Incito 16
16
Paulo mbwaakasika ku-Derbe aku-Lustra, ambwaakacita kuli-Timoteo
1Elyo wakasika ku-Derbe aku-Lustra, oko kwakali sikwiiya uutegwa Timoteo, mwana amukaintu mu-Juda musyomi, pele wisi wali mu Helene. 2Walo wakali empuwo mbotu kulibabunyina bamu-Lustra amuIkoniyo. 3Paulo wakamuyanda oyo kuti bainke awalo, nkabela wakamutola wamupalula nkaambo kaba-Juda abakali kulaayo masena, nkaambo boonse bali kuzi wisi wali mu-Helene. 4Elyo nobakali kuya bwiinda muminzi, bali kubapa milao iyakaambwa baapostolo abapati bamu-Jerusalemu, kuti biicite. 5Aboobo imbungano zyakayumizigwa kulusyomo, akuvuzigwa mazuba oonse.
Paulo mbwaaleasikilwa cilengaano
6Nkabela bakainda mucisi ca-Frigiya eca-Galatiya, bakakasigwa Muuya Uusalala kwaamba makani mu-Asiya, 7nobakasika kumbali a-Musiya, bati kasoleke kunjila mu-Bituniya, kwalo Muuya wa-Jesu tuukabazuminide, 8nkabela ku-Musiya bakaindilila buyo, baselemuka kuya ku-Trowa. 9Eno masiku Paulo wakasikilwa cilengaano. Mwaalumi waku-Makedoniya wakaliimvwi, ulamukombelela kuti, Zubukila ku-Makedoniya, utugwasye. 10Naakabona cilengaano, ndilyonya twakasoleka kuya ku-Makedoniya, twali kusyoma kuti Leza ngowakatwiita kuti tukabakambaukile Makani Mabotu.
Mbwaakanjila mu-Filipi
11Notwakazwa ku-Trowa abwaato, twakalulama kuya ku-Samotrake, buce ku-Niapoli, 12kuzwa oko twakaya ku-Filipi, kumunzi wamu-Makedoniya, walo ngomunzi mupati wamucisi eco, mobali kukala ba-Roma. Mulooyo munzi twakali kulyokezya mazuba amwi. 13Kubuzuba bwa-Sabata twakazwa mumunzi, twainka kumbali amulonga, nkotwali kuyeeya kuti nkokukombelwa, nkabela twakakala twakambaukila bakaintu abakali kubungene, 14Eno kwakali mukaintu umwi uwakali kuswiilila uutegwa Ludiya, uwali sikuuzya masila aasia, wakumunzi wa-Tiyatira, uwali kukomba Leza. Mwami wakajula moyo wakwe kuti aswiililisye kukukambauka kwa-Paulo. 15Naakabapatizigwa walo abeŋanda yakwe, wakatukumbilisya kuti, Na mwati ndisyomekede ku-Mwami amunjile muŋanda yangu, mukale. Wakatukombekzya.
Mbobakabikwa muntolongo asikulindila mbwaakasanduka
16Elyo notwakali kuya kubusena bukombelwa, twakaswaana musimbi uwali amuuya wakusonda, uwakavubya basimalelaakwe akusonda. 17Walo wakacilila Paulo aswebo, uloompolola kuti, Aba bantu mbazike ba-Leza, Sijulu lyamajulu, abatukambaukila nzila yakufutuka. 18Wakacita obo mazuba manjimanji. Kwalo Paulo wakapya moyo, wacebuka wati kumuuya, Muzina lya-Jesu Kristo ndakulailila kuti uzwe mulinguwe. Wakazwa nciconya eco ciindi.
19Eno basimalelaakwe nobakabona kuti impindu njobakali kulangilila yamana, bakajata Paulo a-Sila, akubakwelela munkuta kumbele lyabami, 20nobakabatola kubabetesi bakati, Aba bantu, mbobali ba-Juda, banyonyonganisya munzi wesu, 21balaamba ziyanza nzotuteelede kuzitambula akuzicita, swebo toba-Roma. 22Ndilyonya bantu bakababukila, ababetesi bakabazapawida zyakusama zyabo, balailila kuti baumwe milusu. 23Nobakabauma mabunda mabunda bakabanjizya muntolongo, balailila uulindila ntolongo kuti abalindilisisye. 24Walo alaililwe obo, wakabanjizya muntolongo iili akati, waanga maulu aabo muziliba. 25Kwalo akati kamasiku ba-Paulo a-Sila bakali kukomba akwiimbila Leza nyimbo, abaange bali kubaswiilide. 26Ndilyonya kwakaba muzunzumo mupati wenyika, kwakazunganyizigwa ntalisyo zyentolongo. Mpoonya milyango yoonse yakajuka, zyakaangunuka nkeetani zyabo boonse. 27Uulindila ntolongo naakasinsimuka akubona milyango yentolongo ili bukwazi, wakasomona ceba lyakwe, wati kalijaye, mbwaakali kuyeeya kuti baange baloboka. 28Kwalo Paulo wakoompolola ejwi pati wati, Utalibisyi, mpotuli toonse, 29Nkabela wakaita mimuni, wasotokela mukati ulazyangama, wawida kumatende aaba-Paulo a-Sila, 30wabagwisya wati, Nobami ino ndicirenzi kuti ndifutulwe? 31Bakati, Syoma ku-Mwami Jesu, noti futulwe yebo abeŋanda yako. 32Mpoonya bakamwaambila makani aa-Mwami, antoomwe abamuŋanda yakwe boonse. 33Nkabela wabatola nciconya ciindi eco camasiku, wabasanzya mabunda aabo. Ndilyonya wabapatizigwa antoomwe abana bakwe boonse. 34Wakabanjizya muŋanda yakwe akubapa cakulya, kaboteledwe kapati, abeŋanda yakwe boonse, mbobasyoma Leza.
35Nobwakaca babetesi bakatuma bamapolisa bati, Amubaleke abo bantu, 36Nkabela uulindila ntolongo wakaambila Paulo majwi aya wati, Babetesi batuma kuti mulekwe, eno amuzwe, mwiinke muluumuno, 37Kwalo Paulo wakati kulimbabo, Bakatuumina antangalala, katutakwe mulandu pe, swebo toba-Roma, batuniizya muntolongo. Eno bayanda kutugwisizya kumbali na? Ha! pe, ababoole beni, batugwisye. 38Bamapolisa bakatola majwi aya kubabetesi, balo bakayoowa nobakamvwa kuti mba-Roma, 39baboola bakakombelezya. Nobakabagwisya, bakabakumbila kuti bazwe mumunzi. 40Bakazwa muntolongo, bainka kuŋanda ya-Ludiya. Nobakabonana ababunyina, bakabayumya, bainka.
Currently Selected:
Incito 16: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.