GALATIA 3
3
Ukum ri Musa kapoam pangintapatan ri Kristus
1Kua boo ramuyun, ulun ru Galatia, sasambungon kau nai! Osoi noyo namparuku' ramuyun? Kalo kia pinabala' ku ramuyun noyo toojo pinatayan ri Jisus Kristus ra salip! 2Rondo' ayuk raguon kuno ramuyun. Kinami' aku balai' ati koson akau nangapu ra Ambiluo ri Aki Kapuuno'? Sabap ra akau giminagaya' ra Ukum ri Musa kia, kapoam sabap ra nangkirongog am nangintopot ra Tanou Moonsoi i? 3Mapara' boo sambung mino! Nakatalimpuun kano ra kaayagan bagu mino koson nalansan noyo ra Ambiluo ri Aki Kapuuno', kaa' raino ti rumayus kau po kia koson lumansan poyo ra kuasa' min ayuk galama'? 4Pangkaraan min kia ra ondo' nailian min i topot-topot kolondo' arati'? Kaa' maaru' ginio mokoondo' ra arati'! 5Ginio poyo, nangani' i Aki Kapuuno' ra Ambiluo Nano ramuyun am nambaal ra kaimuagan ra tatanga' min i, sabap ra nokorongog am nangintopot kau ra Tanou Moonsoi no. Am sala' ka ra akau nampagagaya' ra Ukum ri Musa no.
6 Gitio nogondo' koson ra tinulisan ra Buuk Kitab ondo' tunungon intor ri Abragam ra, “I Abragam nangintopot ri Aki Kapuuno', am sabap ra pangintapatan nano, inapu io ri Aki Kapuuno' koson ra ulun ondo' mobonsoi saguli' Riso.” 7 Intor raginio totopot akau makatutun noyo ra ulun ondo' masauk ra papag toojo ri Abragam no, ioginio ilo ondo' mangintopot ri Aki Kapuuno'. 8 Nanala' noyo Buuk Kitab ragili ra i Aki Kapuuno' mopobonsoi saguli' ra ulun sala' ka Jaudi Riso sabap ra mangintopot ilo Riso. Tanou Moonsoi raginio pinasaboi galing ri Abragam, kon ragitio, “Sabap ra okou mambarakat i Aki Kapuuno' ra ngaangai' bansa' ru tana' ti.” 9Nangintopot i Abragam, am ginio boo ra binarakat io. Mogondo' niayuk ra ngaangai' ulun ondo' mangintopot no, barakaton ilo ri Aki Kapuuno' koson ri Abragam.
10 Mapara' piboo usung nilo ondo' mampagagaya' ra Ukum ri Musa. Mokoondo' tinulisan ra Buuk Kitab ra, “Osoi kalo masalok makaaya' ra ngaangai' ondo' tinulisan ra Ukum ri Musa, ulun raginio usungon ri Aki Kapuuno'!” 11 Raino napandayan noyo toojo ra kolondo' sangulun pana mobonsoi saguli' ri Aki Kapuuno' ru mampagagaya' ra Ukum ri Musa no; sabap ra mokoondo' tinulisan noyo ra Buuk Kitab, “Ulun ondo' mobonsoi saguli' ri Aki Kapuuno' sabap ra pangintapatan nano Riso, io no ondo' maayag!” 12 Ukum ri Musa no kalo inimpuun ra pangintapatan. Kaa' koson tinulisan ra Buuk Kitab ra, “Ulun ondo' mampagagaya' ra ngaangai' susuban ru ukum ti, maayag io.”
13 Kaa' i Kristus nampalabus noyo ritakau intor ra usung ondo' kinibit ru Ukum ri Musa ti, ra Io nokoowot ra usung sabap ra itakau. Mokoondo' tinulisan ra Buuk Kitab ra, “Mapara' piboo usung ru ulun ondo' salipon ra tataun.” 14Kapatayan ri Kristus ti noyo ondo' mangkinibit ra barakat binantu' ri Aki Kapuuno' ri Abragam i, makataak niayuk ra ulun sala' ka Jaudi. Ra pangintapatan ti noyo itakau makaapu ra Ambiluo ri Aki Kapuuno' ondo' binantu' ri Aki Kapuuno' i.
