Roˉma‸ li‸ 1
1
Awˬ chawˇ hui hta‸ dawˇ nawˇ ve hkawˇ
1Ngaˬ lehˬ Yeˍsuˆ Hkri‸ ve awˬ ceˬ Pawˇlu‸ yoˬ. Yawˇ ve tcuh yaˇ te tuˬ Gʼuiˬsha ngaˬ hta‸ kuˬ yuˬ laˇ peuˬ. Ha lehˬ ve bon hkawˇ kʼaoˍ maˍ piˇ tuˬ Gʼuiˬsha ngaˬ hta‸ fuiˍ teh taˍ peuˬ.
2Ha lehˬ ve bon hkawˇ chi lehˬ, Gʼuiˬsha pe‸ laˇ tuˬ yoˬ teh‸ aˬ sho-eˬ htaˇ ka‸ yawˇ kʼoˆ taˍ ve yoˬ. Yawˇ ve tcuh kaˍ paˍ teˇ hpaˍ hta‸ cuˇ leh Li‸ hpu hkʼaw lo bvuh‸ tcuh taˍ ve yoˬ. 3Ha lehˬ ve bon hkawˇ chi lehˬ, yawˇ ve Yaˇ hpu awˬ lawn hta‸ kʼoˆ ve yoˬ. Yaˇ hpu oˇ ve lehˬ, awˬ suhˍ awˬ shaˍ hpawˇ kʼo, Daˍviˆ ve awˬ ceuˬ awˬ hkʼaˇ hpeh‸ ve yoˬ. 4Yawˇ lehˬ ngaˬ ve Yaˇ hpu yoˬ teh‸, kanˇ paˆ awˬ hkʼaw lo Gʼuiˬsha hpeu‸ maˍ laˇ peuˬ. Awˬ lawn kʼo, da‸ ve kehˬ ve Awˬ ha hpu yawˇ hta‸ suh kuiˬ lo kʼaw‸ te‸ tu la piˇ ve hta‸ pa taw yoˬ. Yawˇ lehˬ ngaˬ hui ve Jawˇmawˇ Yeˍsuˆ Hkri‸ yoˬ. 5Yawˇ hta‸ pa taw, Gʼuiˬsha ve awˬ bon hta‸ ka‸, yawˇ ve tcuh yaˇ te tuˬ ve kanˉ hta‸ ka‸ ngaˬ hui gʼa taˍ peuˬ. Kanˉ chi ve lehˬ, chaw ceuˬ hkʼa peu-eˬ yonˍ leh na yuˬ tuˬ, yawˇ ve awˬ meh awˬ hawˉ lo ngaˬ hui te ve yoˬ. 6Nawˬ hui htawˇ Yeˍsuˆ Hkri‸ kuˬ yuˬ taˍ ve chaw hui hpeh‸ ve pa taw, chaw ceuˬ oˇ ve awˬ hkʼaw lo nawˬ hui lo‸-e taˍ ve yoˬ.
7Gʼuiˬsha ha‸ leh, Hkri‸ yaˇ hpeh‸ la tuˬ kuˬ yuˬ taˍ ve Roˉma‸ venˇ hkʼaw chehˇ ve nawˬ hui hkʼa peu-eˬ hta‸ ngaˬ li‸ bvuh‸ laˇ ve yoˬ.
Ngaˬ hui ve Awˬ pa Gʼuiˬsha leh Jawˇmawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ.
Pawˇlu‸ Roˉma‸ venˇ lo kʼai gaˇ ve
8Awˉ lawˉ teˇ ceuˬ lehˬ, miˬguiˬ teˇ kaˬ le le lo nawˬ hui yonˍ ve awˬ lawn bvuhˬ kʼai ve hta‸ pa taw, nawˬ hui hkʼa peu-eˬ awˬ pon ngaˬ Yeˍsuˆ Hkri‸ hta‸ cuˇ leh ngaˬ ve Gʼuiˬsha hta‸ chiˇ mvuh ve yoˬ. 9Nawˬ hui awˬ pon hkʼaˬ htaˆ ka‸ ngaˬ bon lawˬ chehˇ ve hta‸ ngaˬ ve Gʼuiˬsha shaˉ hkiˆ hkanˍ hpeh‸ ve yoˬ. Yawˇ awˬ pon ngaˬ ve nyi ma awˬ tawˬ hkʼa gaˬ kanˉ te leh, yawˇ ve Yaˇ hpu awˬ lawn ha lehˬ ve bon hkawˇ hta‸ kʼaoˍ maˍ chehˇ ve yoˬ. 10Ngaˬ bon lawˬ ve lehˬ, Gʼuiˬsha ve a loˍ hta‸ pa taw ya‸ kʼaw teˇ caˆ caˆ tawˆ la leh nawˬ hui geh ngaˬ gʼa gaˬ la tuˬ, hkʼaˬ htaˆ ka‸ ngaˬ lawˬ chehˇ ve yoˬ. 11Nawˬ hui hta‸ ngaˬ mawˬ gaˇ jaˇ ve yoˬ. Gʼa mawˬ da‸ ve kʼo, nawˬ hui nyi ma yeˬ la tuˬ, Awˬ ha hpu ve la‸ shawnˍ teˇ ceuˬ ceuˬ nawˬ hui hta‸ pehˬ laˇ gaˇ ve yoˬ. 12Ngaˬ chi hkʼe kʼoˆ ve lehˬ, ngaˬ yonˍ ve leh nawˬ hui yonˍ ve awˬ hkʼaw lo, teˇ gʼaˇ hta‸ teˇ gʼaˇ awˬ gʼaˇ piˇ da‸ tuˬ ve hta‸ kʼoˆ gaˇ ve yoˬ.
