MATHI 11
11
Johan Baptikubou ka Ngühlang Künbü shuong
(Lk 7.17-35)
1Ladang Jisuei jembü eik Anthüknyi to sakkuko lenbü thonkei, kheijinei haoen sangnyu shuonga lenla hoba songlenla shanga haoei khüka banglangkei.
2Johanei thüngdanga kijinei Khrista shangabü kümsilei shuong ditkei. Hibü haoei hao eikshuong hautiko lentikei, 3“Loula kibou kho no sai, si künei lubü che shanga chüheila?” 4Jisuei haoen to jongaikei, “Kan ngaiashi hoba kanei ai ditda hoba hapda Johan la lenashi: 5nyekthubü shuongei hapda, sokebü shuong paida, imbü shuong saüenda, hoba obangbüei ditda, hoba haibü shuong langngaitida, hoba shalebü la Ngühlangmaibü songlenda; 6hoba aoei kü to phaiyetshang ai ühüplaje hao haübou.”
7Khübü mütshuong ngaitoua Jisuei noknyüh to Johan shangabü lenla khangkei, “Ai to chühla kan yam to koukei? Yeiei thakdu soueibü chühla si? 8Lausikei kan aito chühla haukei? Inyaibü neisimei lebü müt che to chühla sai? Aoyouei inyaibü neisimei leda haoen Choba chema ki. 9Lausikei kan ai chühla haukei? Thuseibü che sai? Haü, ngei kan to lenda, thuseibü che to khaibou. 10#Mal 3.1 Laishibaei lenbü ho hao shangabü ki: ‘Chühashi, ngeibü ngühlang künbou, aoei ka thedanga ka lamnyu lamlelabü, hao ka thedangto ngei hautida.’ 11Ngühmaia ngei kan la lenda, yaksaei bukbü yoa Johan to yaangbou aki; lausikei Mühghaü Sanglea hanbou kho hao to yaangbou ki. 12Hobaje Johan Baptibou chalou ka tou sühko Khuthük Sangle soyoda, hoba sekbülakbü shuongei soletda. 13Aishanga Thuseibü shuong pendou hoba Ngühkhümei Johana sühko tetenkei; 14hoba kanei sungletla maangangko kisije, Johan ho loula kibou Elija ki. 15Ao nou yembei haoei ditashi.
16“Lausikei ai to ngei ho meten mütshuong takteila? Hoaen namyakshanga atei lubü shuong ngako 17hoba ‘Künei chia teibü lauko kan la pithung metkukei, hoba kanei atom! Künei manghaap chia laukei hoba kanei haapbo khuku to ajang!’ dogo lauko setbü nashousi shuong phatkei. 18Aishanga Johanei ashauko hoba ayungko loukei, hoba mütshuongei, ‘Hao to shabü soushou kia’ dogo lauda. 19Müteibü Shou shaukoyungko loukei, hoba haoenei ‘Chühashi, shaumüt yungmüt, ih yungbou, khüm hebü shuong si shabü shuongeibü thangbou’, dogo lauda. Lausikei songsihon kho saoeibü kümsilei loushedbüei aukabü kuenda.”
Maialembü Sangnyu shuong
(Lk 10.13-16)
20Kheijinei laobou sangnyu shuonga haoeibü kümsilei yaangbü juongbou kümbei, khübüei maangpon asepei, haoei haoen hakeiko laukei, 21“Khorazin, ka shanga ügütü! Bethsaida, ka shanga ügütü! Aishanga ka to kümbü seikümseilei shuong ho Sidon si Tair to kümbei laubü tegüje, haoen mütshuongei neikek sean haapbo khuto tap mokan jinko maangpon sepeian kikhoulabü. 22Lausikei ngei kan to lenda, matjemnyet kan toje Tair si Sidon to natenla soshangbou yinglabü. 23Hobaje no, Kapernaum, no khuthüka sühko tonenlep lo? No molowan sühko sungyanlabü. Aishanga laobou kümsilei yaang ka to kümbei ho Sodom to kümbei laubü tegüje, kho tat sühko kikhoulabü. 24Lausikei ngei kan to lenda, matjemnyet katoje, Sodom kaodak thu natenla sobou yinglabü.”
Kü Jungto Kaiya hoba Haksoashi
(Lk 10.21-22)
25Kheijinei Jisuei laukei, “Abou, khuthük hoba kaodak Bunyubou, ngei ka nyen sangda, aieilausi nyi habü ho songbüdobü hoba hapbüngebü thedang ka huan phokei, hoba nyi nasak shuong thedanga tang khittikei. 26Haü, Abou, ngei ka nyen sangda, aieilausi kho ka maanghaibü kiteikei.
27“Kübouei kü la pendou nongkua: hoba Bou to liman Shou aoeikei angekei; ayingsi Shou hoba aoyou to Shouei hao tang khitkula maangangda haoen to liman, Bou aoeikei angekei. 28Kan hübümangbü hoba onat künbü shuong pendou kü jungto kaiya, hoba ngei kan la hakso kukho. 29Kanei kü bulenga peashi, hoba kü ka ditletashi, aishanga ngo eaaoabü hoba sensimaang inyaishoule, hoba kanei kaneibü soushou shanga hakso haplabü; 30aishanga kü buleng sosotham, hoba kü on songoktham.”
Currently Selected:
MATHI 11: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.