1 JUANIS 2
2
I Jisus mangindangan ritakau
1Pabukat kau ngaangai'! Tulisin takamin ragitio, maa' raginio kalo boo mambaal kau ra tula. Kaa' amon ru mokoondo' poyo mambaal ra tula, mokoondo' mangingindangan ritakau, ioginio i Jisus Kristus ondo' motopot. I Jisus Kristus mangindangan ritakau makiasi' ri Aki Kapuuno'. 2I Jisus galama' pabansayan ra tula takau. Sala' ka tula takau ayuk, kaa' tula ru ngaangai' ulun. 3Amon ru gumagaya' takau ra ngaangai' susuban ri Aki Kapuuno', ginio tatandu' ra itakau ti nakaulig ri Aki Kapuuno'. 4Ulun ondo' mindagu, “Nakaulig aku ri Aki Kapuuno',” kaa' kalo gumagaya' io ra susuban ri Aki Kapuuno', magabau io ayuk am kolondo' katapatan soroi ra guang nano. 5Kaa' ulun ondo' gumagaya' ra Ragu ri Aki Kapuuno', ulun no motogom ri Aki Kapuuno' ra matanda'. Ginio noyo tatandu' ra itakau maayag sumimpung ri Aki Kapuuno'. 6Osoi ayuk mindagu ra maayag io sumimpung ri Aki Kapuuno', musiti' io maayag koson ra bayag ri Jisus Kristus.
Panusuban nakabagu
7 Pabukat ondo' tagamin ku! Ondo' tulisin kutu sala' ka rondo' panusuban nakabagu. Gitio susuban nakalair ondo' pinasaboi ramuyun intor ra akau nangintopot ri Kristus. Io ti am pambalaan nakalair intor ri Aki Kapuuno' ondo' norongog min noyo. 8Kabalu' pana koson raginio, panusuban ra tulisin kutu nakabagu niayuk. Katapatan ra panusuban ragitio makito intor ra kaayagan ri Jisus Kristus am niayuk kaayagan min. Molondom tumalimpuun noyo mairu' am binusasal ondo' motopot pabulowo.
9Ulun ondo' mindagu ra soroi io ralalom ru binusasal kaa' masisang io ra pabukat nano, arati' no soroi io ra kalandaman saboi raino. 10Ulun ondo' motogom ra pabukat nano, maayag ulun no ralalom ru binusasal. Saboi kolondo' intor riso no mangkinibit ra ulun bokon makatula. 11Kaa' ulun ondo' masisang ra pabukat nano, soroi io ayuk poyo ralalom ru kalandaman. Mugar io ralalom ru kalandaman am kalo napandayan ati angayan no, sabap ra kalandaman no mambaal riso kalo makakito.
12Anak kau ngaangai', tulisin takamin ra tula min inampun noyo sabap ra ondo' binaal ri Jisus Kristus. 13Ama' kau ngaangai', tulisin takamin sabap ra nakaulig kano ri Jisus Kristus ondo' soroi intor ra talimpuun i. Kamulakan kau ngaangai', tulisin takamin sabap ra naanggal min noyo Tingganai ru riwato no.
14Anak kau ngaangai', tulisin takamin sabap ra nakaulig kau ri Ama', io no i Aki Kapuuno'. Ama' kau ngaangai', tulisin takamin sabap ra nakaulig kau noyo ri Aki Kapuuno' ondo' soroi intor ra talimpuun i. Kamulakan kau ngaangai', tulisin takamin sabap ra akau maikang. Ragu ri Aki Kapuuno' soroi ra ralalom ru guang mino. Am naanggal min noyo Tingganai ru riwato.
15Pai' min tagami' suang ru tana' ti, kapoam atan ayuk mokoondo' ra tana' ti. Amon ru motogom kau ra suang ru tana' ti, kalo motogom kau ri Ama'. 16Ngaangai' suang ru tana' ti: ondo' papaliso ru ulun makatula, ondo' makito no am kasagaan ayuk ru guang, ondo' makiompor sabap ra masuang kuliamos; ginio ngai' sala' ka intor ri Aki Kapuuno', kaa' intor ra tana' ti. 17Tana' ti am ngaangai' suang nano ondo' gogoton ru ulun, tumalimpuun mapuso. Kaa' ulun ondo' gumagaya' ra susuban ri Aki Kapuuno', maayag io ra sabuoi-buoi no.
Pantula' ri Jisus Kristus
18Pabukat kau ngaangai', pamupusan nasuku' noyo! Pinabala' noyo ramuyun ra pantula' ri Jisus Kristus maaru' matong. Raino masuang noyo pantula' ri Jisus Kristus ondo' makito. Gitio tatandu' ra Orou Pupus maar noyo. 19Pantula' ri Jisus Kristus ondo' nangiruan ritakau, sotopot no sala' ka itakau po ngai'. Amon ru ulun ilo ru itakau, maaru' sumimpung ilo ritakau. Kaa' ilo ti nangiruan ritakau. Gitio mampakito ra kolondo' sangulun pana intor risilo topot-topot ulun takau.
20Kaa' nakaapu kano ra Ambiluo ri Aki Kapuuno' ondo' pinataak ri Jisus Kristus. Ginio sabap ra akau nakaulig toojo ra pangilaan ri Aki Kapuuno' ondo' motopot. 21Tulisin ku gitio ramuyun sala' ka kalo nakaulig kau ra pangilaan motopot ri Aki Kapuuno', kaa' nauligan min noyo am kolondo' abau ra pangilaan ri Aki Kapuuno' ondo' motopot no.
22Ulun magabau no, io no ulun ondo' mindagu ra i Jisus sala' ka Mamamayag ondo' sinusub ri Aki Kapuuno'. Ulun no pantula' ri Jisus Kristus. Kalo mangintopot io ra Ama' kapoam Anak. 23Ulun ondo' kalo mangapu ra Anak, arati' no kalo niayuk mangapu io ra Ama'. Am ulun ondo' mangapu ra Anak, arati' no mangapu io niayuk ra Ama'.
24Ginio boo ra pambalaan ondo' norongog mini intor ra talimpuun i, musiti' buliin min toojo ra guang. Amon ru gumuut kau ayuk ra pambalaan ondo' norongog mini, akau maayag masisimpung ra Anak am Ama'. 25Am gitio binantu' galama' ri Jisus Kristus ritakau, io no kaayagan mantilayun.
26Tulisin ku pambalaan ragitio ramuyun koson ra ulun-ulun ondo' mangkinam mamparuung ramuyun. 27Kaa' akau galama', inanian noyo ri Jisus Kristus ra Ambiluo Nali. Am buoi ru Ambiluo no soroi ramuyun, kalo pana ilaan kau ru ulun. Ambiluo no mangila' ramuyun ra atan-atan ayuk am pangilaan Nano motopot, sala' ka magabau. Ginio boo ra akau musiti' gumagaya' ra pangilaan ru Ambiluo no, am maayag kau sumimpung ri Jisus Kristus.
28Pabukat kau ngaangai', pagulayun kano simpung ri Jisus Kristus! Paat ra ratangan Nano, makakau' takau toojo muma' Riso, am kalo mansibuni sabap ra mauyu'. 29Nakapandai kano ri Jisus Kristus naayag maya' ra kasagaan ri Aki Kapuuno'. Ginio boo ra akau musiti' makapandai ra moonong ulun ondo' maayag maya' ra kasagaan ri Aki Kapuuno', io no anak ri Aki Kapuuno'.
Currently Selected:
1 JUANIS 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.