DANIL 4
4
Raja' Nibukadnijar naginupi poyo
1Nangator Raja' Nibukadnijar ra papatanawan ragitio ra ulun intor ra ngaangai' bansa' am ragu ra titikop ru tana' ti:
“Kaansayan! 2Rongogo' tanou kuti intor ra kaimuagan-kaimuagan ondo' pinabala' raki' ri Aki Kapuuno' Ondo' Masawat Kaga'!
3“Mapara' kia gayo ru kaimuagan ondo' pinakito ri Aki Kapuuno'!
Mapara' kia' gayo ru kaimuagan ondo' binaal Nano!
I Aki Kapuuno' noyo raja' ra sabuoi-buoi no;
mamarinta Io ra kolondo' pupus.
4“Maayag aku ra moonsoi ra istana kuno, am makasia' ra kalangkayaan. 5Kaa' paat ra sangarawan ra aku tatanga' nombolong, naginupi aku am nakaalap ra pinaintalang ondo' makalalaa'. 6Nanusub aku ra ngaangai' ulun maminson giu' ra Babil maa' raginio matong muma' am mambala' ra arati' ru inupi kuno. 7Ngaangai' ulun mangilong, ulun mapandai kaga' ra sihir, ulun makakapandayan am ulun mapandai kaga' ra nujum ibiton muma'. Nantunung aku ra inupi kuno, kaa' kalo makapambala' ilo ra arati' nano. 8Kopongo raginio minatong i Danil uma' raki'. Io niayuk ininggalanan ri Biltsajar, sumugut ra inggalan ru dewa kuno. Nokoowot i Danil ra kuasa' intor ra ambiluo ru dewa-dewa ondo' mapasau, aku pana nantunung ra inupi kuno riso. Indagu aku: 9Okou Biltsajar, tingganai ru ulun ondo' mapandai, nakapandai aku ra ambiluo ru dewa-dewa ondo' mapasau soroi rirun, am makarati' kou ra ngaangai' ondo' nakasibuni ondo' malandom. Gitio noyo inupi kuno. Pambala' ra arati' nano.
10“Tatanga' ra aku nombolong, nakakito aku rondo' puun tataun ondo' makalu giu' ra tatanga' ru tana' ti. 11Puun tataun no giminayo am maikang saboi untu nano nakasaboi ra limbowon am maalap kakito ru moonong ulun ra tana' ti. 12Raun-raun no moonsoi am kawa' no maawas kaga' – maukop koson akanon ru ulun ra titikop ru tana' ti. Bibiag masigo sumindung ra saau nano; susuit mambaal ra bunsut ra raan nano am ngaangai' ondo' maayag mangakan ra kawa' nano.
13“Tatanga' ra aku mangkara' ra pinaintalang no, nakito ku rondo' malaikat timinuun intor ra suruga'. Nakatampos am pagilalain ru malaikat no. 14Indagu io ra bolos matangil, ‘Tagaro' puun tataun no, am putulo' raan-raan no. Tutuo' raun no am patiaso' kawa' no. Pagiruo' bibiag ra saau no am susuit ondo' nanabunsut ra raan no. 15Kaa' patatango' tuor no ra tana', am bongkoso' ra rantai basi' am tambaga'. Patatango' tuor no giu' ra padang sakot.
“ ‘Polosoo' ungkuyon no matiu' ru bolobou am polosoo' io mayan simpung ra bibiag am tutuu' ra bokon. 16Buoi tulu' ngambilor utok ru ulun kumulau masauk koson ra utok ru bibiag. 17Ginio noyo kapatasan ru malaikat-malaikat ondo' mapintar am pagilalain. Ginio ra, ulun ra ati ayuk makapandai ra i Aki Kapuuno' Ondo' Masawat Kaga' mokoondo' ra kuasa' ra pamarintaan ru ulun, am Io makakuasa' mangani' ra pamarintaan no ra osoi ayuk kasagaan Nano, am poyo ra ulun ondo' totopot kalo maatang.’
18“Ginio noyo inupi kuno. Okou Biltsajar, pambala' ra arati' nano raino. Kolondo' sangulun pana ra ulun maminson kuno makapambala' ra arati' no, kaa' okou makapambala' sabap ra nokoowot kou ra kuasa' intor ra ambiluo ru dewa-dewa ondo' mapasau.”
Nambala' i Danil ra arati' ru inupi ru raja'
19I Danil, ondo' niayuk ininggalanan ri Biltsajar, nakatigog kaga' koson sangkinolor saboi kalo nakaindagu. Kaa' indagu raja', “Okou Biltsajar, pai' pagalabo sabap ra inupi no am arati' no.”
Taam i Biltsajar, “Okou raja' kuno, sotopot no malansan aku ra inupi no am niayuk arati' no intor ra pantula' muno, am sala' ka intor rirun. 20Puun tataun no masawat kaga' am untu no nakasaboi ra limbowon, saboi makito ru moonong ulun ra tana' ti. 21Raun no moonsoi am kawa' no maawas kaga' saboi maukop ra akanon ru ulun ra titikop ru tana'. Bibiag masigo sumindung ra saau no am susuit mambaal ra bunsut ra raan no.
