MATHI 5
5
Shongha Songlenbü
1Mütshang hapan hao shongh to angkei. Hao setkei, hoba haoeibü eikshuong hao jungto loukei. 2Haoei haoen to hai lauko lenla khangkei:
3“Soushoua mühbü shuong
olinbou,
aishanga Khuthük Sangle haoeneibü.
4Manghaapbü shuong olinbou,
aishanga haoen haksotilabü.
5 #
NC 37.11 Eaaoabü shuong olinbou,
aishanga haoenei kaodak pailetlabü.
6Saopobü shanga mühei haibü
hoba deilabü shuong olinbou,
aishanga haoen senyühshemlabü.
7üei sanou lenbü shuong
olinbou,
aishanga haoenei onou haplabü.
8Maangpon hinseibü shuong
olinbou,
aishanga haoenei Mühghaü haplabü.
9Sangmai kümbü shuong
olinbou,
aishanga haoen to Mühghaü shousi shuong dogo laulabü.
10Saopobü shanga aoyou
shieinangeia haoen
olinbou,
aishanga Khuthük Sangle haoeneibü.
11“Ladang mütshuongei kü nyena kan nyikuko hakda, hoba amlangbü aukabü danko amaibü pendou jungeiko shieinangeilaje kheijinei kan olinbou. 12Kho tegü ong haoenei kan thedang kabü thuseibü shuongkei shieinangeikei. Olinashi, aishanga khuthüka kaneibü jongsak yaangbü ki.
Jem hoba Ngesakbü
(Mk 9.50; Lk 14.34-35)
13“Kan kaodakeibü jem. Jem ka teibü kho maualonga kho aiei teingaitila? Kho touje ailakei leshang aki; ho hakan apda hoba mütei kho nakeila leda. 14#Tet 4.18 Kan kaodak ngesakbü. Shongha kibü sangnyu che huletla athük. 15Aoeikei wanthung sapan kamei küplepan aphoda, lausikei wanthung denshanga phoda, hoba khoei chembabü shuong pendou la ngesakbü kuda. 16Kho tegütham, haoenei kaneibü kümsilei maibü hapan khuthüka kibü Bou la soneikangbü kutilabü lele kaneibü ngesakbü kho mütshuong thedanga hautijan.
Ngühkhüm shangabü Lenbü
17“Ngo Ngühkhüm ayingsi thuseibü shuong mautila shanga loukei dogo tedam; ngo haoen mautila shanga aying lausikei khübü pentisoutila loukei. 18Ngühmaia ngei kan to lenda, khuthük si kaodak adan shongko hoba ho pendou aloushad shongko Ngühkhüm haka dolang hanboutham ayingsi pheiche ongkei ühaüthükoje adanlabü. 19Ao- youei habü Ngühkhüm ka hanboutham ongkei lulimlaje ayingsi mülakei leilutilaje, haoen to Khuthük sanglea hanboutham dogo laulabü, lausikei aoyouei khübü jungeida hoba lubü lakei jungeitida haoen to Khuthük sanglea yaangbou dogo laulabü; 20aishanga ngei kan to lenda, kaneibü saopobüei Ngühkhüm lenbou shuong hoba Farisi shuongeibü mailem alimlang longa kanei khuthük sangle to üetenlabü.
Khauangbü shanga Lenbü
21 #
Leiy 20.13 “Danbü jihsiphaia mütshuong to ‘Nyi müt tühaiti’ dogo laubü kanei dida; aoyouei haitilaje haoen kho matjema kilabü. 22Ngei kan to lenda, aoei haoeibü jaisina to khauanglaje hao matjema yolabü; aoei haoeibü jaisina to ‘Shosiek’ dogo khüklaje hao Sanhedrin thedanga matjema kilabü; aoyouei ‘Ngoubüloubü’ dogo khüklaje haoenei molowan hapshaulabü. 23Hibü tetlabüei no lemshona jongsak che lemla kümbo kia, hoba nyi kajai kanaei kakhu limbo denche shedtiakei dogo damenalongaje, 24kaibü jongsak kho lemshon khünei khei phoyoshi, shaangla hauan kaibü jaisina to jiyophaiyoshi, hoba kho phaia ong louan kaibü jongsak kho lemashi.
