GALATIA 6
6
Pangindangan kano ra rondo' am bokon
1Pabukat kau ngaangai', amon ru marampatan min sasangulun no makasala, akau ondo' maikang toojo pangintapatan musiti' magibit ra ulun no sumaguli' ra katapatan mabaya' ra ragu mamunduk riso. Am ilalai' min galama' ra akau pana kalo matiu' ru pangkinaman. 2Pangindangan kano ra rondo' am bokon. Am koson ragitio noyo akau gumagaya' ra susuban ri Kristus. 3Amon ru sasangulun mangkara' ra io no maatang, am sotopot no kalo, io galama' ayuk miruruung. 4Moonong sigagama' musiti' ilain toojo ra paliso nano galama'. Amon ru moonsoi paliso no, bagu no maansukan io ra atan kandoi nano, am kalo pana makimogondo' ra bokon, 5sabap ra moonong ulun mokoondo' noyo ra kandoi nano sigagama'.
6Moonsoi niayuk ru ulun ondo' ilaan ra pangintapatan ru Kristian, mantayar ra atan ayuk mokoondo' riso no ra mangingila' nano.
7Pai' kano miruruung. Kolondo' sangulun pana makapamparuung ri Aki Kapuuno'. Ondo' tonomon ru sasangulun, ginio niayuk kumoson nano. 8Amon ru sumugut io ra kasagaan nano galama', ioginio koson mantanom ra sampug malaat, kapatayan ondo' kumoson nano. Kaa' amon sumugut io ra kasagaan ru Ambiluo ri Aki Kapuuno', ioginio koson mantanom ra sampug moonsoi, kaayagan mantilayun no ondo' kumoson nano. 9Ginio ra, pai' takano kajala' mambaal ra ondo' moonsoi. Sabap ra amon ru kalo malawo guang takau, masuku' niayuk paat ra itakau mangkumos ra ampos nano. 10Intor raginio, buoi ra itakau makakaluagan, alapo' takau noyo ginio koson mobobonsoi ra moonong ulun, mulu' poyo risilo ondo' makimambukat takau mulu' poyo ra mogondo' pangintapatan.
Bilin pampakaraan am kaansayan
11Ilai' min noyo ati kulaan gayo ru tinulisan kutu galama'! 12Ulun ondo' lumimbau ra baal ondo' makito ru ulun, ilo ti noyo ondo' mompogogot ramuyun ra sunatin. Mambaal ilo ayuk koson raginio bagu kalo boo maimbolo' ilo sabap ra namatayan ri Kristus ra salip. 13Kaa' ulun ondo' manginsugut ra kaulayan ru sunat no pana kalo magagaya' nilo ngaangai' Ukum ri Musa. Kabalu' pana raginio, masaga' ilo niayuk sunatin kau, maa' raginio lumimbau ilo ra ginagaya' min kaulayan raginio. 14Kaa' aku kalo noyo lumimbau. Ondo' ayuk omporon ku am namatayan ru Tuhan takau i Jisus Kristus ra salip. Sabap ra namatayan ri Kristus ra salip, kaayagan ku ra tana' ti kolondo' boo arati' no raki'. Kalo boo mangkara' aku ra baal ondo' makito ru ulun. 15Kaulayan ru sunatin kapoam kalo, ginio kalo maatang. Kaa' ondo' maatang am makakaayagan bagu. 16Am ulun ondo' mampagagaya' ra panusuban ragitio, gama' ru aniin ilo ri Aki Kapuuno' ra kaansayan am asi', am niayuk ra ngaangai' ulun ri Aki Kapuuno'.
17Ondo' pupus ti poyo, pai' noyo sangulun pana pampakapagon raki', sabap ra pipilat ru inan kutu noyo mampakito ra aku ti nanginsugut toojo ri Jisus.
18Gama' ru Tuhan takau i Jisus Kristus masalok mambarakat ramuyun ngai'. Amin.
Currently Selected:
GALATIA 6: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.