MATHI 10
10
Eik Anthüknyi
(Mk 3.13-19; Lk 6.12-16)
1Hobaje haoei eik Anthüknyi hao jungto ngakei, hoba hauan shian sattila shanga shabü sou shuong thüka sei hoba shatsinyat phang pendou hoba shatbü phang pendou maitikulabü sei haoen la kukei. 2Tou hangangbü Anthüknyieibü nyen kho habü ho ki: shaangbou kho Peter dogo laubou Simon, hoba haona Andria, Zebedi shou Jakob, hoba haona Johan; 3Filip hoba Bartholoma; Thoma hoba khüm hebou Mathi; Alfia shou Jakob, hoba Thadia; 4Kananbü Simon, hoba Judas Iskhariot, aoei hao khümbo kukei.
Anthüknyieibü Songlen
(Mk 6.7-13; Lk 9.1-6)
5Khübü Anthüknyi Jisuei hautikei, hoba haoen la sakkuko laukei, “Küksithang lam aitokei tohau, hoba Samariabü sangnyu aitokei tüt; 6lausikei Israel phang maubü sanshuong jungto hauashi. 7Hobaje kan haujinei, ‘Mühghaü Sangle nyangko lousüha’ dogo phinthonashi. 8Shatbü maitiashi, haibü shuong langngaitiashi, imbü saüenkuashi, shabü sou shuong shian sattiashi; kanei amlang hapbei, amlang kuashi.
9“Kaneibü shijimoka hon ayingsi chandinam, ayingsi poisa tekün; 10kaneibü wakou shanga nyingkou ayingsi mangsho nyi, ayingsi nguok, ayingsi ju tekün; aieilausi kümbouei shausiyung hapla mubü. 11Hobaje ai sangnyu ayingsi sangto ong kan atlaje, kan sühtimang sühbü kilaoje pheashi; hoba kan asatshongko khünei thüngashi. 12#NC 122.7-8 Hobaje kan khüto atjinei ‘Salem’ dogo laushi; 13hoba chema kibü shuongei kan sungleta longa kaneibü hakso haoen thükto loutiashi; lausikei haoenei asunglet longa, kaneibü hakso kan jungto sepeitiashi. 14Hobaje aoyouei ong kan asungletlaje, ayingsi kaneibü ngüh aditlaje, kanei kho chem ayingsi sangnyu ka longjinei kaneibü you ka thamngu kangan apashi. 15Ngühmaia ngei kan to lenda, matjembü chaloua kho sangnyu toje Sodom si Gomora thu to natenbou yinglabü.”
Loulabü Shieikoe
(Mk 13.9-13; Lk 21.12-17)
16“Chühashi, ngei kan sho shuong yoto sanshuong tegü hautida. Hibü kan pinyu tegü songsihon kishi hoba dukutuk tegü maanglan yingshi. 17Lausikei mütshuong shanga maangsangashi; aishanga haoenei kan matjemshang to khümbomeiko kulabü, hoba haoeneibü sinagoga haoenei kan to ngümlabü; 18hoba kan kü laüa governor hoba Choba shuong thedanga haoen hoba phangshuong to aukabü künla shanga leian haulabü. 19Lausikei ladang haoenei kan khümbomeiko kulaje, kanei lai laula ayingsi ai laula maang temau; aishanga kanei ai laula kho jihsiphaiatham kan la kulabü. 20Aishanga laubou kho kan ji, lausikei kaneibü Bou Soushouei kan danko lauda.
21“Hobaje jaisinaei jaisina, hoba bouei haoshou, haitila khümbo kulabü; hoba shousi shuongei nyusibou khulimbo meimeilabü, hoba haoen haitilabü. 22Hobaje kü nyen laüa müt pendouei kan mangsenlabü; lausikei aoei thon sühko natenlaje hao ong khümenlabü. 23Lausikei ladang haoenei kan sangnyu chenei shieikoelaje, nyiboubü to satashi, aishanga ngühmaia ngei kan to lenda, Müteibü Shou aloushongko, kanei Israel sangshuong apekhümbo kilabü.
24“Lenbou to eik thükkabou ji, ayingsi bunyu to sambü thükkabou ji. 25Eikei jembü lenbou tegü kia longa, hao shanga khoei soua, hoba sambüei jembü bunyu tegü kia longa hao shanga khoei soua. Mütshuongei jembü bou to Belzebub dogo lausije, hao chema kibü shuong to latetche yaangbou anyikula!
Aoto Hatjan
(Lk 12.2-7)
26“Hibü haoen to tehüt. Aishanga tang akhithlabü lele aikei küplepan aki, hoba angeenlabü lele aikei huan aki. 27Nakthüha ngei kan to lenda, kho kanei changea laushi; hoba kaneibü noukhüna ai hangsho lauda, kho chemdaka ngeklabü. 28Hobaje aoyouei mang haitida, lausikei soushou haitila athük, haoen to tehüt. Aeiko Mühghaü, aoei soushou si mang ham molowana mautila thükkei, hao to ong hatashi. 29Aunyingshishou nyi poisa che lu ayaakda lo? Khei yingasikei khübü che ongkei kaneibü Bouei angeko kaoa üatda. 30Kaneibü khua khulou mangkei pendou weenakei. 31Hibü tehüt; aunyingshishou juong tokei kan khaibou!
Khrista Theletbü hoba Inletbü
(Lk 12.8-9)
32“Hibü aoyouei ong müt thedanga ngo theletlaje, khuthüka kibü Kübou thedanga ngeikei hao theletlabü. 33Lausikei aoyouei müt thedanga ngo atheletlaje, khuthüka kibü Kübou thedanga ngeikei hao atheletlabü.
Sangmai ji, Lausikei In
34“Kaodaka sangmai longtila ngo loukei dogo tedam; sangmai aying lausikei in longtila ngo loukei. 35Aishanga müt cheei jembü bou khulimbo, hoba nouyangshouei jembü nyu khulimbo, hoba shoueibü yakei laoeibü nyu khulimbo meimeitila ngo loukei; 36hoba müt cheeibü dangbou shuong kho haoeibü jembü chem- pen shuong kilabü.
37“Aoei jembü bou ayingsi nyu kü to aei sanoulaje hao kü shanga mubü aying; hoba aoei jayangshou ayingsi nouyangshou kü to aei sanoulaje hao kü shanga mubü aying. 38Hobaje aoei jembü peisei pean küphai asemda, hao kü shanga mubü aying. 39Aoei jembü langkei hapda kho maulabü, hoba aoei kü shanga jembü langkei mauda kho hapmeilabü.
Pailetbü
(Mk 9.41)
40“Aoei kan sungletda haoei ngo sungletda, hoba aoei ngo sungletda haoei ngo hautibou sungletda. 41Aoei thuseibü che thuseibü nyena sungletda thuseibü pailetbü haplabü, hoba aoei saopobü müt che saopobü müt nyena sungletda saopobü müt pailetbü haplabü. 42Ngühmaia ngei kan to lenda, aoei habü hanbü shuong yoa che la ongkei eik nyena deisang thung che inlaje, hao pailletbüei akonglabü.”
Currently Selected:
MATHI 10: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.