25“Haoei no matjembü la kuan ap, hoba matjembüei thüngdang lombü la ku, hoba lombou khoei thüngdanga khinan apsi amaibüla, kaibü matbubou to kasi lamoua chela paiko kijinei jenabou lamenashi. 26Ngühmaia ngei kan to lenda, kanei poisa che kho ashem shongko khüka asatenlabü.
Asangalanbü shangabü Lenbü
27“Kanei ho laubükei dida, ‘Nyi asangalanbü ajungeilabü.’ 28Lausikei ngei kan to lenda aoei yaksa che to dühko chühda haoei maangpona je sao to asangalanbü shona. 29Kaibü mae nyekei ka la shabü shontialongaje, kho sungenashi hoba tekan apashi, aishanga mang pemtolo molowan to haukhoulabü khantoje kaibü küksihuo ka cheei aonbü kho khaibou. 30Hobaje kaibü mae ikei no shabü shontialonga, kho danan apashi, aishanga kaibü mang pemtolo molowan to haukhoulabü kantoje kaibü küksihuo cheei aonbü kho ka shanga khaibou.
Laolam Yaknga Bangbü shangabü Lenbü
(Mt 19.9; Mk 10.11-12; Lk 16.18)
31“Hokei laukei, ‘Aoyouei jembü yak bangtilaje sao la bangbü ngühchung le kujan.’ 32Lausikei ngei kan to lenda, alanbüa ayinglongaje aoei haoyak sattida haoei sao la shabü shontida, hoba aoei sattibü yaksa kho ngada hao lakei shabü shontida.
Thebülanbü shangabü Lenbü
33 #
Lev 19.12 “Tokei kanei danbü jihsiphaia mütshuong to ho lenko dida, ‘Nyi kaibü thebülanbü aleilulabü, lausikei nyi kaibü thebülanbü kho Bunyubou thedanga loushedtijan.’ 34Lausikei ngeije kan to lenda, ho Mühghaüeibü Choba setshangbü dogo khuthük phongko, 35ayingsi ho haoeibü younakshangbü dogo kaodak nyen phongko, ayingsi ho Choba Yaangboueibü sangnyubü dogo Jerusalem phongko yingsi dogokei aikei athealanlabü; 36ayingsi nyi khulou che ongkei thupaitila ayingsi nakhütila athükkeibü dogo kaibü khu phongko yingsikei aikei athe- alanlabü. 37Kaibü ngüh kho ‘Haü’ longa ‘Haü’ hoba ‘Ji’ longa ‘Ji’ dogo yingshi. Kho to liman lubü khoje Amaibou ka longbü ngüh ki.
Phoklambü shangabü Lenbü
(Lk 6.29-30)
38 #
Lev 24.19-20 “Kanei ho laubükei dida, ‘Nyek jeila nyek, hoba hauh jeila hauh.’ 39Ngei kan to lenda, amaibou to teshekei lausikei atei kaibü mae om to ipa longa hao la ji aedangkei thokuashi. 40Müt cheei ka to liko matjemshang to haumang sühsije hoba kaibü mangkabü neisimeikei lemang sühalongaje hao la tangkabou mangshokei yoan kuashi. 41Müt cheei no sekphai che hautimang sühalonga hao yoa sekphai nyi paiashi. 42Ka ka hibou la kuashi, hoba ka ka lotmang sühbou ka the tesepei.
Dangbou to Sanoubü
(Lk 6.27-28,32-36)
43“Kanei ho laubükei dida, ‘Nyi kaibü lepbou to sanouashi hoba dangbou to mangsenashi.’ 44Lausikei ngei kan to lenda kaibü dangbou shuong to sanouashi hoba no shieikoebü shuong shanga welaukuashi. 45Khei yingsije kan kho khuthüka kibü kaneibü boueibü shousi shuong yinglabü, aishanga haoei amaibülakei maibülakei chanyu longtikuda hoba saopobü hoba asaopobü lakei lang yantikuda. 46Aishanga nyi ka to sanoubü dan to ong sanoua longa, kaneibü jongsak ai ki? Khüm hebü shuongeikei khei kümda ji si? 47Hobaje nyi kaibü jaisinasi shuong to ong maang shika longaje, nyi lubü ai aei jungeida? Küksithang shuongeikei kho jeteibü jungeida ji si? 48Hibü kaneibü khuthükkabou Bou lai penan souan ki, kho tegü kankei penan souan kishi.”
Currently Selected:
MATHI 5: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.