Marko 2
2
Mbwaakaponya muntu uuyuminide mubili
(Matayo 9:1-8; Luka 5:17-26)
1 #
Mt 9:1-8; Lk 5:17-26 Amane mazuba amwi wakabweeda ku-Kapemauma, mpoonya kwakaya impuwo kuti uli muŋanda. 2Lino mbukwakayoboloka bantu banji loko, kwakabula busena naaba amulyango. Nkabela wakali kubaambila makani. 3Mpoonya awo kwakasika bantu ibamuletela muntu uuyuminide mubili, uli mukutembekwa bane. 4Elyo mbubakakacilwa kuswena afwiifwi nkaambo kamakamu, bakavumbulula lululi mpoonya mpaakabede. Bamane kulutulula, bakalengelezya bulo mbwaakalede oyo muntu uuyuminide mubili. 5Lino Jesu naakabona lusyomo lwabo waambila oyo uuyuminide mubili kuti, Mwanaangu, walekelelwa zibi zyako. 6Pele kakuli bamwi balembi bakakede nkukonya, bakali kulikopa mumyoyo yabo kuti, 7#Is 43:25Nkaambonzi oyu muntu ncaamba boobo? Ulasampaula Leza. Nguni uukonzya kulekelela zibi, pele Leza alike? 8Mpoonya Jesu naakaziba kuti balalikopa boobo mumyoyo yabo, wakababuzya kuti, Ino mulikopelanzi boobo mumyoyo yanu? 9Icuuba ncili, sa nkwaambila uuyuminide mubili kuti, Walekelelwa zibi zyako, nanka kuti, Buka, bweza bulo bwako, enda. 10Pele nkokuti muzibe kuti Mwana a-Muntu ulijisi bwami ansi ano bwakulekelela bantu zibi zyabo, elyo waambila uuyuminide mubili wati, 11Webo, ndakwaambila kuti, Buka, bweza bula bwako, uye kuŋanda yako. 12Mpoonya awo wakayumuka, wabweza bulo bwakwe, wainka, balimweebelede boonse, Lino boonse bakagamba, balemeka Leza, bati, Tatuna kabwene kali bobuya.
Jesu mbwaakaita Levi
(Matayo 9:9-17; Luka 5:27-38)
13 #
Mt 9:9-13; Lk 5:27-32 Lino wakazwa lwabili, waya kunkomwe yalwizi, elyo bantu boonse bakali kumutobela, nkabela wakali kubaiisya. 14#Joh 1:43Nkabela naakali mukwiinda wakabona Levi mwanaakwe Alifayo, ulikede kucitelelo, elyo wakamwaambila kuti, Cilila ndime. Mpawo wakanyamuka, wamucilila. 15Lino naakakede muŋanda yakwe, kwakali banji basimutelo abasizibi ibakakede antoomwe a-Jesu abasikwiiya bakwe, nkaambo bakali banji bakamucilila. 16Nkabela nibakamubona balembi baba-Farisi kuti ulalya antoomwe abasizibi abasimutelo, bakaambila basikwiiya bakwe kuti, Ma! ulalya akunywa abasimutelo abasizibi. 17Amvwe buyo, Jesu wabaambila kuti, Bantu baumi embo mbibayanda musilisi pe, pele balwazi. Nsizide kuzookoba baluleme pele basizibi.
18 #
Mt 9:14-17; Lk 5:33-38 Nkabela basikwiiya ba-Johane aba-Farisi bakali kuliimya kulya, elyo beza kuzoomubuzya kuti, Ino nkaambonzi basikwiiya ba-Johane abasikwiiya baba-Farisi balaliimya kulya, anukuti basikwiiya bako tabaliimyi pe? 19Jesu wakabaambila kuti, Sa inga basibwiinga balakonzya kuliimya kulya ciindi mukamwini bwiinga ncacili abo? Ciindi mukamwini bwiinga ncacili abo tabakonzyi kuliimya kulya pe. 20Pele ciyoosika ciindi ncibayoonyangwa mukamwini bwiinga, nceciindi eco ncibayooliimya kulya. 21Taakwe muntu uumamya cimamo cacisani cipya acikobela cikulukulu, nkaambo kuti kwacitwa boobo, eco cimamo cipya cilazakazya cikulukulu, elyo cipulo cilakomena. 22Alimwi taakwe muntu uutuntila waini mupya munkomo inkulukulu, nkaambo kuti wacita boobo waini ulabbosola inkomo, elyo waini ulanyonyauka, azyalo inkomo, pele waini mupya ulatuntilwa munkomo impya.
Makani aabuzuba bwa-Sabata
(Matayo 12:1-8; Luka 6:1-5)
23 #
Mt 12:1-8; Lk 6:1-5 #
Dt 23:25
Mubuzuba bumwi bwa-Sabata wakaandulula akati kamyuunda, elyo basikwiiya bakwe bakatalika kuya bupulaula maila kumakunka. 24Lino ba-Farisi bakamwaambila kuti, Langa, nkaambonzi balacita citondwa mubuzuba bwa-Sabata? 25#1 Sam 21:1-6Wabaambila wati, Sa tamuna kubala, mbwaakacita Davida naakapenga akufwa inzala, walo abaabo mbaakali abo? 26#Lev 24:9Wakanjila muŋanda ya-Leza kuciindi camupaizi simutwe Abiyatare, wagama kulya mikamu iyakatuulidwe, iitondwa kuligwa pele kubapaizi luzutu, alimwi wakaabila mbaakali abo. 27#Dt 5:14Lino wakabaambila kuti, Sabata wakaanzilwa muntu, muntu taanzilwi Sabata pe. 28Nkaambo kaako Mwana a-Muntu ngomwami nikuba ku-Sabata.
Currently Selected:
Marko 2: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.