ABAKUK 3
3
Pakiasian ri Abakuk
1Gitio noyo pakiasian ri Nabi Abakuk:
2Iou Tuhan, nokorongog aku no ra intor ra binaal Muno,
guang kuno natikop ra imuag.
Gama' ru baalon Mu poyo
binaal Muno ondo' makaimuag ra paat maiti.
Pakaasi' no ramon kabalu' pana sumangit Kou.
3Matong Kou poyo intor ra Idom;
Okou i Aki Kapuuno' ondo' matulai matong intor ra Kabuluran Paran.
Katulayan Muno nakatikop ra limbowon;
tana' ti natikop ra pangamparan Rirun.
4Matong Kou am makapiniat koson ra ganit;
sinda mapaang intor ra kalindu' Muno,
ra giu' noyo kuasa' Muno pasibunion.
5Nanusub Kou ra maruol magulu Rirun
am nanusub ra kapatayan sumunu' Rirun.
6Paat ra Okou lumonggo', muyog tana' ti;
paat ra Okou magilong, bansa'-bansa' songongonsol.
Gunung-gunung ondo' lair noyo soroi natutuk kalingon;
bulur-bulur ondo' nagulayun soroi pana liminonson,
bulur-bulur intok Muno mugar intor noyo ra galing.
7Nakito ku ulun ru Kusian malaa',
am ulun ru Midian monontol.
8Sungoi kia nangkinibit Rirun siminangit,
iou Tuhan?
Raat kia nangkinibit Rirun siminangit?
Sinakayan Mu gaun
am siminakoi ra gaun ru rasam maawas,
paat ra Okou matong koson mangani' ra kamanangan ra ulun Muno.
9Nakatampos Kou noyo mamakai ra tanggayan ru panah Muno,
nakatampos koson mampalabus ra anak panah Muno.
Tana' ti lumata' am sungoi tumilis.
10Paat ra gunung-gunung makakito Rirun, ngaangai' no muyog;
rasam rumatu' intor ra limbowon.
Timug giu' ra ragana' ru tana' mompongoos
am kinulun nano lumapos.
11Paat ra panah Muno ondo' maribok manguliat,
am tanggulan ondo' suminda ra manguliat,
mato ru orou am sila' lumonggo' minsir.
12Ralalom ru sangit lumiput Kou ra tana' ti;
ralalom ru sangit manginjang Kou ra bansa'-bansa'.
13Miningkual Kou koson mamayag ra ulun Muno,
koson mamayag ra raja' pinili' Muno.
Namparatu' Kou ra tingganai ru ulun malaat,
am namuso ra ngaangai' maamaya' nano.
14Anak panah Muno nansabut ra panglima saujor nano,
paat ra saujor nano matong koson ra bagiu'
koson mangkinibit ramon magiru' ra mantutuliar.
Maansayan ilo koson ra ulun ondo' simininok
mangimbolo' ra ulun musikin.
15Kikinjangin Mu raat ra kuda Muno,
am timug ru raat ondo' lumapos manamputa'.
16Norongog Ku ngaangai' no am monontol aku;
bibil kuno monontol sabap ra malaa' aku.
Inan kuno malawo kalo maikang,
kalayam kuno nakasaru paat ra mugar.
Maginaa aku ra guang mororo' paat raginio
Okou mangukum ra ulun ondo' mamulunsar ritakau.
17Kabalu' pana puun ru ara kalo nambusak,
am puun ru anggur kalo nangkawa',
kabalu' pana ampos ru puun jaitun makangiluk ra guang,
am umo ru gandum makasinduol ra guang,
kabalu' pana ngaangai' domba matoi,
am kandang ru sapi' kolondo' suang no,
18masalok aku maansayan am maansukan,
sabap ra Okou Tuhan i Aki Kapuuno' mamayag raki'.
19 Okou noyo Tuhan Raja' ondo' nangani' raki' ra kaikangan,
koson ra kalayam ru tambang, kalayam kuno kinaikang Mu,
am pamayagan kuno inalungan Mu giu' ra kagunungan.
Currently Selected:
ABAKUK 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.