2 SAMUIL 2
2
Pinili' i Daut nasauk ra Raja' Jiuda
1Kopongo raginio pangkuot i Daut ra Tuhan, “Masaga' kia Tuhan ra ongoyon ku kuasaa' rondo' ra bandar giu' ra Jiuda no?”
Taam Tuhan, “Iou.”
Pangkuot i Daut, “Ati kia ra bandar?”
Taam Tuhan, “Gibron.” 2 Ginio ra minongoi i Daut giu' ra Gibron am nagibit ra ruo ngaulun andu' nano: I Aginoam intor ra Jijriil, am i Abigail, napuor ri Nabal, ulun ru Karmil no. 3Inibit niayuk ri Daut ulun-ulun nano am sasambaloi nilono, am namagun ra bandar Gibron am ra liliut no. 4 Kopongo raginio minatong ulun ru Jiuda ra Gibron, am ra upacara pangumawan, pinili' nilo i Daut nasauk ra raja' Jiuda.
Pakaining Raja' Daut ra baangkai ru Raja' Saul no linobong noyo ru mamagun Jabis giu' ra Giliad no, 5nangator Raja' Daut ra ulun sinusub ra giu' no nabaya' ra bilin, “Gama' ru Tuhan no mambarakat ramuyun sabap ra napakito ra gagaya' min ra raja' mino ra linobong baangkai nano. 6Ginio ra, gama' ru Tuhan niayuk mapakito ra togom am gagaya' Nano ramuyun. Moonsoi pamakuan kuno ramuyun sabap ra binaal mino. 7Kaikango' guang mino am baani kano! Raja' Saul, raja' mini minatoi noyo, kaa' ulun ru Jiuda nampili' raki' masauk ra raja' nilo.”
Pinili' i Isbosit nasauk ra Raja' Israil
8I Abnir anak ri Nir, panglima saujor ru Raja' Saul, nagiru' nabaya' ri Isbosit, anak ru Raja' Saul giu' ra Maganaim, giu' ra sandaup ru Sungoi Jordan. 9Giu' no, pinili' ri Abnir i Isbosit nasauk ra raja' tampilon ra Giliad, Asyir, Jijriil, Ipraim am Binjamin, am poyo ra titikop ru Israil. 10Umur ru Raja' Isbosit no apat ngoopor ngambilor paat io nasauk ra raja' Israil. Io namarinta buoi ruo ngambilor.
Kaa' bansa' ru Jiuda giminagaya' ra Raja' Daut; 11intor ra bandar Gibron, Raja' Daut namarinta ra Jiuda buoi tulu' ngambilor am maintanga'.
Pangayawan ru Israil am Jiuda
12Sangarawan raginio i Abnir am pagawai-pagawai ru Raja' Isbosit minugar intor ra Maganaim minongoi ra bandar Gibion. 13I Joab (ina' nano makainggalan ri Jiruya), nababaya' ra kukula' ngaulun pagawai ru Raja' Daut, sumuku' ra bandar raginio niayuk. Karuruo pulalai no nakapaguma' giu' ra kolam Gibion; i Abnir am pulalai nano nanturung ra tampilon ragiti, am i Joab am pulalai nano tampilon ra giu' no. 14Kopongo raginio indagu i Abnir ri Joab, “Ibok susubo' takau kukula' ngaulun ra ulun takati makimagula' ra manakinandoi.”
Taam i Joab, “Iou.”
15Ginio ra mopor am ruo ngaulun ondo' uakil ru Raja' Isbosit am bansa' ru Binjamin, nampapatoi ra mopor am ruo ngaulun ulun ru Raja' Daut. 16Rokopon nilo ulu ru rondo' am bokon am monobok ilo ra tinai' ru rondo' am bokon, saboi ngaangai' nilo minatoi. Ginio sabap intok giu' ra Gibion no ininggalanan ra “Umo ru Ilang.”
17Kopongo raginio nasauk pangayawan maayo kaga'. I Abnir am saujor ru Israil no kinala ru ulun ri Raja' Daut. 18Katalu-talu ngaulun anak ungkuyon ri Jiruya soroi ra giu' no: i Joab, i Abisai am i Asail. I Asail, ondo' masimbul koson ra kinaribok ru paus, 19tumalimpuun mangilou ri Abnir ra kalo minuog-uog. 20Pangkaili i Abnir ra bakulung am pangkuot, “Okou ginio Asail?”
Taam io, “Iou.”
21Kon ri Abnir, “Pai' pangilou raki'! Ilowo' sangulun intor ra saujor no am alapo' kinandoi nano.” Kaa' rinayus ayuk ri Asail nangilou riso. 22Igondo' poyo kon ri Abnir riso, “Pai' pangilou raki'! Pai' aku jajali' mamatoi rirun! Ati kulaan ku monontong ra bulos ru maayo muno i Joab?” 23Kaa' lakat poyo i Asail no mangilou riso. Paturaa' ri Abnir tutura' nano ra bakulung, am natiu' tinai' ri Asail saboi nansabut tutura' no ra bakulung nano. Naaba' i Asail ra tana' am narayus patoi ra giu' niayuk. Ngaangai' ru ulun ondo' nakasaboi ra intok io naaba' no minuog am minigor ra giu' no.
24I Joab am i Abisai narayus nangilou ri Abnir. Paat ra tumolop mato ru orou, nakasaboi ilo ra Bulur Ama, ondo' soor ra tampilon sirangon ru Gia, giu' ra ralan sumuku' ra tana' kaagisan ru Gibion. 25Giu' no ulun intor ra bansa' ru Binjamin naguguum poyo nabaya' ri Abnir, am timinampos ilo ra baris giu' ra tampak ru rondo' bulur. 26Intor ra giu' no, nampiau i Abnir ri Joab, “Musiti' kia mampapatoi takau ra sabuoi-buoi no? Kalo kia nakaliman kou ra pangayawan ragitio magibit ayuk ra kaimbalaan? Akai ti pabukat rondo' bansa' rirun. Kula' poyo buoi muno maginaa ra kalo poyo manusub ra ulun muno lumonggo' mangilou ramon?”
27Taam i Joab, “Magibot aku ralalom inggalan ri Aki Kapuuno' ondo' naayag, amon ru kalo rinagu min koson raginio, maaru' ulun-ulun kuno mangilou ramuyun saboi masuaban.” 28I Joab no pana nanamput ra bujung koson ra tatandu' ra ulun-ulun nano lumonggo' mangilou ra ulun ru Israil, am pangayawan no liminonggo'.
29I Abnir am ulun-ulun nano minugar nansail ra Limayak Jordan buoi nosorondom. Liminaup ilo ra Sungoi Jordan, am kalupus minugar ra nonsongorou ra sumunu' no, nakasaboi ilo ra Maganaim.
30Kopongo i Joab liminonggo' nangilou ri Abnir, tinimung no ngaangai' ulun nano. Katutuni' no ra nailusan io ra mopor am siam ngaulun intor risilo, kalo nakaaya' i Asail. 31Ulun ru Raja' Daut namatoi ra 360 ngaulun intor ra ulun ri Abnir ondo' ginilo bansa' ru Binjamin. 32Kopongo raginio i Joab am ulun-ulun nano nangkayang ra baangkai ri Asail am linobong ra kalabangan ru sasambaloi nano giu' ra Bitligim. Kopongo raginio minugar ilo ra buoi ru nosorondom, am suabon no paat ra matawang, nakasaboi ilo ra Gibron.
Currently Selected:
2 SAMUIL 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.