22“Iou raja' kuno, okou no puun tataun ondo' masawat am maikang no. Kinaayo muno gumaai saboi ra limbowon, am kuasa' muno lumangka' ra titikop ru tana'. 23Tatanga' ra okou magilong, rondo' malaikat tumuun intor ra suruga' am mindagu, ‘Tagaro' puun tataun no am pusoo', kaa' polosoon tuor nano ra tana'. Bongkoso' tuor no ra rantai basi' am tambaga', am patatango' tuor no mabaya' ra sakot giu' ra padang. Polosoo' ulun no matiu' ru bolobou, am polosoo' io mayan ra giu' masimpung ra bibiag buoi tulu' ngambilor.’
24“Raja' kuno, gitio noyo arati' no, am gitio noyo ondo' pinakito ri Aki Kapuuno' Ondo' Masawat Kaga' intor ra baal ondo' masauk rirun. 25Pagiruon kou intor ra ulun manampagun, am mayan simpung ra bibiag masigo. Buoi tulu' ngambilor okou mangakan ra sakot koson ra sapi', mombolong giu' ra tana' malimparang saboi basaan ru bolobou. Makapandai kou boo ra i Aki Kapuuno' Ondo' Masawat Kaga' mokoondo' ra kuasa' ra ngaangai' pamarintaan ru ulun, am Io makakuasa' mangani' ra pamarintaan no ra osoi ayuk kasagaan Nano. 26Susuban ondo' taakin maa' raginio tuor no patatangon giu' ra tana' makaarati' ra okou masauk ra raja' poyo malupus okou mangiou ri Aki Kapuuno' manguasa' ra titikop ru tana'. 27Ginio ra, okou raja', baya' no ra bilin kutu. Pai' boo pambaal ra tula. Baalo' atan ondo' moonsoi am matimpok, pakaasi' no ra ulun ondo' inimbolo'. Koson raginio noyo okou magulayun langkaya'.”
28Ngaangai' baal raginio nasauk ra Raja' Nibukadnijar. 29Kopongo mopor am ruo ngansila', bulintok raja' mugar giu' ra taap ru istana nano giu' ra Babil, 30indagu raja', “Ilai', mapara' gayo ru bandar Babil! Binaal ku ginio koson ra pusor bandar kuno koson mapainono' ra kuasa' am kinaayo kuno, katulayan am niayuk kinaikang kuno.”
31Kaa' kalo poyo nakai' raja' mindagu, korongog bolos mindagu intor ra limbowon, “Raja' Nibukadnijar, rongogo' ragu-ragu ragitio! Raino kakuasaan muno koson ra raja' alapon intor rirun. 32Pagiruon kou intor ra ulun manampagun, am mayan giu' ra tatanga' ru bibiag masigo. Mangakan kou ra sakot koson ra sapi' buoi tulu' ngambilor. Makapandai kou boo ra i Aki Kapuuno' Ondo' Masawat Kaga' mokoondo' ra kuasa' ra pamarintaan ru ulun, am Io makakuasa' mangani' ra pamarintaan no ra osoi ayuk kasagaan Nano.”
33Ragu-ragu raginio totopot nasauk ra namulali'. Raja' Nibukadnijar pinagiru' intor ra ulun manampagun am mangakan ra sakot koson ra sapi'. Inan nano naasa' ra bolobou, abuk nano giminawar koson ra bulu ru susuit kanui, am salindu nano poyo giminawar koson ra salindu ru susuit.
Raja' Nibukadnijar nongompor ri Aki Kapuuno'
34Indagu raja', “Pakasail tulu' ngambilor no magilong aku ra limbowon. Pulali' ru pangkaraan kuno nakaliman saguli'. Nongompor aku ri Aki Kapuuno' Ondo' Masawat Kaga' liliwa' mangurumat am mampatulai Riso ondo' naayag ra sabuoi-buoi no.
“Mamarinta i Aki Kapuuno' ra sabuoi-buoi no,
pamarintaan Nano kolondo' pupus.
35Ulun ra tana' ti kolondo' arati' Riso;
malaikat giu' ra suruga' am ulun ra tana' ti,
ngaangai' ragana' ru kuasa' Nano.
Kolondo' osoi pana makaanggal ra kasagaan Nano,
kapoam mangkuot ra binaal Nano.
36“Paat ra aku nakaliman saguli', kinaayo am kinatulai kuno, am niayuk kauligan ra pamarintaan kuno pasagulion raki'. Pagawai-pagawai am ulun mangaatang kuno manguma' raki', am kakuasaan kuno koson ra raja' pasagulion raki', am kinatulai kuno masauk ra maayo poyo intor ragili.
37“Raino aku, i Nibukadnijar, mongompor, mangurumat am mampatulai ra Raja' panguasa' giu' ra suruga'. Ngaangai' binaal Nano motopot am matimpok. Masaga' io mapainggana' ra osoi ayuk ondo' lumimbau.”
Currently Selected:
DANIL 4: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.