GALATIA 1
1
1Aku i Paulus, ondo' nasauk ra rasul sala' ka sumugut ra kasagaan ru ulun kapoam susuban ru ulun, kaa' intor ra susuban ri Jisus Kristus am i Aki Kapuuno', Io no i Ama' ondo' namayag saguli' ri Jisus intor ra kapatayan. 2Aku am ngaangai' pabukat ra Kristian ragiti mampasaboi ra kaansayan mai ra pasimpungan ulun Kristian giu' ra Galatia.
3Gama' ru i Aki Kapuuno', Ama' takau, am i Tuhan Jisus Kristus manaak ramuyun ra barakat am pabansayan.
4Maya' ra kasagaan ri Aki Kapuuno', Ama' takau, nampataak i Kristus ra painawo Nano. Iniru' No tula takau koson mamayag ritakau intor ra kalaatan ondo' manguasa' ra raino ti. 5Katulayon i Aki Kapuuno' ra sabuoi-buoi no. Amin.
Rondo' ayuk Tanou Moonsoi ti
6Mangimuag aku toojo ramuyun. Mataki' kau niayuk tumalikur intor ri Aki Kapuuno' ondo' ralalom asi' ri Kristus nampiau ramuyun, am maya' kapo ra tanou moonsoi ra bokon. 7Sotopot no, kolondo' “tanou moonsoi ra bokon”. Kaa' mokoondo' ulun ondo' mampajajou ramuyun, koson mangkinam pangulau ra Tanou Moonsoi ri Kristus no. 8Kaa' mapara' piboo usung mai amon ru akai, kapoam malaikat ru Tuhan pana, mampasaboi ramuyun ra tanou moonsoi sala' intor ra ondo' pinatanou maili noyo! 9Ondo' naragu mai noyo ragili, raguon ku poyo raino: Mausung toojo sasangulun no amon ru mampasaboi io ramuyun ra tanou moonsoi sala' intor ra ondo' naapu min i.
10Ati boo kulaan, maguyum aku kia ra pangiawan intor ra ulun? Kalo, pangiawan intor ri Aki Kapuuno' ayuk gogoton kuno. Makikiilong aku kia ra ulun? Kalo, amon ru koson raginio sala' ka ulipon aku ri Kristus.
Ati kulaan i Paulus nasauk ra rasul
11Pabukat kau ngaangai', masaga' aku mampaintutun ramuyun ra Tanou Moonsoi ondo' pinabala' kuno sala' ka intor ra ulun. 12Kalo inapu ku ginio intor ra ulun. Kolondo' sangulun pana nangila' raki' ra Tanou Moonsoi no, kaa' i Jisus Kristus galama' ondo' nampaintalang raki' raginio.
13 Naala' kano ra ati kulaan kaayagan kuno ragili koson sangulun ondo' mapirot gumagaya' ra ugama Jaudi. Ati kulaan poyo kinalaat kuno ra aku nangimbolo' ra pasimpungan ru ulun ondo' mangintopot ri Aki Kapuuno' saboi mompogogot toojo mamuso risilo. 14 Intor ra pinantuu' kuno ra ulun ru Jaudi, aku noyo ondo' mirot toojo mampagagaya' ra ugama Jaudi am niayuk kaulayan ru kinamatuaan maili.
15 Kaa' sabap ra asi' ri Aki Kapuuno', nampili' Io raki' ra aku kalo poyo inanak, am nampiau raki' mangandoi Riso. 16Paat ri Aki Kapuuno' nampaintalang ra Anak Nano raki', koson potonowon ku Tanou Moonsoi ra ulun sala' ka Jaudi, kalo nakitulu' aku ra osoi ayuk pana. 17Kalo minongoi aku ra Jirusalim muma' risilo ondo' nakasigulu nasauk ra rasul intor raki'. Kaa' narayus aku ayuk minongoi ra pagun ru Arab, am kopongo ragili saguli' aku boo ra bandar Damsyik. 18 Pakasail talu ngambilor bagu no minongoi aku tuum ri Pitrus giu' ra Jirusalim. Siminimpung aku riso buoi mopor am limo ngoorou. 19Kolondo' natuum ku ra rasul ra bokon, kaa' i Jakubus ayuk, pabukat ru Tuhan.
20Atan ondo' tinulisan ku ragitio motopot. I Aki Kapuuno' nakapandai ra kalo magabau aku.
21Kopongo ragili, ongoi aku boo ra pagun Siria am Kilikia. 22Kaa' paat ragili kalo nauligan aku ru pasimpungan ulun Kristian giu' ra Judia. 23Naala' ilo ayuk ra rinagu ru ulun ra, “Ulun ondo' nangimbolo' ramon ragili, raino ti mampatanou io boo ra pangintapatan ondo' pusoon no raan ragili!” 24Ilo pana nongompor boo ri Aki Kapuuno' sabap ra ondo' nasauk raki'.
Currently Selected:
GALATIA 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.