MATHI 14
14
Johan Baptibou Haibü
(Mk 6.14-29; Lk 9.7-9)
1Kheijinei Herod Tetrarkei Jisu shangabü ngühlang ditkei, 2hoba hao khangenbü shuong to laukei, “Ho Johan Baptibou, hao haibü ka langngai- akei; khoei habü kümsilei haoei kümda.” 3Aiei lausi Herodei haona Filip yak Herodia laüa Johan lapan kühan thüngdanga phokei; 4aishanga Johanei hao to laukei, “Nyi sao lejan aying.” 5Hobaje haoei hao haitimang sühkei, lausikei hao noknyüh to hatkei, aishanga haoenei Johan thuseibü che dogo dambei. 6Lausikei Herod bukbü chalou pennyet, Herodia nouyangshouei yen thedanga tombei, hoba Herod olintikei; 7hibü saoei ai ong hilaje kho sao la kukho dogo haoei theletlanletko thekukei. 8Hobaje saoeibü nyuei thungbü jangbü danko saoei laukei, “Kü la Johan Baptiboueibü khu phau chenei labü.” 9Hobaje Choba kho maang ngangkei; lausikei jembü theletlanletbü hoba hao yoa shaushang yungshanga setbü shuong laüa haoei kho kula sakkukei. 10Hobaje haoei hautiko thüngdanga Johaneibü khu thetkei. 11Hobaje haoeibü khu kho phau chenei sungbaan medeinyu la kukei, hoba saoei kho haonyu jungto sungbakei. 12Hobaje hao eikshuong louan haibü mang kho lenglangan khünkei; hoba haoenei hauan kho Jisu la lenkei.
Jisuei Müt Hajar Ngao Oknyinbü
(Mk 6.30-44; Lk 9.10-17; Jn 6.1-14)
13Ladang Jisuei kho ditkei, hao mütpem khüka long chenei sangliphang to kukkei. Hobaje kho noknyühei ditjinei, sangnyu ka youei hao phai sembei. 14Hobaje hao longjinei mütshang yaangbü che hapbei, hoba haoei haoen shanga sanouko daman haoen shatbü nyatbü shuong maitikei. 15Hobaje ladang chasem sühkei, eikshuong hao jungto louan laukei, “Ho sangliphang, hoba chanyu nepan apa. Sang shuong to hauan haoenei shausiyung jeklabü lele noknyüh lintiashi.” 16Jisuei haoen to laukei, “Haoen haula akhamda, kanei haoen la denche okashi.” 17Hobaje haoenei hao to laukei, “Künei hanei wentek ngao hoba ngau nyi ong ki.” 18Hobaje haoei laukei, “Khübü kho kü jungto sungba.” 19Hobaje noknyüh kho sanglaak thüka setla sakkukei. Kheijinei haoei wentek ngao hoba ngau nyi kho jungkei, hoba haoei khuthük ae chühangtikei hoba haükukei; hoba ladang haoei wentek kho shaknyinkei, haoei eikshuong la kukei. 20Hobaje haoenei senyühshembo shaukei; hoba jouletbü netshouei kam anthüknyi shenko haoenei heshaikei. 21Hobaje shaubü yungbü shuong yaksa hoba nashousi shuong aweko bousu hajar ngao kiteikei.
Jisu Deitaka Paibü
(Mk 6.45-52; Jn 6.15-21)
22Jisuei noknyüh lintijinei, haoei hao eikshuong long che to atan hao thedang to thi deiphei to hautikei. 23haoei haoen sattikei hoba hao mütpem shongh to welaula angkei. Ladang chasem sühkei khünei hao mütpem kiteikei.
24Tou long kho dei ka lounyu hean kiteikei, hoba kho deishouei aeibou khokeitiko kikei, aishanga yeiei thedang aeka soungaikei. 25Ngeyang sem ka lak jih kanglanga hao haoen jungto deitaka paijung haukei. 26Ladang eikshuongei hao deitaka paiko hapbei, haoen mokde apyokei hoba lau kei, “Ho sou yingkei”; hoba haoen hatbü ka ngekyokei. 27Kheijinei Jisuei haoen to laukei, “Maang kaangashi! ngo yingkei, tehüt.” 28Peterei hao to jongaikei, “Bunyubou, no yingsije ngo ka jungto deitaka loula sakkushi.” 29Haoei laukei, “Kaiya.” Peter long ka lotkei hoba deitaka paiko Jisu jungto likei. 30Lausikei ladang haoei yei kaangbü kho hapbei hao hatkei, hoba hao deimang to shemetlangla khangjinei haoei ngekkei, “Bunyubou, ngo püetashi.” 31Kheijinei Jisuei hao ik shingan hao to hatkei hoba hao to laukei, “Ka mailem latetche hankei! Aila maanga shuda?” 32Ladang haoen long to atkei yei thakkei. 33Longa kibü shuongei hao junga khüpetko laukei, “Maimaitham no Mühghaü Shou.”
Genesareta Jisuei Shat Maitikubü
(Mk 6.53-56)
34Ladang haoenei dei khatkei haoen Genesareta sühlangkei. 35Khükabü mütshuongei shenkei hoba haoenei hao kaophei pendou to hautikei, hoba haoenei hao jungto shatbü pendou leibakei. 36Hobaje haoen la haoeibü neiyika ongkei meititikai dogo haoenei hao to sukeijakei. Hobaje meitibü shuong pendou maikei.
Currently Selected:
MATHI 14: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.