13Awˬ viˉ awˬ nyi teˇ hpaˍ-oˬ, awˬ kaˍ awˬ nu buiˇshaˆaˉnaˆ chaw hui geh ngaˬ awˬ shiˍ gʼa taˍ ve hkʼe, nawˬ hui geh htawˇ ngaˬ awˬ shiˍ teˇ ceuˬ ceuˬ hta‸ gʼa tuˬ ve, nawˬ hui geh laˬ tuˬ ngaˬ laiˉ pawˆ dawˇ cheˆ taˍ ve awˬ lawn nawˬ hui hta‸ shiˍ piˇ gaˇ ve yoˬ. Ya‸ hkʼaˇ, chi beu‸ hkʼa gaˬ tawˍ taˍ tuˬ cawˬ ve yoˬ. 14Heˍlaˍsaˆ chaw maˇ kʼoˆ, chaw hteunˍ maˇ kʼoˆ, cuˇ yiˍ cawˬ ve chaw maˇ kʼoˆ, cuˇ yiˍ maˇ cawˬ ve chaw maˇ kʼoˆ, chaw ceuˬ chi ma ve hta‸ ngaˬ shaiˍ piˇ tuˬ jeˬ cawˬ taˍ ve yoˬ. 15Hkʼe te leh, puiˉ ve hpeh‸ ve hkʼe nawˬ hui Roˉma‸ venˇ yaˇ hui hta‸ ka‸ ha lehˬ ve bon hkawˇ maˍ piˇ tuˬ ngaˬ gu taˍ peuˬ.
Ha lehˬ ve bon hkawˇ kanˇ paˆ cawˬ ve
16Ha lehˬ ve bon hkawˇ maˍ tuˬ ngaˬ maˇ ya‸ taw. Awˬ lawn kʼo, hkʼa yonˍ ve chaw teˇ gʼaˇ le le hta‸ htaiˍ hkʼaw‸ piˇ tuˬ ha lehˬ ve bon hkawˇ chi Gʼuiˬsha ve kanˇ paˆ hpeh‸ ve yoˬ. Awˉ lawˉ Yuˇda‸ chaw hui, hkʼaw‸ nawˉ Heˍlaˍsaˆ chaw hui hta‸ htaiˍ hkʼaw‸ piˇ ve yoˬ.#Heb 2:4 17Ha lehˬ ve bon hkawˇ oˇ ve awˬ hkʼaw lo, yonˍ ve awˬ hkʼoˆ kʼaw‸ yonˍ maˇ la tuˬ, Gʼuiˬsha ve hteˇ ve cawˇ ve awˬ ceuˬ hta‸ hpeu‸ maˍ laˇ ve yoˬ. Li‸ hpu hkʼaw bvuh‸ taˍ ve hkʼe, Hteˇ ve cawˇ ve chaw lehˬ yonˍ ve hta‸ pa taw co ha gʼa te‸ tuˬ yoˬ teh‸ kʼoˆ taˍ ve yoˬ.
