Incito 15
15
Inkani yakupalula bamasi
1Elyo kwakasika bamwi abazwa ku-Judaya, bali kwiisya babunyina bati, Kuti mwatapalulwa mbuli ciyanza ca-Musa, tamukonzyi kufutulwa. 2Nkabela ba-Paulo a-Barnaba nobakakazyanisya akubuzyanya abo, kwakaambwa kuti Paulo a-Barnaba abamwi babo bainke ku-Jerusalemu kubaapostolo akubapati, bakabuzye makani ayo. 3Aboobo balo bakasindikilwa mbungano, bakainda mu-Foinike amu-Samariya, bali kuya bwaamba kusanduka kwabamasi, babotezesya babunyina boonse. 4Nobakaakusika ku-Jerusalemu, bakatambulwa mbungano abaapostolo abapati, babalungulwida zyoonse Leza nzyaakabacitila, 5Kwalo kwakanyamuka bamwi benkamu yaba-Farisi, basyomi, bati, Kuleelede kubapalula akubalailila kuti bajate mulao wa-Musa.
6Nkabela bakabungana baapostolo abapati kuti baambaule makani aya. 7Nobakali kubuzyanisisya, Petro wakanyamuka, wabaambila kuti:
Nobaalumi bakwesu, mulizi kuti kalekale Leza wakandisala kulindinywe, kuti amulomo wangu bamasi bakamvwe Makani Mabotu, bakasyome. 8Eno Leza, uuzi myoyo, wakabasinizisya, wabapa Muuya Uusalala mbubonya mbwaakatupa aswebo, 9taakwe naakatwaandaanya swebo abalo pe, wakasalazya myoyo yabo alusyomo. 10Aboobo mumusunkilanzi Leza kuti mubike jokwe ansingo zyabasikwiiya, ndobatakali kukonzya kuyumuna bamatateesu notuba ndiswe. 11Pele tusyoma kuti tulafutulwa aluzyalo lwa-Mwami Jesu, mbubonya mbuli mbabo.
12Eno bantu boonse bakaumuna, baswiilila Barnaba a-Paulo, balalungulula zitondezyo amalele ngaakabacitya Leza kulibamasi. 13Nobakaleka kwaamba, Jakobo wakavuwa kuti,
Nobaalumi bakwesu, amundiswiilile, 14Simoni wakaamba mbwaakatalika Leza kuyeeya bamasi, kuti asale kulimbabo bantu kuzina lyakwe. 15Aleelyo ijwi lileelene amajwi aabasinsimi, mbubonya mbokulembedwe kuti,
16Munsi lyazintu ezi ndilaboola,
Ndizooyakulula ŋanda ya-Davida iiwide,
Ndizooyakulula kumwaika kwayo,
Akwiimikizya:
17Kuti bantu abasyeede bayandaule Jehova,
Abamasi boonse abaitwa ezina lyangu.
18Mbwaamba Jehova uucita zintu ezi
Izizibwa kuzwa kumalengelo aanyika.
19Nkaako ndateeti mebo, Tutabakataazyi abazwa masi, abasandukila kuliLeza, 20Pele atubalembele kuti balikasye zisofweede zyamizimo, amamambi, akulizisinwa, akubulowa. 21Nkaambo Musa, kuzwa kalekale, muminzi yoonse, ulijisi abo abamukambauka, muma-Sabata oonse ulabalwa muzikombelo zyaba-Juda.
22Eno kwakababotela baapostolo abapati, antoomwe embungano yoonse, kuti batumine ku-Antiokeya bantu abakasalwa kulimbabo, antoomwe abaPaulo a-Barnaba. Mbaaba: Juda uutegwa Barsaba, a-Sila, baalumi bapati kulibabunyina. 23Nkabela bakalemba lugwalo kumaanza aabo kuti, Tobaapostolo ababunyina bapati tulamwaanzya nobabunyina bamasi bakuAntiokeya, aku-Suriya, aku-Kilikiya. 24Mbotwakamvwa kuti bamwi abakazwa kulindiswe bakamukataazya amakani, bazungaanya myoyo yanu, kwalo takukwe notwabalailila, 25mbotwaba amoyo omwe kwatubotela kuti tumutumine baalumi abakasalwa, antoomwe abayandwa besu ba-Barnaba a-Paulo, 26bantu abakapeda buumi bwabo nkaambo kezina lya-Mwami wesu Jesu Kristo. 27Nkaako twatuma ba-Juda a-Sila, balo balamwaambila nzizyonya zintu ezi amulomo. 28Nkaambo kwakabotela Muuya Uusalala, aswebo, kuti tutamubikili mukuli mulemu uuinda ezi izyeelede, 29zyakuti mulikasye kulya izipailwa mizimo akubulowa, akulizisinwa, akumamambi. Kuti mwalikasya kulizeezyo mulacita kabotu. Kamupona.
30Eno abo batume nobakalazigwa, bakaselemuka kuya ku-Antiokeya, babunganya bantu, babapa lugwalo, 31Nobakalubala, bakabotelwa kukulaililwa oko. 32Nkabela ba-Juda a-Sila, mbobali bakambausi abalo, bakalaya babunyina majwi manjimanji, babayumya. 33Nobakakala oko kaindi, babunyina bakabaleka muluumuno, kuti babweede kulibaabo abakabatumide. 34Kwalo kwakabotela Sila kuti asyaale oko. 35Awalo Paulo a-Barnaba bakacili kukala ku-Antiokeya, balaiisya akukambauka makani aa-Mwami, antoomwe abamwi banjibanji.
Paulo a-Barnaba mbobakaandaana
36Nocakaba ciindi Paulo wakati kuli-Barnaba, Atubweede eno, tukalingule babunyina bamuninzi yoonse motwakali kukambauka makani aa-Leza, tubone mbobeenda. 37Eno Barnaba wakali kuyanda kutolelela a-Johane uutegwa Marko, 38kwalo Paulo wali kuyeeya kuti takweelede kutolelela ayooyo uwakabasia ku-Pamfuliya akutainka abo kumulimo. 39Aboobo kwakaba kukazyanya kupati mane bakaandaana. Barnaba wakatola Marko, wainka ku-Kupro abwaato, 40kwalo Paulo wakasala Sila, wainka, babunyina bamubika kuluzyalo lwa-Mwami. 41Wakaandulula mu-Suriya akuKilikiya, uya buyumya mbungano ezyo.
Currently Selected:
Incito 15: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.