balain takamin toojo: Mantangi' am manulaboi kau, kaa' ulun ru tana' ti maansukan. Mangiluk guang mino, kaa' guang min ra mangiluk no makulau boo ra maansukan. 21Paat ra sangulun ruandu' matipaganak, magalabo io sabap ra masaboi noyo maruol ru maganak nano. Kaa' maanak no ayuk lalagang no, maansukan io am kalo boo makara' no maruol nali sabap ra sangulun lalagang inanak noyo ra tana' ti. 22Mogondo' niayuk ramuyun; raino mangiluk guang min. Kaa' makapantuum takau saguli', am maansukan kau boo toojo; am kaansukan mino kalo malanggaan ru osoi ayuk pana.
23Orou raginio, kalo boo mangkuot kau Raki' ra atan ayuk pana. Balain takamin toojo: Aniin kau ri Ama' ra atan ayuk kitaakon min ralalom ru inggalan Kuno. 24Saboi raino ti kolondo' poyo kinitaak min ralalom ru inggalan Kuno. Pakitaak kano am moowot min, maa' raginio maansukan kau toojo.”
Kinala noyo tana' ti
25“Ngaangai' ti rinagu Ku ramuyun ra abig. Kaa' masaboi paat no ra kalo boo raguon Ku ramuyun ra abig, kaa' mambala' Aku toojo ramuyun ra ati kulaan i Ama' Kuno. 26Orou raginio, akau galama' makitaak Riso ralalom ru inggalan Kuno; am kalo pana boo makitaak Aku Riso koson akau, 27sabap ri Ama' galama' motogom ramuyun. Motogom Io ramuyun sabap ra motogom kau Raki' am mangintopot kau ra minatong Aku intor Riso. 28Aku ti intor ri Ama' am nakaratong noyo ra tana' ti, kaa' raino iruanin Ku tana' ti am sumaguli' Aku Riso.”
29Indagu boo maamaya' Nano, “Raino mambala' Kou toojo am kalo boo magabig Kou. 30Raino nakatutun akai no ra Okou makapandai ra ngaangai' am kolondo' boo pangkuatan mai Rirun. Ginio boo ra akai mangintopot ra Okou intor ri Aki Kapuuno'.”
31Indagu i Jisus risilo, “Mangintopot kau kia raino ti? 32Paat no masuku', am sotopot no nasuku' noyo, ra akau pantutuliaron am muli' ra intok min sigagama'. Tatangon min Aku misasangulun. Kabalu' pana koson raginio, kalo misasangulun Aku sabap ra i Ama' mabaya' Raki'. 33Ngaangai' ti pinabala' Ku ramuyun, maa' raginio makakaansayan kau sabap ra masimpung kau Raki'. Giti ra tana' ti maimbolo' kau, kaa' paikango' noyo guang min, sabap ra kinala Ku noyo tana' ti.”
Currently Selected:
JUANIS 16: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.