2 TISALONIKA 3
3
Pakiasi' kano ramon ra Tuhan
1Pupus ti, pabukat ku ngai' pakiasi' kano ramon ra Tuhan, maa' raginio bala' ru Tuhan mataki' makatanou am apuon mabaya' ra urumat, mogondo' koson ra intok min ragili. 2Pakiasi' kano niayuk ri Aki Kapuuno' ra mampainggalur ramon intor ra ulun malaat, sabap ra pai' ru ngaangai' ulun mangintopot ra Tanou Moonsoi.
3Kaa' Tuhan no totopot malansanan. Mampaikang am magalung Io ramuyun intor ra kalaatan. 4Am mangintopot akai toojo ra Tuhan ra atan ondo' pinabala' maili ramuyun, baalon min niayuk am rayusin min poyo.
5Gama' ru Tuhan mampaintutun poyo ramuyun ra togom ri Aki Kapuuno' am poyo ati kulaan i Kristus mangani' ramuyun ra guang mataan.
Pai' kano katiar
6Pabukat ku ngai', ralalom inggalan ru Tuhan Jisus Kristus, manusub akai ra inggalur kano ra ulun Kristian ondo' mangatiar, koson kalo maya' ra pangilaan ondo' pinaatak maili risilo. 7Akau galama' nakapandai noyo ra musiti' kau tumilu ramon, sabap ra paat ra akai soroi ramuyun ragili, pai' ru mangatiar akai. 8Kalo noyo nakipakan akai ra osoi ayuk pana. Kaa' sotopot no orou-rondom minirot akai toojo nangandoi, koson kalo nantipagon akai ra sangulun kon pana intor ramuyun. 9Sala' ka koson ra kolondo' sasaban mai makipakan ramuyun, kaa' nangani' akai ayuk ramuyun ra rondo' tiluan moonsoi. 10Sabap ra paat ra akai soroi ramuyun, nanusub akai no ra, “Osoi ayuk mangatiar maginakan, kalo paakanon.”
11Rinagu mai ginio sabap ra naining mai ra mokoondo' intor ramuyun no mangatiar. Kolondo' rondo' kon mabaal nilo, ondo' ayuk am kokosombot ayuk ra baalon ru bokon. 12Ralalom inggalan ri Tuhan Jisus Kristus, manusub am mapakara' akai ra ulun koson risilo ra musiti' ilo tumanda' am mangandoi maguyum ra paginakanan galama'.
13Pabukat ku ngai', pai' kano kalawo guang mambaal ra moonsoi. 14Amon ru mokoondo' ulun kalo gumagaya' ra pambalaan ru surat maiti, pagilalai' min am pai' kano latok risilo, maa' raginio mauyu' ilo. 15Kaa' pai' karaa' ra ilo pantula', kaa' sawayo' ilo no koson pabukat min ra Kristian.
Ragu Pupus
16Gama' ru Tuhan noyo galama', ondo' puun ru pabansayan, masalok manaak ramuyun ra pabansayan Nano ralalom ru ngaangai' baal. Gama' ru Tuhan mabaya' ramuyun ngai'.
17Aku galama' nanulis ragitio: Kaansayan intor raki', i Paulus. Gitio noyo tatandu' ru moonong surat kuno; gitio noyo ra aku manulis.
18Gama' ru Jisus Kristus, Tuhan takau mambarakat ramuyun ngaangai'.
Currently Selected:
2 TISALONIKA 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.