Chaw yaˇ lehˬ venˇbaˆ yaˇ hpeh‸ ve
18Gʼuiˬsha hta‸ maˇ yonˍ leh maˇ hteˇ maˇ cawˇ ve hta‸ te ve chaw hui awˬ hkʼoˆ hta‸, Gʼuiˬsha nyi ma zuhˆ ve teˇ ceuˬ mvuhˇ naw ma hkʼoˆ lo tawˆ la ve hta‸ gʼa mawˬ ve yoˬ. Chaw oˇ ve teˇ hpaˍ lehˬ, maˇ hteˇ maˇ cawˇ ve hta‸ te leh, hteˇ ve cawˇ ve hta‸ tawˍ taˍ tsuhˇ taˍ ve yoˬ. 19Awˬ lawn kʼo, Gʼuiˬsha ve awˬ lawn teˇ hpaˍ hta‸ yawˇ hui shiˍ hpeh‸ ve hkʼe, hkʼa tawˍ lehˆ gʼa shiˍ gʼa mawˬ peuˬ. Gʼuiˬsha yawˇ hui hta‸ hkʼa tawˍ lehˆ hpeu‸ maˍ piˇ peuˬ ve hta‸ pa taw yoˬ. 20Hkʼaˬ hkʼe le teh‸ kʼoˆ kʼo, Gʼuiˬsha hpanˍ taˍ te taˍ ve awˬ ceuˬ teˇ hpaˍ hta‸ gʼa mawˬ ve hta‸ pa taw, Gʼuiˬsha awˬ lawn mehˆ mawˬ maˇ hpeh‸ ve teˇ hpaˍ hta‸ gʼa kʼaw‸ mawˬ ve yoˬ. Yawˇ te taˍ ve teˇ hpaˍ hta‸ pa taw, co co taiˍ taiˍ Gʼuiˬsha ve kanˇ paˆ hta‸ ka‸, yawˇ co co taiˍ taiˍ Gʼuiˬsha hpeh‸ ve hta‸ ka‸, yawˇ hui dawˇ shiˍ dawˇ mawˬ la ve yoˬ. Chi hta‸ pa taw, maˇ shiˍ teh‸ yawˇ hui kʼaw‸ kʼoˆ maˇ hpeh‸. 21Awˬ lawn kʼo, chaw oˇ ve teˇ hpaˍ lehˬ, Gʼuiˬsha hta‸ shiˍ ve ka‸, Gʼuiˬsha hta‸ chiˇ uiˍ chiˇ mvuh keunˍ ve hkʼe maˇ chiˇ uiˍ maˇ chiˇ mvuh. Yawˇ ve awˬ bon hta‸ htawˇ maˇ shiˍ maˇ nawˇ. Yawˇ hui ve dawˇ hkʼaˇ teˇ hpaˍ lehˬ, tcuhˉ kuiˬ te‸ chiˉ maˇ kʼaw‸ cawˬ. Yawˇ hui ve nyi ma hkʼaw maˇ dawˇ nyi puiˉ leh naˆ ho‸ lehˍ hpeh‸ sheˬ ve yoˬ. 22A shu yawˇ awˬ to hta‸, Ngaˬ cuˇ yiˍ cawˬ ve yoˬ teh‸ kʼoˆ ve htawˇ, yawˇ hui chaw kʼaˍ chaw buiˬ hpeh‸ la ve yoˬ. 23Maˇ luˬ maˇ suh puiˉ ve Gʼuiˬsha ve awˬ me‸ awˬ hponˇ hta‸ yawˇ hui maˇ ha‸ yuˬ. Ya‸ hkʼaˇ, luˬ puiˉ suh puiˉ ve chaw, ngaˆ, hkui sheh la‸ sheh awˍ lehˇ cawˬ ve to nuˇ to shaˆ, vuiˬ, chi teˇ hpaˍ ve shaˉ ho‸ hta‸ yawˇ hui ha‸ yuˬ ve yoˬ.
24Chi hta‸ pa taw, yawˇ hui ve nyi ma hkʼaw cha‸ cha‸ chiˆ chiˆ ve teˇ hpaˍ hta‸ te gaˇ ve hkʼa shuˍ shuˍ te tuˬ, Gʼuiˬsha yawˇ hui hta‸ hpehˇ piˇ ve yoˬ. Hkʼe te leh, yawˇ hui te gʼaˇ ve awˬ to hta‸ teˇ gʼaˇ awˬ haiˬ te da‸ ve yoˬ. 25Awˬ lawn kʼo, Gʼuiˬsha ve awˬ lawn hteˇ ve cawˇ ve teˇ hpaˍ hta‸ yawˇ hui maˇ ha‸ yuˬ. Ya‸ hkʼaˇ, maˇ hteˇ maˇ cawˇ ve awˬ ceuˬ hta‸ ha‸ yuˬ ve yoˬ. Te hpanˍ shehˍ hpaˇ hta‸ yawˇ hui baˬ taˍ leh, te hpanˍ taˍ ve teˇ hpaˍ hta‸ oˉ kʼoˍ pui leh, oˇ ve teˇ hpaˍ awˬ pon kanˉ te ve yoˬ. Te hpanˍ shehˍ hpaˇ hta‸ co co taiˍ taiˍ chiˇ mvuh cawˇ ve yoˬ. A menˬ.
