MATHI 4
4
Jisu Takteibü
(Mk 1.12-13; Lk 4.1-13)
1Kheijinei Jisu Satanei takteila shanga Soushouei yamlamang to leilangkei. 2#Leiy 34.28 Saonyi nyet hoba saonyi you ashau ayungko paian phaia hao mühei nyengkei, 3hoba takteibou louan hao to laukei, “No Mühghaü Shou yinga longa habü laang ho wentek la yeishi dogo lenshi.” 4#NA 8.3 Lausikei haoei jongaikei, “Ho doakei, ‘Mütei wentekei ong aying, lausikei Mühghaüeibü sembung ka longbü ngühpem wekoei lang kilabü.’ ” 5Kheijinei Satanei hao Saopobü Sangnyu to leilangkei, haoei hao Lembüchem khusunga settikei 6hoba hao to laukei, “No Mühghaü Shou yingsije no lolo atetashi; aishanga ho doakei:
‘Haoei haoeibü hangangbü
shuong la
ka shanga ngühkhüm kulabü,
hoba no laang chenei ongkei youa kühsi shanga
haoenei no haoeneibü ikmanga tonlabü.’ ”
7 #
NA 6.16 Jisuei hao to laukei, “Hokei doakei, ‘Nyi kaibü Bunyubou Mühghaü atakteilabü.’”
8Tokei Satanei hao shongh suokbü to leijung angkei, hoba kaodak sangle hoba khübü soneikangbü pendou hao la shean lenkei; 9hoba haoei hao to laukei, “Nyi kü to khüpetan lema longaje habü pendou ngei ka la kulabü.” 10#NA 6.13-14 Kheijinei Jisuei hao to laukei, “Satashi, Satan! aiei ho doakei, ‘Nyi Bunyubou kaibü Mühghaü to lemlabü, hoba hao ong khangenlabü.’” 11Kheijinei Satanei hao apyokei, hoba khuthük hangangbü shuong louan hao to thuikei.
Jisu Galila Haoeibü Kümsilei Khangbü
(Mk 1.14-15; Lk 4.14-15)
12Ladang Bunyubouei Johan lapakei dogo ditkei hao Galil to ngaikei. 13Hao Nazaret apyoan loukei hoba Zebulun si Naftali kaonyek, Kapernaum yungkoa kikei. 14#Isa 9.1 Kho Isaia thuseibü danko laubü ngüh ho loushedla yingan kiteikei,
15 #
Isa 9.1 “Zebulun kaodak hoba
Naftali kaodak,
yungnyu aenei lamkhonga,
Jordan deikoa phangshuongeibü Galil!
16 #
Isa 9.2 “Nakthüha setan kibü
mütshuongei ngesakbü
yaang hapa,
hoba haibü kaodak hoba yemekoubü phanga
setan kibü shuong thükto ngesak kho longa.”
17Kho jih ka jaüan Jisuei songlenkei hoba laukei, “Maangpon sepeiashi, aishanga Khuthük Sangle nyangko loua.”
Jisuei Ngau Lapbü Müt Lei Ngabü
(Mk 1.16-20; Lk 5.1-11)
18Hao Galil yungkoa paiko kijinei haoei jaisinanyi, Peter nyenbou Simon hoba haona Andria sia tak tekko hapbei; aishanga haoen ngau lapbü shuong kiteikei. 19Haoei haosi to laukei, “Kaiya, kü phai semshi, hoba ngei kasi müt lapbü la yeitilabü.”
20Kheijinei haosiei haoeneibü tak apyokei hoba hao phai sembei.
21Ladang hao khüka satkei haoei Zededieibü shou jaisinanyi, Jakob si haona Johan, long chenei haosieibü bou Zebedi yoa lamleko hapbei; hoba haoei haosi ngakei. 22Kheijinei haosiei long hoba haosieibü bou apyokei hoba hao phai sembei.
Jisuei Songlenbü hoba Maitibü
(Lk 6.17-19)
23Hao Galil danko, haoeneibü sinagoga lenko Mühghaü Sangle Ngühlang Maibü phinthonko, hoba mütshuong yoa shatsinyat hoba mousisou pendou maitiko haukei. 24Haoeibü ngühlang Siria pendoua nyakkei, hoba haoenei hao jungto shatsinyat phang phangei shatbü hoba khonkua kibü, shabü souei lapbü, auleshat hoba pheihaibü pendou sungbakei hoba haoei haoen maitikukei. 25Galil, Dekapoli, Jerusalem, Jihuda hoba Jordan ji aeka mütshang yaangbangei hao phai sembei.
Currently Selected:
MATHI 4: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.