1 JUANIS 4
4
Ambiluo ri Aki Kapuuno' am ambiluo ru pantula' ri Jisus Kristus
1Pabukat kau ngaangai' ondo' tagamin ku! Pai' kau pangintopot ra ngaangai' ulun ondo' mindagu ra mokoondo' ilo ra Ambiluo ri Aki Kapuuno'. Kaa' kinami' min ilo po galing ru mokoondo' ilo ra Ambiluo intor ri Aki Kapuuno' kapoam kolondo'. Sabap ra raino ti masuang nabi magabau soroi ra ati-ati ayuk. 2Gitio ralan min koson mangulig ra Ambiluo ri Aki Kapuuno': Ulun ondo' mindagu ra i Jisus Kristus minatong intor ri Aki Kapuuno' am siminauk ra ulun, ulun no mokoondo' ra Ambiluo ri Aki Kapuuno'. 3Kaa' ulun ondo' kalo mangintopot ra i Jisus no minatong ra tana' ti am siminauk ra ulun, ulun raginio kolondo' Ambiluo ri Aki Kapuuno'. Ulun no mokoondo' ra ambiluo ru pantula' ri Jisus Kristus. Nokorongog kau ra ambiluo raginio matong am raino soroi io ra tana' ti.
4Kaa' pabukat kau ngaangai', akau intor ri Aki Kapuuno'. Naanggal min nabi-nabi magabau sabap ra mokoondo' kau ra Ambiluo ondo' makakuasa' toojo intor ra ambiluo ru ulun ru tana' ti. 5Nabi-nabi ra magabau no mantunung ra tutunungon ru tana' ti. Am ondo' mangkirongog risilo no ulun ru tana' ti, sabap ra ilo intor ra tana' ti. 6Kaa' itakau ti anak ri Aki Kapuuno'. Ulun ondo' makaulig ri Aki Kapuuno', mangkirongog ra raguon takau. Ulun ondo' kalo makaulig ri Aki Kapuuno', kalo mangkirongog ra raguon takau. Gitio noyo rondo' ralan takau mangulig ra ambiluo motopot kapoam ambiluo mapalayau.
I Aki Kapuuno' noyo togom
7Pabukat kau ngaangai' ondo' tagamin ku! Kotogom kano ra rondo' am bokon, sabap ra togom ti intor ri Aki Kapuuno'. Ulun ondo' motogom, io no anak ri Aki Kapuuno' am nakaulig io ri Aki Kapuuno'. 8Ulun kalo motogom, kalo makaulig io ri Aki Kapuuno', sabap ra i Aki Kapuuno' noyo togom. 9Gitio noyo ralan ri Aki Kapuuno' nampakito ra togom Nano ritakau: Nanusub Io ra Anak langkuir Nano minatong ra tana' ti, maa' boo raginio mokoowot takau ra kaayagan sabap Riso. 10Gitio noyo togom: sala' ka itakau nonogom ri Aki Kapuuno', kaa' i Aki Kapuuno' nonogom ritakau. Am nanusub Io ra Anak Nano sumauk ra pabansayan ru tula takau.
11Pabukat kau ngaangai' ondo' tagamin ku! Amon ru motogom toojo i Aki Kapuuno' no ritakau, itakau pana musiti' motogom ra rondo' am bokon. 12 Kolondo' sangulun pana nakakito ri Aki Kapuuno'. Kaa' amon ru motogom takau ra rondo' am bokon, sumimpung i Aki Kapuuno' ritakau am togom Nano tumilayun ritakau.
13Nakapandai takau noyo ra maayag takau sumimpung ri Aki Kapuuno' am maayag Io sumimpung ritakau, sabap ra nangani' Io noyo ritakau ra Ambiluo Nano. 14Akai galama' nakakito ra Anak ri Aki Kapuuno'. Am pinatanou mai ra ulun bokon ra sinusub Io ru Ama' no masauk ra Mamamayag ra ulun ru tana' ti. 15Osoi ayuk mangintopot ri Jisus no Anak ri Aki Kapuuno', i Aki Kapuuno' maayag sumimpung ra ulun no am niayuk ulun no maayag sumimpung ri Aki Kapuuno'. 16Nakapandai takau galama' am nangintopot ra motogom i Aki Kapuuno' ritakau.
I Aki Kapuuno' noyo togom. Osoi ondo' bayag nano inonggom ru togom, ulun no siminimpung ri Aki Kapuuno' am i Aki Kapuuno' siminimpung riso. 17Togom tumilayun ralalom kaayagan takau, io no mampasauk ritakau makakau' paat ra Orou Pangukuman. Makakau' takau sabap ra bayag takau ra tana' ti mogondo' ra bayag ri Jisus Kristus. 18Ulun ondo' nakaliman ra togom ri Aki Kapuuno' kalo malaa'. Sabap ra togom ra tumilayun no mamuso ra ngaangai' pangkaraan ra malaa'. Intor raginio, osoi ayuk malaa' no, kalo poyo nakaliman ra togom ri Aki Kapuuno' tumilayun riso, am ulun raginio malaa' ra pangukuman no.
19Mokotogom takau sabap ra i Aki Kapuuno' nakapagulu motogom ritakau. 20Amon ru mokoondo' sangulun mindagu, “Motogom aku ri Aki Kapuuno',” kaa' masisang io ra pabukat nano, ulun no magabau. Ulun ondo' kalo motogom ra pabukat ondo' makito no, mulu' pi nai boo ri Aki Kapuuno' ondo' kalo makito no. 21Gitio noyo panusuban ondo' pinataak ri Jisus Kristus ritakau: Osoi ayuk motogom ri Aki Kapuuno' musiti' motogom ra pabukat nano.
Currently Selected:
1 JUANIS 4: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.