Matei 4
4
Yesu koghesighwa
(Maliki 1:12-13; Luka 4:1-13)
1Kuya Yesu kalongotsighwa na Ghumuhe we Imulungu mbaka kunyika yaghetsighwe na Yehile. 2Tsakafunga ukuja ghamatsuwa alubaini chilo na misi, kuya tsakona nzala. 3Baho Setani kamghendela, kamlongela, “Ka ghweghwe kwa Imwana we Imulungu, ghalongele ghamabwe ghano ghawe pfighate.”
4Yesu kamwidika, “Yandikighwa mne Ghamaandiko Mahenzeluka. ‘Imunu ng'odaha bae kuwa mghima kwa chijo chiliyeka, ila kwa chila imbuli iyolonga Imulungu.’ ”
5Kuya Setani kamsola Yesu mbaka Yerusalemu, ghumji ghwenzeluke, kamwika mchiswili ghendo mwe Ing'anda ye Imulungu. 6Kuya kamlongela, “Ka ghweghwe kwa Imwana we Imulungu, wilaghatse hasi, kwaapfila yandikighwa,
‘Imulungu katsowalaghitsa wamalaika wake,
nawo watsokukinda kwa ghamoko ghawo,
uleke kwilagha mne ghamabwe.’ ”
7Yesu kamwidika, “Pfipfila yandikighwa, ‘Uleke kumghetsa Imtwatsa Imulungu wako.’ ”
8Kuya Setani kamsola keli mbaka mne chidando chitali ng'ani, kamlangusa undewa wose we isi na ukulu wose we isi. 9Kuya kamlongela, “Ung'enama hambele hangu na kunitamanila, nitsokwing'a ghano ghose.”
10Yesu kamlongela, “Ghenda Setani! Kwaapfila yandikighwa, ‘Umtamanile Imtwatsa Imulungu wako, umtumikile yeye yaliyeka!’ ” 11Kuya Setani kamleka Yesu, na wamalaika watsa wamtumikila.
Yesu kakwanza kuwapetela iwanu
(Maliki 1:14-15; Luka 4:14-15)
12Yesu hayahulike Yohane wamwika mchifungo, koka Galilaya. 13Kalawa Natsareti, kaghenda kukala Kaperinaumu, isi iili habehi ne tsimbu lya Galilaya, na iibakane ne isi ya Sabuloni na ya Nafutali. 14Achino chitendeka ili achila chayalongile nabii Isaya chitimile,
15“Isi ya Sabuloni na isi ya Nafutali,
inzila ya kughendela mna bahali,
kumwambu mwe Yoridani.
Galilaya, isi ye iwanu iwali si Wayahudi!
16“Iwanu iwokala mchisi
watsakona ghumwanga.
Awala iwokala mne isi ye chimbeho che lifwa
ghumwanga ghutsowamwemwesela.”
17Kulawa matsuwa agho Yesu kanza kuwapetela usenga wake, “Mleke kutenda nzambi, kwaapfila undewa wa kulanga wa habehi.”
Yesu kowakema iwanang'ina wa mwanduso
(Maliki 1:16-20; Luka 5:1-11)
18Yesu hayang'ali yoghenda mmbalimbali mwe tsimbu lya Galilaya, kawona iwandughu weli, Simoni iyakemighwe Petiri na ndughu yake Andereya. Tsawang'ali wolowa iwasomba kwa nyapfu mne tsimbu lya. 19Yesu kawalongela, “Mniwinze, nani nitsowatenda muwe iwalowa we iwanu.” 20Bahala watsileka nyapfu tsawo, wamuwinza.
21Haghendile hambele chidogho, kawona iwandughu wangi weli, Jakobu imwana we Sebedayo na ndughu yake Yohane. Tsawakala mne mnumbwi hamwe na aba wawo Sebedayo, wotenda nyapfu tsawo. Yesu kawakema, 22bahala waghuleka mnumbwi na aba wawo, wamuwinza.
Yesu kolangulitsa, kopeta na kowahonetsa iwanu
(Luka 6:17-19)
23Yesu tsakanga Galilaya yose, kalangulitsa mne tsing'anda tse ukulombela, kawapetela iwanu Imbuli Inoghile ye Undewa we Imulungu na kawahonetsa iwanu wane matamu ghose. 24Mbuli tsake tsenela mne isi yose ya Siriya, apfo iwanu wamghalila iwatamu wose, iwoghula utamu wowose, awala iwodununzika, wane pfinyamkela, iwakughwa chisala na awala iwaholole, naye kawahonetsa. 25Na iwanu wengi wamuwinza kulawa Galilaya, isi tsa Dekapoli, Yerusalemu, Yudeya ne isi ili kumwambu mwa ghumto Yoridani.
Currently Selected:
Matei 4: LBV
Highlight
Share
Copy
Want to have your highlights saved across all your devices? Sign up or sign in
© 2014 Pioneer Bible Translators and The Word for the World