DANIL 2
2
Inupi ru Raja' Nibukadnijar
1Paat ra bilor karuo pamarintaan nano, Raja' Nibukadnijar naginupi. Magalabo kaga' raja' intor ra inupi nano saboi kalo mokororot. 2Ginio ra nampiau raja' ra ngaangai' mangilong, ulun mapandai kaga' ra sihir, babalian, am ulun makakapandayan koson mambala' ra arati' ru inupi nano. Bulintok ra ngaangai' ulun no muma', 3indagu raja' risilo, “Naginupi aku, am magalabo aku sabap ra masaga' aku makapandai ra arati' ru inupi no.”
4Tumaam ilo ra ragu ru Aram, “Kaayag kono raja' ra sabubuoi no! Tunungo' inupi muno, am mambala' akai ra arati' no rirun.”
5Indagu raja', “Namatas aku ragitio. Musiti' kau mambala' ra inupi no am arati' no raki'. Amon ru kalo maalap min mambala', puputulon kau am baloi min lunsayon am saukon ra tuntur ru malunsai. 6Kaa' amon ru maalap min mambala' ra inupi kuno am arati' no, mangani' aku ra tangguang ondo' moonsoi kaga' am pangurumatan ondo' maayo ramuyun. Raino pabalaa' inupi kuno am arati' no.”
7Taam ilo poyo, “Amon ru tunungon mu inupi no ramon, makapambala' akai boo ra arati' no.”
8Indagu raja', “Motopot toojo kinara' kuno! Masaga' kau ayuk magiliwa' ra jam, sabap ra inaru' ku noyo 9masaga' mangukum ra ukuman ra nogondo' ramuyun ngaangai' amon ru kalo makapantunung kau ra inupi no raki'. Naguguum kau koson magabau sabap ra malansan kau ra kulawon ku namatasan kuno. Tunungo' galing inupi kuno, am mangintopot aku boo ra makabala' min arati' no.”
10Kon ru ulun-ulun maminson ra raja', “Kolondo' sangulun pana ra titikop ru tana' ti makapambala' rirun atan ondo' kasagaan muno. Iou pana ra raja' ondo' matulai am maikang kalo igondo' mangitaak ra ulun mangilong, ulun mapandai kaga' ra sihir am ulun makakapandayan mambaal koson raginio. 11Kitaakon muno mapagon kaga' saboi kolondo' sangulun pana makapangiou raginio, ondo' ak am dewa-dewa; am dewa-dewa no poyo kalo minayan ra gino ngai' ru ulun.”
12Korongog ginio, sangit raja' am nanusub maa' raginio ngaangai' ulun maminson ra raja' giu' ra Babil potoyon. 13Susuban ru raja' pana pinatanou boo am ngaangai' ulun mapintar kaga', nakaaya' i Danil am rangan-rangan nano uyumon koson potoyon.
Nanulu' i Aki Kapuuno' ra inupi no am arati' nano ri Danil
14Tuum boo i Danil ri Ariok, tingganai ru ulun magalung ra raja'. Io noyo sinusub koson mampaugar ra ukuman matoi no. Ra pagilalain no, 15pangkuot i Danil ri Ariok, sabap ru raja' nangani' ra susuban ondo' malaat no. I Ariok pana nantunung ra atan ondo' nasauk.
16Mataki' i Danil nakitaak ra mabuoi poyo jam intor ra raja' maa' raginio makabala' arati' ru inupi no ra raja'. 17I Danil pana minuli' boo am pambala' ra rangan-rangan nano i Gananya, Misail am i Ajaria, baal ondo' nasauk no. 18Nanusub io risilo makiasi' ri Aki Kapuuno' panguasa' giu' ra suruga' maa' raginio makaasi' Io risilo am mampatutun ra ondo' nakasibuni ra inupi no risilo, maa' raginio kalo potoyon ilo mababaya' ra ulun maminson ra bokon giu' ra Babil. 19Paat rondom raginio niayuk nampatutun i Aki Kapuuno' ra ondo' nakasibuni ra inupi no ri Danil ralalom rondo' pinaintalang. Pongompor i Danil ri Aki Kapuuno' panguasa' giu' ra suruga' am indagu,
20“I Aki Kapuuno' totopot mapintar am makakuasa'!