Ukum ri Musa kapoam bantu' ri Aki Kapuuno'
15Pabukat kau ngaangai', moonsoi alapon ku ra popogondoon atan ondo' nailian takau ra moonong orou. Amon ru mokoondo' ruo ngaulun nangiou ra rondo' baal koson nanulis ra rondo' surat nabantuan, kolondo' sangulun pana makapampalulu' kapoam makapamparuang ra atan ayuk ondo' binantu' raginio. 16 I Aki Kapuuno' nambaal ra nabantuan Nano ri Abragam am sangulun poyo intor ra papag nano. Kolondo' tinulisan ra Buuk Kitab, “Am papag muno”, arati' no ulun masuang. Kaa' ondo' tinulisan no am, “Sangulun intor ra papag muno”, ondo' arati' nano sangulun ayuk, io no i Kristus. 17 Kon kutu am: i Aki Kapuuno' nambaal ra rondo' bantu', am poyo minindagu ra intopoton No ginio. Ukum ri Musa ondo' apat ngaatus talu ngoopor ngambilor nakatauli sinauk, kalo noyo maalap kapuso kapoam kalulu' nabantuan ni. 18 Amon ru barakat ondo' pinataakan ri Aki Kapuuno' no pakulawiton poyo ra Ukum ri Musa, ginio sala' ka boo maya' ra nabantuan ri Aki Kapuuno'. Kaa' Io totopot nambaal noyo ra bantu' ti am pataako' No ginio ri Abragam.
19Amon ru ginio poyo, atan pakuan ru Ukum ri Musa no? Io pinaruang koson mampakito ra kaanggalan takati. Ukum ri Musa ti mokoonong polos ayuk ra ratangan ru sangulun papag ri Abragam, io no ondo' napataakan ra nabantuan raginio. Ukum ti pinasaboi ru malaikat-malaikat ru Tuhan mumbaya' ra sangulun papabilinan. 20Amon ru mokoondo' ruo ngantayaran, bagu no mokoonong sangulun papabilinan. Kaa' i Aki Kapuuno' kalo boo maguyum ra ulun ondo' papabilinan, sabap ra Io ayuk galama' ondo' mambala'.
Pakuan ru Ukum ri Musa
21Gitio kia arati' ra Ukum ri Musa am binantu' ri Aki Kapuuno' mantula' boo? Sotopot no kalo noyo toojo! Sabap ra amon ru nataakan noyo rondo' ukum ugama ondo' makapangani' ra kaayagan ra ulun, am ulun boo mokopobonsoi saguli' ri Aki Kapuuno', amon ru mampagagaya' ilo ayuk ra ukum ugama no. 22Kaa' mokoondo' tinulisan ra Buuk Kitab ra ngaangai' ulun kinuasa' ru tula. Ginio ra ondo' bantu' ri Aki Kapuuno' no makataak boo ra ulun ondo' mangintopot ri Jisus Kristus.
23Ra kalo poyo nasuku' paat ra mangintopot ri Kristus ti, kinuasa' takau ru Ukum ri Musa koson ra ulun inaput, saboi pangintapatan no pinaintalang. 24Koson raginio noyo Ukum ri Musa nagalung ritakau saboi ra rinatangan ri Kristus, maa' raginio mobonsoi takau saguli' ri Aki Kapuuno' sabap ra pangintapatan takau ri Kristus. 25Kaa' raino nasuku' noyo paat ru ulun mangintopot ri Kristus, ginio ra Ukum ri Musa kalo pana boo magalung ritakau.
26Sabap ra mangintopot kau ri Kristus Jisus, nasauk kau ngaangai' ra anak ri Aki Kapuuno'. 27Sabap ra osoi ayuk ondo' riniu' am pinasimpung ri Kristus, io niayuk mokoondo' ra paliso ri Kristus galama'. 28Raino kalo boo nansasala' ulun ru Jaudi am ulun sala' ka Jaudi, ulipon am sala' ka ulipon, kapoam ungkuyon am ruandu'. Sabap ra rondo' kau ayuk ngai' ralalom ri Kristus Jisus. 29 Kaa' amon ru longgom kau noyo ri Kristus, papag kau ri Abragam, am niayuk makaapu kau ra atan ondo' binantu' ri Aki Kapuuno'.
Currently Selected:
GALATIA 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.