26Chi hta‸ pa taw, yawˇ hui haiˬ ve hta‸ te gaˇ jaˇ ve nyi ma cawˬ ve hkʼe te tuˬ, Gʼuiˬsha yawˇ hui hta‸ hpehˇ piˇ ve yoˬ. Hkʼaˬ hkʼe le teh‸ kʼoˆ kʼo, yawˇ hui ve yaˇ miˇ teˇ hpaˍ lehˬ, te keunˍ ve awˬ liˇ hta‸ baˬ taˉ leh, te maˇ keunˍ ve awˬ liˇ hta‸ te ve yoˬ. 27Hawˉ hkʼaˆ teˇ hpaˍ htawˇ, oˇ ve hkʼa shuˍ shuˍ te ve yoˬ. Yaˇ miˇ teˇ hpaˍ geh yawˇ hui maˇ kʼaw‸ zuh‸. Hawˉ hkʼaˆ chawˇ hawˉ hkʼaˆ peh‸ ve tzuhˆ ve awˬ hkʼaˇ suh te da‸ gaˇ jaˇ ve yoˬ. Yawˇ hui teˇ gʼaˇ leh teˇ gʼaˇ ya‸ taw tuˬ uiˍ jaˇ ve awˬ ceuˬ hta‸ te da‸ leh, venˇ baˆ hta‸ keunˍ da‸ ve awˬ hpfuhˇ a shu yawˇ awˬ to awˬ hkʼaw lo gʼa hkanˍ ve yoˬ.
28Yawˇ hui Gʼuiˬsha hta‸ shiˍ gaˇ ve nyi ma maˇ cawˬ. Hkʼe te leh, maˇ shiˍ puiˉ ve nyi ma cawˬ la leh, maˇ keunˍ maˇ cawˇ ve kanˉ teˇ hpaˍ hta‸ te tuˬ, Gʼuiˬsha yawˇ hui hta‸ hpehˇ piˇ ve yoˬ. 29Yawˇ hui lehˬ, maˇ hteˇ maˇ cawˇ ve, haiˬ ve, shu mawˇ shu jeˬ hta‸ sheˉ lai ve, shu hta‸ naˬ tuˬ te gaˇ ve teˇ hpaˍ, yawˇ hui awˬ hkʼaw lo hkʼa biˇ cawˬ ve yoˬ. Shu hta‸ hkawehˉ puiˉ ve, shu hta‸ tiˇ pehˍ ve, shu hta‸ ya‸ gaˇ puiˉ ve, shu hta‸ heˍ puiˉ ve, shu hta‸ nyi bawˬ ve teˇ hpaˍ htawˇ hkʼa biˇ cawˬ ve yoˬ. 30Yawˇ hui lehˬ, shu hta‸ hkʼawˇ deˇ ve chaw, shu hta‸ hkʼaiˉ ve chaw, Gʼuiˬsha hta‸ canˇ ve chaw, caˆ muiˬ puiˉ ve chaw, nyi ma uiˍ ve mvuh ve chaw, a shu yawˇ awˬ to hta‸ taˍ uiˍ taˍ mvuh ve chaw, sho‸ sha‸ tuˬ te puiˉ ve chaw leh, awˬ pa awˬ e hkawˇ hta‸ maˇ na yuˬ puiˉ ve chaw teˇ hpaˍ hpeh‸ ve yoˬ. 31Yawˇ hui lehˬ maˇ dawˇ shiˍ puiˉ, ka ti‸ maˇ yeˬ puiˉ, shu hta‸ ha‸ cawˇ ve hkʼe maˇ ha‸ puiˉ leh, shu hta‸ maˇ ha kʼaˉ puiˉ ve chaw teˇ hpaˍ hpeh‸ ve yoˬ. 32Chi teˇ hpaˍ hta‸ hkʼa te ve chaw hui lehˬ, suh keunˍ ve yoˬ teh‸ Gʼuiˬsha kʼoˆ taˍ ve hta‸ yawˇ hui shiˍ taˍ ve yoˬ. Chi hkʼe shiˍ taˍ ve htawˇ, yawˇ hui awˬ to te chehˇ ve awˬ hkʼoˆ ka‸, oˇ hkʼe te ve chaw hui hta‸ yawˇ hui nyi ma cawˇ jaˇ ve yoˬ.
Currently Selected:
Roˉma‸ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.