Omporon Io ra sabubuoi no.
21Io no manguasa' ra bulintok am jam;
Io mampasauk am mopolonggo' ra raja';
Io no mangani' ra kapintaran am pangaratian.
22Io mampatutun ra ondo' nakasibuni ondo' malandom kaga';
Nakapandai Io ra baal ondo' nakasibuni ralalom kalandaman,
linibungan Io ru sinda.
23Mongompor aku am mangurumat Rirun, iou i Aki Kapuuno' ru kinamatuaan kuno.
Nangani' Kou raki' ra kapintaran am kaikangan;
nangiou Kou ra pakiasian kuno,
am nangani' ramon ra pataamon ra raja'.”
Nantunung i Danil ra inupi ru raja' am nambala' ra arati' no
24Kopongo raginio ongoi i Danil ri Ariok, ulun ondo' sinusub koson mamatoi ra ulun-ulun maminson ra raja'. Kon ri Danil riso, “Pai' potoyo' ulun-ulun maminson no. Ibito' aku muma' ra raja' am mambala' aku ra arati' ru inupi ru raja'.”
25Mataki' i Ariok nagibit ri Danil muma' ra Raja' Nibukadnijar. Kono ra raja', “Nakatuum aku ra sangulun ru Jaudi ralalom ru pamatiran, ondo' makapambala' ra arati' ru inupi muno.”
26Kopongo raginio pangkuot raja' ri Danil ondo' sabiton niayuk ri Biltsajar, “Makapambala' kou kia raki' ra inupi kuno am arati' no?”
27Taam i Danil, “Kolondo' ulun makakapandayan, ulun mapandai kaga' ra sihir, ulun mangilong am ulun mapandai kaga' ra nujum ondo' makapambaal raginio. 28Kaa' i Aki Kapuuno' panguasa' giu' ra suruga', nampatutun ra ngaangai' ondo' nakasibuni; nambala' Io rirun intor ra orou matong. Ginio ra iowo' aku mantunung ra inupi muno, iono pinaintalang ondo' nakito muno paat nombolong.
29Tatanga' ra okou nombolong, naginupi kou intor ra baal ru orou matong, am nanulu' i Aki Kapuuno' ra ngaangai' ondo' nakasibuni nampakito ra baal ondo' masauk no rirun. 30Nambala' noyo toojo i Aki Kapuuno' ra ondo' nakasibuni ra inupi no raki', sala' ka sabap no ra aku mapintar poyo intor ra osoi pana, kaa' maa' raginio maratian mu inupi no am makarati' ra suang ru guang muno.
31Ralalom ru pinaintalang no nakito mu rondo' sinungkalalaing ra saang muno. Maayo toojo sinungkalalaing no, kukuliat, am totopot makalalaa'. 32Ulu nano binaal intor ra mas kopoyo; kubab am longon nano binaal intor ra pirok; awak am tabing nano intor ra tambaga'; 33paa am tonok nano intor ra basi', am kalayam nano santayaran intor ra basi' am santayaran poyo intor ra tana' lia'. 34Tatanga' ra okou monontong riso, rondo' batu maayo naratu' galama' intor ra tobo, am pakatiu' ra kalayam ru sinungkalalaing ondo' binaal intor ra basi' am tana' lia' no, am nanutuk riso. 35Pulali' ru sinungkalalaing no naaba' am nasauk ra tuntur ru basi', tana' lia', tambaga', pirok am mas ondo' naumok koson ra kaau giu' ra intok mangagik ra gandum bulintok ra malasu'. Angin pana nanampui riso ra kalo nanatang ra atan pana babaya'. Kaa' batu no nasauk ra rondo' gunung ondo' namapak ra titikop ru tana' ti.
