IPISUS 2
2
Intor ra kapatayan mongoi ra kaayagan
1 Ra galing i ra pagilangan ri Aki Kapuuno' koson ayuk ra minatoi kano sabap ra anggal am tula mini. 2Paat ragili minaya' kau ayuk ra paliso malaat ru ulun ru tana' ti. Giminagaya' kau ra tingganai ru mangunguasa' ra limbowon, am raino pana manguasa' ra ulun ondo' minanggal ri Aki Kapuuno'. 3Sotopot no ragili itakau pana nogondo' risilo. Siminugut takau ayuk ra kalaatan maya' ra pangkaraan ru guang am kinibit ru inan takau sigagama'. Nogondo' ra moonong ulun, itakau pana matiu' ra sangit ri Aki Kapuuno' no.
4Kaa' ginio gayo ru asi' ri Aki Kapuuno' am poyo togom Nano ritakau ra kalo maalap kauntob, 5saboi sabap ri Kristus itakau inanian ra kaayagan bagu. Ragili itakau koson ra minatoi ayuk ra pagilangan Nano sabap ra anggal am tula takau, kaa' raino sabap ra asi' ri Aki Kapuuno' binayag takau noyo. 6Nampaluat Io ritakau nabaya' ri Jisus Kristus, maa' raginio makapabaya' takau Riso mamarinta ra orou matong giu' ra suruga'. 7Koson raginio noyo mampakito Io ritakau ra ati kulaan gayo ru asi' Nano ondo' mantilayun, ioginio kinoonsoi ru guang Nano ritakau ralalom ri Kristus Jisus. 8Sabap ra asi' ri Aki Kapuuno' noyo itakau binayag, ioginio sabap ra pangintapatan takau. Am kaayagan no sala' ka intor ra baal moonsoi takau, kaa' ginio taak intor ri Aki Kapuuno'. 9Kolondo' sangulun pana lumimbau raginio, sabap ra pai' ru ampos ru kandoi mai ginio. 10I Aki Kapuuno' noyo nambaal ritakau, am sabap ra pasimpungan takau ri Kristus Jisus, nangatang Io ra kiralan ru kaayagan takau koson mambaal ra moonsoi. Gitio ondo' tinampos no kalalair ra pabaalin ritakau.
Masimpung ri Kristus
11Akau ulun sala' ka Jaudi, ondo' piawon ru ulun ru Jaudi ra “ulun kalo sinunatan” am ilo galama' inggalanin ra “ulun sinunatan” (sunat ti noyo kaulayan ru ulun mampalapa' ra inan). Karaa' ati kulaan baal min ra galing i. 12Paat ragili maalur kau intor ri Kristus. Akau ti nogondo' ra ulun bansa' ru bokon am sala' ka tayar kau ru ulun pinili' ri Aki Kapuuno', am kolondo' tayar min ra atan ayuk nabantuan ondo' inaru' ri Aki Kapuuno' koson risilo. Kolondo' kalansanan kapoam kaintutunan min ri Aki Kapuuno' ralalom ru kaayagan min. 13Kaa' raino, akau ondo' galing i maalur intor Riso, mamaar kau boo ralalom pasimpungan min ri Kristus Jisus, sabap ra kapatayan Nano. 14Sabap ri Kristus noyo ondo' magibit ra pabansayan takau. Io po nampasimpung ra ulun ru Jaudi am ulun sala' ka Jaudi ra rondo' bansa'. Am ra kapatayan Nano nangiru' Io ra pinongompong ondo' nampasuai am nangkinibit risilo nantutula'. 15 Ioginio, pinuso No ngaangai' kaulayan am panusuban ru Ukum ri Musa, am ra pasimpungan nilo ri Kristus ruo bansa' ti simpungon No rondo' bansa' makabagu. Am gitio noyo magibit risilo ra pabansayan. 16 Sabap ri Kristus nakapangiru' ra nantulaan raginio ra pinatayan Nano ra salip. Am gitio noyo nampasimpung ra ruo bansa' ti masauk rondo' inan am nagibit risilo saguli' ri Aki Kapuuno'. 17 Ginio boo i Kristus minatong am pampasaboi ra Tanou Moonsoi ondo' magibit ra pabansayan ra ngaangai' ulun; ioginio akau ulun sala' ka Jaudi, ondo' gili maalur intor ri Aki Kapuuno', am niayuk ra ulun ru Jaudi, ondo' gili mamaar ri Aki Kapuuno'. 18Sabap ra binaal ri Kristus am ru Ambiluo ri Aki Kapuuno' ulun ru Jaudi am sala' ka Jaudi niayuk makasamba ri Ama'.
19Ginio nai ra raino akau ondo' sala' ka ulun ru Jaudi kalo boo pasuayon, kapoam karaan ra ulun bansa' ru bokon. Raino nasauk kano ra ulun ri Aki Kapuuno', akau no niayuk anak Nano. 20Koson ra baloi inimpuun ru batu, pangintapatan min inimpuun ra pangilaan ru rasul-rasul am nabi-nabi, Mabaya' i Kristus Jisus noyo galama' koson ra batu maatang ru baloi no. 21Io no mampasauk ra ngaangai' ulun no koson ra rondo' baloi am ginio masauk ra sambayangan ondo' matulai ra Tuhan. 22Ralalom pasimpungan min ri Kristus, akau niayuk nababaya' ra ngaangai' ulun ra bokon pasaukon ra baloi ri Aki Kapuuno', ioginio randanan ru Ambiluo Nano.
Currently Selected:
IPISUS 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.