2 KORINTUS 12
12
Papakitanan ondo' pinaintalang ru Tuhan ri Paulus
1Kabalu' pana gitio kolondo' onong, kaa' lumimbau aku niayuk koson masaga' aku mambala' ra papaintalangan am papakitanan ondo' pinakito raki' ru Tuhan. 2Makaulig aku ra sangulun Kristian ondo' mopor am apat ngambilor ra nakasail i kinayang io ra suruga', ioginio intok masawat kaga'. (Kalo nakapandai aku ra topot-topot kia nasauk kapoam papaintalangan ayuk – i Aki Kapuuno' ayuk nakapandai.) 3Sagulio' ku poyo: Nakapandai aku ra ulun i kinayang ra Pirdaus. (Kalo nakapandai aku ra topot-topot kia nasauk kapoam papaintalangan ayuk – i Aki Kapuuno' ayuk nakapandai.) 4Giu' i nokorongog io ra atan ondo' kalo maalap kasabit ra ragu, ondo' kalo paraguin ru Tuhan ra ulun. 5Ulun raginio noyo omporon kuno, kaa' kalo niayuk lumimbau aku, ondo' ak am atan ondo' mampakito ra kalawaan kuno. 6Kaa' amon ru lumimbau aku pana, pai' ru sasambungon aku, sabap ra motopot raguon kutu. Kalo masaga' aku lumimbau sabap ra papakitanan i, kaa' maya' ra atan ayuk ondo' binaal am rinagu kuli.
7Kaa' maa' raginio kalo minsawat guang kutu sabap ra kinibit ru papakitanan ondo' makaimuag, inanian aku ra rondo' maruol ra inan kutu. Mansail ra maruol ti magail aku imboloon ru Tingganai ru riwato, maa' raginio kalo boo minsawat guang kutu. 8Intalu aku no pakiasi' ra Tuhan koson pairuin ku Riso maruol no. 9Kaa' taam Io, “Kataawan Kuno sama' noyo rirun, sabap ra kinaikang ru kuasa' Kuno makaintalang mansail ra kalawaan.” Sabap raginio maansayan aku poyo ra aku malawo, maa' raginio kuasa' ri Kristus sumimpung am magalung raki'. 10Sabap raginio, kalo malaa' aku makauma' ra atan ayuk kalawaan; pagasaban, kapoam nansalinut kapaganan sabap ra kaatangan ri Kristus. Sabap ra paat ra aku malawo, maintuma' niayuk raginio paikangon aku boo.
Pagalabaan ri Paulus ra ulun-ulun ru Korintus
11Akau no nangkinibit raki' mindagu koson ra sasambungon. Akau ondo' sotopot no musiti' mongompor raki'. Kabalu' pana aku ti kolondo' kon onong, kaa' kalo noyo nakatauli aku intor ra “rasul-rasul” ondo' kinaatang mino. 12Mansail raki' masuang noyo tatandu' am baal kaimuagan pinakito ri Aki Kapuuno' ramuyun, liliwa' aku, mabaya' ra guang mataan, nangandoi koson mampainono' ra aku ti sangulun rasul. 13Ati kia malimanan min ra kalo lioon kau intor ra pasimpungan ulun Kristian ra bokon no? Ginio kia ra kalo igondo' pantipagon aku ramuyun pakitaak ra ruit? Makimaap aku sabap ra sala kuno ramuyun no!
14Gitio kaintalu ra aku nakatampos mongoi ramuyun. Pai' ru mantipagon aku ramuyun, sabap ra akau no tupo kasagaan kuno, sala' ka ruit mino. Pai' ru anak no ondo' mampakan ra matuo nano, kaa' matuo ondo' mampakan ra anak nilai no. 15Maayo guang kuno mangani' ramuyun ra atan ayuk mokoondo' raki', suku' ra kaayagan kuno pana, maa' raginio makapangindangan aku ramuyun. Amon ru ginio noyo gayo ru kinotogom kuno ramuyun, kua pai' tagami' min aku toojo?
16Maaru' iowon min noyo ra kalo igondo' pantipagon aku ramuyun. Kaa' mokoondo' mindagu ra aku ti maabau-abau am mapandai toojo mamparuung ramuyun. 17Ati kulaan? Igondo' aku kia pangingkaut ramuyun mansail ra giali ondo' pinoongoi ku ramuyun i? Kalo! 18Pinoongoi ku tupo i Titus ramuyun, am sinusub ku poyo pabukat Kristian ra bokon mabaya' riso. Nangingkaut kia i Titus ramuyun? Maaru' kalo, sabap ra rondo' guang mai ri Titus am mogondo' niayuk ralan mai mangandoi.
19Pabukat ondo' tagamin ku, indoson min lair ra buoi ti nagisaung akai ramuyun. Makapandai i Aki Kapuuno' ra ngaangai' ondo' rinagu mai gumagaya' niayuk ra kasagaan ri Kristus, am ngaangai' ondo' binaal mai koson mampasingkot ramuyun. 20Maimamang aku ra paat ra mongoi aku ramuyun, ilain ku sala' kau boo intor ra atan ondo' lansanin kuli, am aku pana sala' boo intor ra atan ondo' lansanin min. Maimamang aku ra akau mansasangor, magugusolon, mansisang, matayar-tayar, magagasab, mangilaat ra ulun, malilimbau am kumuliangi-angi kau. 21Malaa' aku ra paat ra aku matong ra maagu no, tauyuon aku ri Aki Kapuuno' ra saang min, am tangiin ku ulun makatula no ondo' kalo poyo timinalikur intor ra pansasawaan am baal nilo ra majamol am makauyuyu' no.
Currently Selected:
2 KORINTUS 12: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.