36Ginio noyo inupi muno. Raino ti boo am arati' nano. 37Okou raja' ondo' matulai. I Aki Kapuuno' panguasa' giu' ra suruga' nampasauk rirun ra sangulun raja' maayo kaga'. Nangani' Io rirun ra kuasa', kaikangan am urumat. 38Nampasauk Io rirun ra panguasa' ra titikop tayar ru tana' ondo' mokoondo' ra mamagun, am poyo panguasa' ra bibiag am susuit no niayuk. Okou no ulu ondo' binaal intor ra mas no. 39Mopongo pamarintaan muno mapupusan, sumalula' rondo' pamarintaan ondo' kalo maayo koson ra pamarintaan muno. Mopongo raginio sumalula' pamarintaan ra katalu, ondo' tatandu' no tambaga', ondo' mamarinta ra titikop ru tana'. 40Mopongo raginio rondo' pamarintaan ra kaapat ondo' maikang koson ra basi' momopol am manutuk ra ngaangai' no. Koson ra basi' nanutuk ra ngaangai' no, koson niayuk ra pamarintaan no momopol am manutuk ra ngaangai' pamarintaan ra bokon no. 41Nakito muno kalayam am bubua' ru kalayam ru sinungkalalaing no binaal intor ra basi' am tana' lia'. Arati' no ra pamarintaan no matayar-tayar. Pamarintaan no niayuk mokoondo' ra kaikangan koson ra basi' sabap ra tana' lia' no naratok ra basi'. 42Bubua' ru kalayam nano ondo' santayaran intor ra basi' am santayaran intor ra tana' lia' makaarati' ra santayaran ru pamarintaan no maikang am santayaran poyo malawo. 43Nakito mu niayuk basi' naratok ra tana' lia'. Baal raginio makaarati' ra panguasa'-panguasa' ru pamarintaan no kuminam mampasimpung ra pamarintaan nilo ra mambaal ra maguot ra maratok, kaa' koson ra basi' kalo maratok ra tana' lia', koson niayuk risilo kalo makasugut. 44Paat ra pamarintaan ru panguasa'-panguasa' no, i Aki Kapuuno' panguasa' giu' ra suruga' manirong rondo' pamarintaan ondo' mantilayun am kalo maalap kaala. Pamarintaan no mamuso ra lingonon ngaangai' pamarintaan ra bokon, am pamarintaan no mamarinta ra sabubuoi no. 45Nakito muno batu no naratu' galama' intor ra tobo, am niayuk nakatiu' ra sinungkalalaing ondo' binaal intor ra basi', tambaga', tana' lia', pirok am mas no. I Aki Kapuuno' ondo' maayo tatanga' mambala' rirun ra baal ru orou matong. Ginio noyo inupi muno sotopot no, am arati' nano maalap kaintopot.”
Nangani' raja' ri Danil ra taak
46Kopongo raginio Raja' Nibukadnijar pana igulatur ra saang ri Danil am nanusub maa' raginio taak simbalui kaunaran am kaminyan pataakon ri Danil. 47Kon ru raja', “Sotopot no i Aki Kapuuno' muno matulai ra gino ngai' ru dewa; Io no Tuhan ru ngaangai' raja', am nanulu' Io ra ngaangai' ondo' nakasibuni. Nakapandai aku ra baal raginio sabap ra makapambala' kou ra sinail ondo' nakasibuni no.” 48Kopongo raginio nangani' raja' ri Danil ra intok ondo' masawat, nangani' riso ra tangguang-tangguang ra pinaluntuk, nampasauk riso ra panguasa' ru wilayah Babil am tingganai ru ulun maminson ra raja'. 49Kaa' ra kitaak ri Danil, nampataak raja' ra kandoi tadbir ru wilayah Babil ri Sadrak, i Misak am i Abidnigo. Kaa' i Danil minayan giu' ra istana raja' am nangandoi ra giu' no.
Currently Selected:
DANIL 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.